پرینکپرٹ (همگام نیوز) آجوئی بلوچستان جنز (ایف بی ایم) ءِ سروک ھیربیار مری ءَ جرمنی دو روچ ءِ گرد ءُ چر کرتگ، آئی ءَ جرمنی ءِ تہ ءَ ساڑی ئیں آجوئی بلوچستان جنز (ایف بی ایم) ءِ کارندہ ءُ آدگہ راجکاریں کارندھاں گند ءُ نند کرتگ، جُستانی پسّو ھم داتگ اَنت۔
آئی ءِ اِے گرد ءُ چر ءِ مول ءُ مراد گْوں
آجوئی بلوچستان جنز (ایف بی ایم) ءِ کارندہ ءُ آ دگہ راجکاریں کارندھاں گُند ءُ نند ءِ بوتگ۔
رسانکدر ءَ چہ شنگ کرتگیں جار ءِ ھساب ءَ آئی ءَ گنجان ءِ روچ ءَ گْوں پارٹی ءِ کارندھاں دیوان کرتگ ءُ جرمنی تہ ءِ ساڑی ئیں آ دگہ راجکاریں کارندھاں ھم دیوان کرتگ، دیوان ءِ تہ ءَ آئی ءَ جُستانی پسّو داتگ اَنت،
آجوئی بلوچستان جنز (ایف بی ایم) ءِ سروک ءَ جتائیں ملکاریں سرھالانی سر ءَ گپ ءُ باوست کرتگ ءُ اِے دمگ ءِ تہ ءَ مَٹ بوکیں راجکاریں، گزرانکی ءُ جنگی جاورھالانی سر ءَ گپ ءُ تران کرتگ۔ ایران ءِ چیردستیں بلوچستان ءِ آجوئی ءَ را وتی مکسد ءُ پروگرام ءِ تہ ءَ ھوار کنگ ءِ بابت ءَ جُست کرتگیں جُست ”بلوچ راج ءِ نزوریں جاورھالانی تہ ءَ اِے یک ناممکنیں اوگامے نہ اِنت کہ بلوچ راج یک وھدے ءِ تہ ءَ گْوں دو تاگتاں جنگ کرت ءُ وتی آجوئی ءَ گپت کنت ؟“ اِے جُست ءِ پسّو ءَ را ھیر بیار ءَ دات ءُ گْوشت کہ بلوچ نزور نہ اِنت بلے درستاں چہ پیسر بلوچ را وتی تاگت زانگی اِنت، پد ءَ ھمے تاگت ءَ را وتی راجی لوٹانی سرجم کنگ ءِ ھاتر ءَ یک جوانیں ءُ تچکیں راھے ءَ کارمرز کنگی اِنت۔ ما مدام اِنچیں گپ اِشکن اَٰیں کہ روکپتی بلوچستان ءِ تہ ءَ آ کَچ ملکاریں زانت ءُ سرپدی نیست کہ آ ھود ءِ بلوچ راجی آجوئی ءِ جُنز ءَ ھوار بہ بنت، اگاں اِے گپ راست اِنت گُڑا اِے مئے نِزوریانی مَنّانک اِنت، ما راجکاریں گل جْوڑ کرتگ، راجکاریں سروک پیداک کرتگ، آ راجکاریں گل ءُ راجکاریں سروک چینچو سانمند اَنت ایشی ءِ گواھی ءَ مئے ھستیں جُنز دَنت۔ راجی جنز وتی تہ ءَ وت یک مزنیں شھزانتی یے، اِے شھزانتی ءَ را پْوہ بوگ ءُ ایشی راستیں راہ ءِ درگیجگ راجی سروکانی زمہ واری اِنت۔ بوت کنت کہ اِے مئے سادگی اِنت کہ ما کمک کنگ ءَ را یک ھکمرانی یے سرپد بہ اَنت، لھتیں تاگت بلکیں انچیں شرتانی بنیات ءَ مئے کمک ءُ مدت کنگ ءَ بہ لوٹ اَنت کہ آ مئے سر ءَ ھکمرانی کن اَنت گُڑا مارا اِے پیمیں کمک ھِچ پیم ءَ کبول کنگی نہ اِنت۔ مارا کمک ءُ مدت گْوں برابری ءُ راجی شرپ ءَ کنگ لوٹ اِیت۔ مئے گْوں پاکستان ءُ ایران ءِ گْوں ما جْیڑہ اِنت، ایشی ءَ را سرپد بوگ ءُ پھمگ مئے جْیڑھانی گیش ءُ گیواری ءِ اولی گامگیج اِنت۔ مئے گْوں اِے زوراکانی گْوں بگیری ءِ ءُ مئے راجی جُنز ءِ بنیات ایش اِنت کہ آ مئے ھاکم جوڑ بوتگ اَنت۔ اگاں ما دریں تاگتاناں وتی ھاکم جوڑ کنگ لوٹ اَنت گُڑا اِے جنگ ءُ مزنیں دیمونیانی مول مراد چے اِنت ؟
ھکمرانی ءَ را کبول بہ کن اَنت گُڑا جْیڑہ ھم ھلاس اَنت، بلے ما گْوش اَنت کہ ما ھمے واست ءَ جھد کنگ ءَ اَنت کہ مارا وتی سرڈگار ءِ سر ءَ بلوچ ءِ ھاکمی آرگی اَنت، اگاں وھدے ما دریں ھاکمانی واھشت ءُ اشارھانی بنیات ءَ سرشونی اڑ کنگ بندات بہ کن اَنت گُڑا مئے جُنز، اِے جنگ ءُ دیمونیانی دراجکشیں سپَر ءِ مول ءُ مراد ھم ھلاس بہ اَنت۔
آٰئی ءَ دیمتر ءَ گْوشت کہ راجکاری کارگس ءُ راجکاریں سروکانی اِے زمہ واری بیت کہ آ وتی راج ءَ را گْوں راجی مکسد ءَ ھمگرنچ بہ کن اَنت ءُ آیانی سروکی ءَ بہ کن اَنت، بلوچستان ءِ سرڈگار بے بلوچ لس مھوک ءَ مئے ھچ کار ءَ نہ اَیت، مئے مکسد چہ راجی گلامی ءَ رکگّ ءُ وتی راجی آجوئی ءِ گرگ اِنت ءُ راجی آجوئی ءَ مئے سرجمیں بلوچ راج ھوار اِنت، اگاں ما راجی آجوئی ءِ شھزانتی ءِ تہ ءَ کوتاھی بہ کن اَنت گُڑا اِے یک راجدروھی یے۔ اگاں مئے انوگیں جنز ءَ را یک رول ماڈلے ءِ ھساب ءَ بہ چار ئے ءُ ایشی ءَ را گْوں ایمانداری ءَ بہ پھم ئے ءُ بہ چار ئے گُڑا ما گْوں ارزانی زانت کرت کن اَنت کہ گْوستگیں وھد ءَ وھدے کہ ھما تاگت، ءُ راجکاریں پُھتگی ءِ واھند بوتگ اَنت گُڑا بوت کنت کہ اِے وھد ءَ ما چہ آ جاہ ءَ دوگام پُشت ءَ بہ بنت۔ آدگہ راج وتی جنز ءِ بندات ءَ گْوں باز نزوریں جاوراں کن اَنت ءُ وھد ءِ ھواری ءَ آ ایشی ءِ تہ ءَ جوانی کار اَنت ءُ گھتری ءِ نیمگ ءَ رھادگ بہ اَنت، بلے ما بندات گْوں یکشمتی ءِ داب ءَ کرت بلے وھد ءِ ھواری ءَ ما بھر ءُ بانگ بوان بوت اَنت نزور تران بوت اَنت، ایشی ءِ سوب مئے سادگی بوت کنت۔ نوں مئے دژمنی ایران ءُ پاکستان ءَ ھوار گْوں چین ءَ ھم ھست، بوت کنت دیمتر ءَ دگہ تاگت ھم گْوں بلوچ ءَ دژمنی بندات بہ کن اَنت۔ دژمن ءُ دوستانی درگیجگ گْوں مئے راجی نپاں گْوں بندوک بہ بیت، کسے ءِ واھشت ءِ بنیات ءَ مہ بیت، ما 13 نومبر ءَ بلوچستان ءِ شھمیرانی روچ ءِ درگت ءَ برجاہ دار اَنت، آیا ما کدی اِے پھم اِتگ یاںکہ زانگ ءِ کوشست کرتگ کہ شھمیریں مھراب ھان ءَ ھما بلوچستان ءِ واست ءَ گْوں دژمن جنگ کرت ءُ شھمیر بوت کہ آ بلوچستان یک یکمشتیں بلوچستانے اَت ؟ ھما بلوچستان کہ آئی ءِ واست ءَ مھراب ھان شھمیر بوت ءُ ما آ روچ ءَ را پہ تیوگیں بلوچستان ءِ شھمیرانی روچ ایر کرت، آ بلوچستان ءِ تہ ءَ ایرانی بلوچستان ھم ھوار اِنت۔ من ھمے سرپد بہ اِیں کہ اِے یک دوپوستیں ربیتے کہ ھما بلوچستان ءِ واست ءَ آئی ءِ سروک شھمیر بوت ءُ ما ھما روچ ءَ را راجی شرپ ءُ بُرزشانی ءِ درجہ دات بلے پد ءَ ھما بلوچستان ءِ نیم بھر ءَ چہ دستکشی ءِ اَمل ءَ کنگ ءَ اَنت۔
گزہ ءُ ازرائیل ءِ جْیڑہ ءَ چہ اِے دمگ، ھاسکر بلوچستان ءِ سر ءَ کپوکیں سانمندیانی ھوالہ ءَ جست کرتگیں جُستانی پسو ھیربیار مری ءَ دات ءُ گْوشت کہ انچش کہ چین دگنیا ءِ سر ءَ وتی بالادستی ءَ را برجاہ دارگ ءِ جھد ءَ اِنت ءُ دگنیا ءَ را یکے دومی ءَ گْوں بندوک کنگ ءِ ھاتر ءَ ”بیلٹ اینڈ روڑ پروجیکٹ“ ءِ بندات ئِے کرتگ اَت، امریکہ ءَ گْوں وتی ھواریاں ایشی ءِ بدل ءَ را دگہ یک دگے پیش کرت، ایشی ءَ پد ازرائیل ءُ اربانی رشتہ ءِ برجاہ دارگ ءِ یک درچے بندات بوت۔ چین ءَ وتی پروجیکٹ ءِ تہ ءَ مڈل ایسٹ ءَ را اینکس توجہ نہ داتگ، ھمے سوب ءَ ایشی ءِ بدل ءَ پیش کرتگیں روکپٹی پروجیکٹ ءِ تہ ءَ مڈل ایسٹ ءَ گْوں جوانی ءَ شریکی کرتگ، بلے ایشی ءِ واست ءَ ھژدری اِنت کہ ازرائی ءُ اربانی میان ءَ دوستیں رشتہ بہ بیت، منی ھیال ءَ اِے پروجیکٹ ءِ ھلاس کنگ ءِ ھاتر ءِ اِے جنگ بندات کنگ بوتگ ءُ دیمتر ءَ اِے گیشتریں اڑ ءُ جنجالی پیداک کنت، ھمے سوب ءَ بوت کنت دیمتر ءَ چین ءِ راہ ءِ بند کنگ ءِ ھاتر ءَ بلوچستان ءَ را ارزشت بہ دے اَنت۔ اِے ھم بوت کنت کہ اِے دمگ ءِ تہ ءَ وھدے کہ چین وتی نزوریں جاورھالاں بہ چار اِیت ءُ مئے پجّار ءَ بہ من اِیت۔ دویں جاوراں راجکاری ءِ ھوالہ ءَ بلوچ را پائدگ رس اِیت۔ بلے اِے موہ ءَ چہ پائدگ زورگ ءِ واست ءَ مزنیں شرت ایش اِنت کہ مئے ھمگرنچی ءُ یکمشتی اِنت۔ ما چہ وت ءَ باز مھکمیں دژمنے ءَ گْوں جنگ ءَ اَیں، اِے دروشم ءَ مئے یکمشتی چہ درستاں ھژدری اِنت ءُ اِے یک جوانیں کردے پیلو کنت۔ راجکاریں اھتلاپ مدام پہ گھتری ءِ واست کنگ بیت بلے مئے کِرّ ءَ مدام دومی ءِ ردیانی چیر دیگ ءِ ھاتر ءَ اھتلاپ دار اَنت۔ ما وتی ھواریاں ءُ جنز ءِ دوستاں گْوں مدام اِے امیت ءَ دار اَنت کہ جی آ آ مئے اتھادی اِنت، آ مئے ردیاں ھم چیر بہ دنت، بلے من سرپد بہ اِیں کہ مئے اتھاد بوگ ءَ ابید ھم ما یکے دومی ءِ ردیانیانی نشاندھی ءَ بہ کن اَنت، تاںکہ بلوچ راجی جنز وتی روایتی ردوم ءَ چہ در بیت ءُ یک سائنسی دابے ءَ دیم ءَ بہ جنز اِیت۔
آئی ءَ گْوشت کہ راجکاریں گل مئے مکسد نہ اَنت بلکیں مکسد ءَ تاں سر بوگ ءِ وسیلہ اَنت، مارا مکسد مدام وتی اولی دلگوشی دیگ لوٹ اِیت، راجی بیرک ءِ سر ءَ جست کرتگیں پسّو ءَ را آئی ءَ دات گْوشت کہ بیرک یک گلے ءِ یاںکہ پارٹی ءِ نہ اِنت، بلکیں اِے مئے راجی چیدگ اِنت، تاں وھدیکہ ما جھد ءِ راہ ءَ رھادگ اَنت، اِے مئے جنز ءِ چیدگ ءِ ھساب ءَ مارا وتی ساھگ ءِ چیر یکجاہ کنت۔
وھدیکہ بلوچستان آجو بیت گُڑا اِے واک بلوچستان ءِ نمائندگیں کارگس ءِ بیت کہ آ اِے بیرک ءِ مٹ کنگ ءِ ھاتر ءَ بلوچ راج ءِ تہ ءَ یک ریپرنڈمے بہ کنت ءُ بلوچ راج ءِ مرزی ءُ منشاہ ءَ اِیشی ءَ را مَٹ بہ کنت۔ بلے اِے بیرک منی پیداک کرتگیں نہ انت، اِے بیرک ءَ را آ وھد ءِ کُلیں راجکاریں ٹولیاں ھواری ءَ جوڑ کرتگ۔ شاھد اِیشی ءَ را اولی رند ءَ یک گلے ءِ نیمگ ءَ دیم ءَ آرگ بوتگ، بلے آ وھداں بلوچستان ءِ آجوئی جنز ءِ نمائندگیں گل ھم ھما بوتگ، آ گل ءَ بیرک ءَ چہ ابید دگہ بازیں چیز ھم دیم ءَ آرتگ، آیا ما مرچی چہ آئی ءَ ھم انکاری بنت ؟
من اِے بیرک ءَ را یک کارندھے ءِ بستار ءَ زُرتگ، پرچے کہ من ءَ زمین ءِ سر ءَ ساڑی ئیں تیوگیں دوستاں ءُ شھمیریں گلام مھمد اِے وڑ کنگ ءِ گْوشتگ، اگاں پیش کنگ ءِ بنیات ءَ چیزانی سر ءَ مکن کنگ بندات بہ بیت گُڑا مئے کِرّ ءَ یکجاہ بوگ ءُ وتی جنز ءَ را دیم ءَ برگ ءِ واست ءَ ھچ پشت نہ کپ اِیت۔ راجی سوت مئے واست ءَ یک مزنیں درورے، آئی ءَ را یک گلے ءَ پیش نہ کرتگ، بلے راج ءَ آئی ءَ را کبول کرتگ، گُڑا من کے اوں کہ من ایشی ءَ را مہ من اِیں ؟
13 نومبر ءَ را بلوچ شھمیرانی روچ ایر کنگ بوت، راج ءَ آئی ءَ را من اِت، تو ما کجام ھساب ءَ آئی ءَ چہ انکاری بوت کن اَنت۔ جْیڑھاناں چینچو کم بہ کن اَنت آیاناں گیش ءُ گیواری ءِ نیمگ ءَ برگ ھمینچو ارزان بیت اِنت۔
