لندن (ہمگام نیوز) ایپ بی ایم ءِ جارکش ءَ وتی درشانے ءِ تہ ءَ گوشتگ کہ بلوچستان ءِ زورگیری کرنے ءَ کوھنیں راستی یے ، ءُ اے دراجیں جیڑہ ءِ یک تھلیں پھناتے اش انت کہ مئے ڈیھ دو زورگیریں استان ، ایران ءُ پاکستان ءِ میان ءَ بھر ءُ بانگ ءُ لگتمال انت ،ءُ ناں بس اش کہ دویں زورگیر بلوچ راجی پجار ءَ چہ بُن اُنتکاں گار کنگ ءِ سرْاپ ءَ انت بلکیں آ پہ وتی اے پندل ءَ سوبین بوگ ءِ ھاتر ءَ یکیں دومی ءَ گوں ھمکوپگ ءُ ھمدست انت ۔ فری بلوچستان موومنٹ وتی اےگپ ءِ سر ءَ اوشتاتگ کہ مئے جھد ءِ یکیں ءُ پدریں نشانگ تیوگیں بلوچ راج ءِ آجوئی انت ءُ اے جھد اے ھر دُکیں زورگیر یں استانانی ھلاپ ءَ شریں دابے ءَ ءُیکیں وھد ءَ برجاہ بوگ لوٹیت۔
گوستانکی راستی گواہ انت کہ ایران ءُ پاکستان ءِ میان ءَ راجکاری ،سفارتی یا لیکھی دِگری وھد وھد ءِ سر ءَ الم دیم ءَ اتکگ انت بلے ھردے کہ گپ بلوچ گلزمین ءِ زورگیری ءَ را مھکم کنگ ءُ بلوچ مھلوک ءِ جنگ ءَ را پروشگ ءِ کیت تا اے دویں استان دائم ءَ یکے دومی ءِ پشت ءُ پناہ بنت۔
گوست ءَ شاہ ء ایران ءِ بے دینیں ھکومت گوں پاکستان ءِ استان ءَ ھوار بلوچ راجی سیت ءُ نپ ءُ آجوئی جنز ءَ را ھمینچو تاوان بار کتگ ، دنیگا داں ھمے دابیں ھم سّنتی دویں استانانی میان ءَ برجم انت بلکیں چہ پیسری ءَ گیش مھکم ءُ ھمگرنچیں دابے ءَ برجاہ انت۔
درشان ءِ تہ ءَ جارکش ءَ درائینتگ کہ انوگیں وھد ءَ اے ھم سّنتی ءِ نوکتریں درور ایران ءُ پاکستان ءِ میان ءَ زورگیریں بلوچستان ءُ آیانی وتی شھراں بیتگیں چیر اندریں گند ءُ نندانی دروشم ءَ دیم ءَ اتکگ ، ھشت مئی دو ھزار بیست ءُ چار ءَ زورگپتگیں بلوچستان ءِ شھر زاھدان ءَ ایرانی بارڈر گارڈز ءِ کمانڈر جنرل قاسم رضائی ءُ پاکستان ءِ قاض لشکر ءِ جھگیر انی میان ءَ گند ءُ نندے بوت ، کہ اشی ءِ تہ ءَ ” بارڈر سیکیورٹی ءُ انٹیلیجنس شیئرنگ “ ءِ نام ءَ ھورکاری ءِ سر ءَ دویناں تپاک کتگ ۔ بلے چیر ءُ کائی اے وڑیں گند ءُ نندانی مکسد بلوچ راجی آجوئی جنزءَ را نزور کنگ ءِ ھاتر ءَ یکے دومی ءَ سرپدی ءُ آگائی دیگ ءُ نوکیں کار رھبندانی ٹھینگ انت ، داں دویں ھواری ءَ نوکیں رِپک ءُ ھنرانی رد ءَ بلوچ آجوئی جنزءَ را کاونٹر بہ کن انت۔
