Error: Contact form not found.
ھمگام بلوچی نبشتانک
نبشتہ کار: چراگ رژن
پاکستان ءَ گوں وتی دروگیں پندلاں بلوچ ءِ دودانی بدل کنگ ءِ جھد کتگ گیرت ءِ نام سرا بلوچ زالبولاناں گسانی بندیگ کنگ بلوچ دودانی بھرے جوڑ کتگ یک ھدے ءَ داں کامیات بوتگ بلے سرجم ءَ انا بلوچ زالبولانی گسانی بندیگ کنگ بلوچ ءِ دودانی بھرے نہ انت اے بلکیں پاکستان وت جوڑشتیں پندلے اگاں وتی کوھنیں بلوچ راج دپتر ءَ چمشانکے بہ دے ئے بچار ئے گڑا مارا بلوچ زالبولانی دلیری ءُ نہ ترسی ءِ کسہ الم گندگ ءَ کیت بلوچ زالبول ھر ھساب ءَ وتی مردینانی ھم کوپگ بوتگ جنگانی پڑ ءَ انچو ماں بانڈی شھیک مسال ءَ بزوریں وھدے چاکر دھلی ءِ تھت ءِ گرگ ءَ روت بانڈی چاکر ءِ ھمرائی گوں بیت وھدے چاکر ءِ لشکر پروش وارت گڑا چاکر پد چکریت ءُ واتر کنت داں نیم راہ ءَ روت داں گند ایت بانڈی گوں نہ انت بانڈی چندے وتی ھمراھاں گوں جنگ ءَ داریت دھلی ءِ شاہ ءَ گوں دیم پہ دیم گوں وتی دست ءِ تلوار جنگ کنت میران واتر پہ بانڈی ءَ بزاں پہ مات ءَ روت کہ میت رواں کاراں آئی ھمے سما بیت مات شھید کنگ بیتگ بلے وھدے ھودا کہ سر بیت داں گند ایت بانڈی گوں دھلی ءِ شاہ ءَ دیم پہ دیمی جنگ ءَ انت میران شاہ ءَ ھکل کنت کہ ترا شرم نہ کنت تو گوں زالبولے ءَ جنگ ءَ ئے بانڈی پشت ءَ کنزیت میران گوں شاہ ءَ دیم پہ دیم بیت ھمے جنگ ءِ میان ءَ دھلی ءِ شاہ ءِ دست تلوار پرش ایت جنگ ءَ چاکر ءِ لشکر باج بارت” مرچی چوناھا یک ادے ءَ بچاریں بلوچ ءِ دوداناں پاکستان ءَ دگہ رنگے داتگ مٹینتگ بلے راج دپتر ھچبر گار کنگ ءُ بدل کنگ نہ بیت ھپتاد سال انت کہ بلوچ گلام انت کمی گیشی اتکگ پدا دنیا ءِ تب ءَ مٹ بوان انت بلے بلوچ ءَ وتی دود بے ھال نہ کتگ انت مرچی اگاں ما بچاریں گوستگیں چیزے ماہ ءَ ساری ڈّنک ءَ دزاں یک گسے ءَ دور کت دزی ءِ نیمون ءَ بلے مئے شیرزال مات ملک ناز ءَ دزانی دیم پہ دیم ءَ وتی سر دات بلے وتی گس ءِ دور کنگ نیشت انت اگاں مرچی بچاریں انچو کہ مئے کسانکیں گھار ماہ رنگ وتی برات ءُ نودربرانی ھم کوپگ انت ھمک جیڑھانی دیمپان انت ھمک ناروائیانی دیم ءَ چو بولان ءِ کوہ ءَ مک انت ھمے رنگ ءَ دگہ ھزاراں بلوچ زالبول در اتکگ گوں وتی براتاں ھم کوپگ انت گرمی ءُ سردیاں سگگ ءَ انت
مرچی اگاں بلوچ زالبول آجوئی جھد ءِ پڑّ ءَ اگاں گوں نہ آں بلے آیاں وتی نگرھیں سر وتی بچ پہ شان ءُ مڑاہ دست بڑا جتگ ءُ کوہ ءَ دیم داتگ انوں دیر نہ انت مئے مات یاسمین ءَ وتی بچ دست ءَ بڑا جت ءُ بلوچستان ءِ بیرک بڑا دات پہ پدائی ءَ دیم دات ماھے ءَ ساری شھید ارپان ءِ مات ءَ کلوھے شنگ کتگ ات پہ پھر ءُ شان گپ کنت گش ایت من کُل شھیدانی مات آں من ھما بچانی ماتاں کہ آ کوھان انت وتی لج ءُ ننگ ءِ دیمپان انت آ گش ایت من وتی بچ ءِ شھیدی ءَ ھچ نزور نیاں ءُ نباں ھم ھمے رنگ ءَ تیرتیج ءَ وھدے شھید رزا جھانگیر کہ شھید کنگ بیت گڑا آئی مکھیں مات وتی بچ ءَ پہ نازینک جناں کنت جنازہ ءَ زور ایت کبر ءَ بارت من سدکاں کہ پاکستان ءِ دروگیں پندل الم چیرتر انت بلوچ وتی دوداں نہ شموش انت اے اھد ءِ ھمک مات شیرزالے چشیں شیرزالیں ماتانی سرڈگار ھچ رنگ ءَ گلام نہ بیت