پاٹی بازی ءُ مئے چہ ابید ”من“ مئے میان ءَ جیڑہ ودی کنگ ءِ سوب بوت کرت کنت۔ اِے چیز بے تپاوت ءَ مارا یک کنگ ءِ نیمگ ءَ رت کن اَنت۔ جنگی جاورانی تہ ءَ لس مھلوک ءِ منّگ ھم یک ریپرنڈمے ءِ بستار ءَ دار اِیت۔ آجوئی ءَ چہ پد کجام ھم چیز مٹ بوت کرت کنت۔ آئی ءِ وڑ ءُ پیم چہ لس مھلوک ءِ شور ءُ سلاہ ءَ ءُ آیاں چہ پیسلہ زورگی اِنت۔
آجوئیں بلوچستان ءِ تہ ءَ ھاکمی ایوک ءَ بلوچ لس مھلوک ءِ بیت، ھر پیسلہ ءَ ھم لس مھلوک کنت، السی بنیات ءَ وتی تاگت ءَ کے ءَ را دیگ لوٹ انت دات ئِے کن اَنت۔ یک جُستے “ارب ملکانی پیم ءَ بلوچستان ءَ را آجوئی بہ دے اَنت بلے سے ریاست بہ دے اَنت، گُڑا اِے یک منّگی ئیں گپّے بوت کرت کنت ؟“ءِ پسّو ءَ آئی ءَ گْوشت کہ اگاں اِے یم بوت گُڑا ما گیش بھر ءُ بانگ بہ اَنت، بنجاہ ءِ نہ بوگ ءِ سوب ءَ ھر یک ٹکے وتی جتائیں ریاستے جوڑ کنگ ءِ جھد ءَ کنت۔
من ارباناں ریاستے ءَ ھوار یک ٹکی بادشاھی ھم گْوش اِیں، کہ اود ءَ یک کُٹمے ءَ یاںکہ یک ٹکے ءَ وتی ریاست جْوڑ کرتگ اَنت، ھمے سوب ءَ مرچی بلاھیں دولت ءُ آبادی ءِ بوگ ءَ ابید ھم ازرائیل ءِ وڑیں کسانیں ملک چہ آیاں باز گیش تاگت ور اِنت۔ مارا چارگ لوٹ ایت کہ مارا دگنیا ءِ تہ ءَ اے پیمیں بستار لوٹ اِیت؟
دگنیا ءِ مرچی تاں منی نِزّ ءَ اِے پیمیں ھچ تجربگ نہ کرتگ کہ ما چہ آیاں دربہ بر اَنت ءُ وتی سرشونیاں اڑ بہ کن اَنت، اِے پیمیں شنگ ءُ شانگیں تاگت ءَ گْوں ما نہ وتی سیمسراں رکینت کرت کن اَنت ءُ نہ کہ وتی راج ءَ گزرانکی ھوالہ ءَ مھکم کرت کن اَنت۔ اگاں بہ چار ئے مئے زوراکاں مارا گزرانکی ھوالہ ءَ چہ یکے دومی ءَ کپ کرتگ، مکُران ءِ رشتہ گْوں ایران ءَ اِنت، ھب چوکی، لسبیلہ ءُ آ دگہ جاھانی گْوں سند ءَ اِنت، ڈیرہ جات ءُ نزیک ءُ گْور ئیگانی گْوں پنجاپ ءَ اِنت، اِے جاورانی تہ ءَکجام بھر ءِ بلوچ کجام پیمیں گزرانکی جاورانی دیمپان اَنت یک بھرے دومی بھر ءِ بلوچانی جاوراں سرپد نہ اِنت۔ راجی پھازگ ءُ راجی پجّار ءِ بنیات ءَ ما انوگیں راجی جنز ءَ را یک پیم کبول کرتگ ءُ یکے دومی ءَ را من اِتگ، بلے گزرانکی ھوالہ ءَ ما مرچی ھم یکے دومی ءَ گْوں بندوک نہ اَیں، چشکہ مارا بندوک بوگی اِنت۔ اگاں ما گزرانکی ھوالہ ءَ گْوں یکے دومی ءَ ھمگرنچ بوت اَنت ءُ مئے جْیڑہ یک بوت اَنت گُڑا بوت کنت کہ مئے تاگت ھم یکے بہ بیت ءُ ھر ھساب ءَ یکے دومی ءِ جْیڑہ ءُ جْیڑھانی گیش ءُ گیواری ءِ بھر جْوڑ بہ بنت کہ آ مئے راج ءِ جْوڑ کنگ ءِ بنیات بوت کرت کنت