چد ءُ رند جنوری ۲۰۲۵ ءَ زیر دستیں بلوچستان ءِ شھر تپتان ءِ نزیک ءَ ماں سیمسری چیک پوسٹے ءَ دویں زورگیریں ملکانی پولیس ءُ پوجی مھترانی گند ءُ نندے بوت ، کہ اشی ءِ تہ ءَ ” بارڈر مینجمنٹ میکانزم “ ءِفریم ورک ءِ سر ءَ کار کنگ ءِ درگت ءَ گپ ءُ رپ اش کتگ ، ھمے میان ءَ ھواریں ” سیمسری گلانی “ جوڑ کنگ ءِ جار اش ھم جتگ ، اشانی اسلیں مکسد بلوچ جنگی سر ءُ پراں گار ءُ گور کنگ ءُ زورانسریں سیمسر ءِ دویں نیمگاں بلوچاناں وتی جند ءِ سرزمین ءَ چہ رو آ یاں دارگ ءُ آیاناں در پہ در کنگ ات ۔ زانگ بہ بیت کہ ایرانی ءُ پاکستانی زیر دستیں بلوچستاناں ھچ وڑیں بارڈر منیجمنٹ ءِ گمان مرچی ءَ چہ بیست ، بیست ءُ پنچ سال پیسر نہ بیتگ ءُ دویں نیمگاں جاہ منندیں بلوچ پہ رپت ءُ آمد ءَ آجو بیتگ انت ءُ کس ءَ نہ داشتگ انت ، زورانسریں گولڈ اسمتھ لائن ءِ دویں نیمگاں بلوچ کھول وت مہ وت ءَ انچو نزیک ءُ سیاد ءُ وارس انت کہ یک براتے گولڈ اسمتھ لائن ءِ اے نیمگ ءَ انت تا دومی برات دومی نیمگ ءَ ، اے ، اے گپ ءِ منانک انت کہ بلوچ ایر دست انت بلے چہ یکے دومی ءَ نہ سستگ ، بس بلوچ راجی آجوئی جنزءِ ھتم کنگ ءُ وت ما وتی ھم سّنتی ءَ مھکم کنگ ءِ ھاتر ءَ پاکستانی ءُ ایرانی زورگیر بارڈر منیجمنٹ ءِ وتگڑیں پندلاں ساز انت ءُ چوشیں انچیں پزّوریں گواہ ھست کہ اے گند ءُ نندانی آسر ءَ بلوچ پُسگانی بندیگی ءُ یکے دومی ءِ دست ءَ دیگ ءِ وئیل گیش بوھان انت ۔ بازیں درور ھست کہ انچیں باسک بیتگ انت کہ آ پہ ادارکی چہ دویں زورگیراں رکگ ءِ ھاتر ءَ زورانسریں سیمسر ءِ دومی نیمگ ءَ جاہ منند بوگ ءَ لاچار بیتگ انت ، آ اش گپتگ یکے دومی ءِ دست ءَ داتگ انت ۔ اے دْرچ ءَ چہ پدر بیت کہ نوں پہ بلوچ راج ءَ اےکوھنیں ءُ ادارکی رکگ ءِ وڑ ءُ پیم درد نہ وارت۔
گل ءِ جار کش ءَ گیش درائینت کہ بژنی گپ اش انت کہ گوست ءَ لھتے بلوچ جنگی گلاں زمینی راستی ڈالچار کتگ انت ادارکی آسراتی یا ادارکی ایمنییانی تما ءَ انچیں پالیسی زرتگ انت کہ آیانی سیت نیٹ زورگیر ءَ رس اتگ ۔ چہ یک استانے ءَترس ءِ مارگ ءُ دومی استان ءِ چیر دستیں دمگے ءَ باھوٹی ءُ زورگیر ءَ را ھمساھگے زانگ ءُ آئی ءَ را رکینوکے پھمگ ءِ کار رھبند وتی کشی یے۔
فری بلوچستان موومنٹ ، بلوچ راج ءُ درستیں جنگی ءُ راجکاری گلاں اے گپ ءِ گیشواری ءَ کنت کہ فری بلوچستان موومنٹ بلوچ راج ءَ را اے بھر ءُ بانگی ءُ دگہ دگہ راجانی زیر دستی ءَ ابید یک ھند ءُ یک سر زمینےءِ جا ہ منند سرپد بیت ءُ اے ناں ایوک ءَ مئے گل ءِ راجکاری کار رھبندانی بُن ھُنڈال انت بلکیں تچک ءُ گواچنیں راستی یے کہ پاکستان ءُ ایران ھچ وڑ ءَ بلوچ راج ءِ دوست ءُ دوزواہ نہ بنت ، البت پہ وتی سیت ءُ نپانی سرجم کنگ ءَ آ ھمک بلوچ ءَ شاھگانیں بلوچ راجی سیت ءُ نپانی ھلاپ ءَ کارمرز کنگ لوٹیت انچوش کہ زورگیر نیشنل پارٹی ، بلوچستان نیشنل پارٹی ءُ سرپراز بگٹی ءَ ھوار ایدگہ پارلیمانی ٹولیاں کارمرز کنان ءُ پیداک انت ، پمیشکا فری بلوچستان مومنٹ ھمے سرپد بیت کہ ایران ءُ پاکستان ءِ میان ءَ بلوچ راج ءِ ھلاپ ءَ برجائیں ھم سّنتی ءَ را ڈالچار کنگ ، کوریں راجکاری ءُ نا پھتہ ئیں پگری ناھچی ءَ ابید دگہ ھچے نہ اِنت۔
ایپ بی ایم سرپد بیت کہ راجی آجوئی ءِ جنز ءَ ھواریں اسٹیک ہولڈرزاناں یک انچیں راہ ءُ رھبندے ٹھینگی انت کہ چہ ھردکیں زورگیریں استانانی دست ء وارءَ چہ آجو بہ بیت ، پرچا کہ کسے ءِ پراکسی یا آئی ءِ کارمند بوگ ءَ چہ بلوچ ءِ مچانکی سیت ءُ نپ ھچ وڑ ءَ رکینگ نہ بنت ۔ البت اے گواچن وتی جاہ برجاہ انت کہ ھندی ءُ میاں استمانی تک ءَ بلوچ راج ءَ ھم سنّتیں دوست در گیجگی انت بلے اے ھم سنّت ءُ دوستانی تہ ءَ پاکستان ءُ ایران ءَ ھوار کنگ یا چرے دویں زورگیراں یکے ءَ وتی دوزواہ سرپد بوگ ” رمگ ءَ گُرک ءِ میار “ کنگ ءِ وڑ ءَ انت ۔
ما سرپد بیں کہ کمے سیت ءُ سکیں کسانیں کچے ءِ پھریز ءِ ھاتر ءَ بلوچ راجی مچانکی ءِ بیانیہ ءَ را نزور کنگ سکیں پوچک ءُ میار باریں کارے پرچا کہ آجوئی ءِ جھد بیت کنت کہ سال ءُ کرن بہ گوازین انت ، چو اگاں یک مردمے بس وت ءَ سرجمیں راج ءِ پھازوک سرپد بہ بیت باندات ءِ راجی بیانیہ ءَ گڑ ءُ منج بہ کنت گڑا اے کار چہ زورگیری ءَ ھم مستریں بلوچ دژمنی یے بیت۔
ھر مردمے کہ بلوچ زیر دستیں ھنداں جتا پھمنت آ چو سرپراز بگٹی ءُ ایدگہ پارلیمانی گلانی وڑ ءَ پگری کور دیمی ءِ آماچ انت ۔پرچا کہ پاکستان ءِ رودینتگیں چک سرپراز بگٹی ءَ ھم گوشتگ ات کہ ما ایرانیاں ( بزاں ایرانی زیر دستیں بلوچستان ءِ جاہ مننداں ) واتر ایران ءَ دیم دئیں ، بلوچ راج ءَ را ایران ءُ پاکستان ءِ تہ ءَ بھر ءُ بانگ کنگ ءِ پکر آئی ایس آئی ءُ ایرانی اطلاعات ءِ جوڑینتگینے ، ءُ سیاسی بیانیہ ءِ اے جنگ ءَ ادارکی سیت ءُ نپانی ھاتر ءَ ایرانی یا پاکستانی پروپیگنڈھاں پزور کنگ بلوچ دوستی یے نہ انت ۔
ما اے گپ ءَ ھم گیشینیں کہ زورگیریں توان ناں ایوک ءَ پوجی درچ ءَ ھواری کنگ ءَ آں بلکیں اشانی انتیلیجنس ایجنسی اوں مھکمیں دابے ءَ بلوچ آجوئی جنز ءَ نزور کنگ ءِ سر ءَ کار کنگ ءَ آں ۔ انوگیں سیمسری گند ءُ نند اں کتگیں پیسلہ ھمے شور بندیانی بھر انت ۔ اے جاور ھالاں راجی جنز وتی کار رھبنداں ، رھوت کاری ، ءُ زمینی نیٹ ورکاناں انچیں دابے ءَ ٹھینگی انت کہ کجام ھم یک زورگیریں استانے ءِ زوراکیانی آماچ مہ بیت ، بلکیں دویں زورگیریں استان یکیں وڑ ءَ بلوچ راج ءِ دژمن انت ، پرچا کہ ایرانی زیر دستیں بلوچستان ءَ انوگاں چندے ھپتگانی تہ ءَ بازیں بلوچاناں پاھو داتگ ءُ بازینے دروگیں میڑانی نام ءَ شھید کتگ۔
جار کش ءَ درشان ءِ تہ ءَ گوشتگ کہ فری بلوچستان موومنٹ وتی جھد ءَ کجام ھم وڑیں دو رنگی ئیں کار رھبنداں نہ منیت ۔ مئے بیانیہ پدر ءُ گیش اتگ ، بلوچ راجی آجوئی چہ ایران ءُ پاکستان ھر دکانی زورگیری ءَ چہ رکگ ءَ نہ بیتگینے ، پمیشکا مئے جھد ءِ کشک ءُ منزل دویں زورگیرانی ھلاپ ءَ یکیں داب ءَ بوگ المی انت ۔ بلوچ راجی آجوئی جنز ءَ ھواریں درستیں ھمکار انی واستا الم انت کہ آ زمینی راستی ءَ پجا بیار انت ءُ جزباتی ءُ ادارکی پیسلہ مہ کن انت ءُ کجام ھم یک زورگیریں استانے ءِ چیر دستیں ھنداں پہ وتی پھریزگ ءُ رکینگ ءِ رِپک ءَ یلہ بہ کن انت ءُ بلوچ راجی پجار ءُ باندات ءُ آجوئی جنز ءِ سوبمندی ءِ واستا انچیں کار رھبند بہ ٹھین انت کہ چہ دویں استانانی دز رس ءُ ھم سنّتی ءَ بہ رک انت ۔
اے دما ن پہ ما یک گرانیں چکاسے ۔ زورگیریں توان گیشتر یکجا بیگ ءَ انت ، پمیشکا بلوچ راجی جنگءَ اوں نوکیں دور ءِ وڑ ءُ پیمانی رد ءَ بوگی انت ۔ کوھنیں کار دروشم نوں مٹ کنگی انت ءُ پش کپگ ءِ یکیں راہ ھمیش انت ما وت ما وت ءَ تپاک ءُ ھم پت ، رھبندانی پاسداری ءُ سرجم ءَ وتی مستر وت بہ بیں ، ناں ایوک ءَ زورگیرانی ھلاپ ءَ جنگ ءَ بلکیں وتی کار رھبندانی گیشینگ ءَ ھم۔
اد ءَ ڈیورنڈ لائن آ دست ءِ بھر ءُ بانگیں بلوچ سرزمین ءِ زکر ھم المی انت کہ کجام وڑ ءَ پاکستان ءَ بلوچ ءُ پشتون میڑینگ ءِ کوشست کتگ انت بلے مئے میان ءَ گوستانکی رھوت کاری سک مھکم انت ءُ دویں راج برطانوی سامراج ءِ بھر ءُ بانگ ءُ پندلانی آماچ بیتگ انت ، پنجابی ھما راج انت کہ لھتے سال پیش اپگانی پشتون اشاں پنچ سد ڈالر ءِ ھِوز ءَ بھا کتگ انت ، بلے بلوچ راج ءُ پشتونانی میان ءَ گیشتر وت ماں وتی بھیسہ ءُ شرپ ءُ مڑاہ ءِ سیادی ھست۔
فری بلوچستان موومنٹ وتی کلیں باسک ءُ بلوچ راج ءِ ھمرائی ءَ اھد کنت کہ مئے جد ءُ جھد ءِ منزل دائم ءَ بلوچ راج ءِ سرجمیں آجوئی بیت ۔ ماں ناں گوں زورگیریں استانے ءَ سودا جنیں ءُ نہ پہ ادارکی سلاھے ءِ دام ءِ چمگ ءَ کائیں ۔ اے دراج کشیں جھدے بلے اشی ءِ آسر مئے آجوئی انت ، ءُ اے آجوئی چہ ایران ءُ پاکستان ھر دْکیں زورگیرانی زیر دستی ءِ آسری ءَ گوں بندوک انت۔
