شال (ھمگام ھال) استاد یک چاگردے ءِ آدینک اِنت کہ آ ہما چاگرد ءِ جیڑہاں گندیت ءُ آہاں مہلوک ءِ دیمءَ پیش داریت۔ مہلوک ءَ نہ تہنا پیش داریت بلکیں آہانی توجیل کنگ ءِ ہاترءَ مردماں پہ جہدءَ سکین دنت۔ استاد ہما کردار اِنت کہ آ وتی مہلوک ءِ ہمراہی ءَ وتی چاگرد، دودءُ ربیدگ، زبان ءُ لبزانک ءِ رکینگ ءِ ہاترءَ جہد کنت ءُ اشاں راجی ہوالہ نپانی ہاترءَ دیمروئی نیمگءَ بارت۔ مرچیگیں روچ استادانی میان استمانی روچ دارگ بیت، اے روچ پہ ہما استادانی نامءَ ایر کنگ بیتگ کہ آہاں چاگرد ءُ نودربرانی دیمروئی ءِ ہاترءَ وتی کردے پیلو کتگ۔ یونیسکو ءِ نیمگءَ چہ اے روچ ایر کنگ بیتگ داں دگنیا ءِ استاداں سکین دیگ بہ بیت کہ آ چاگردی گہتری ءُ گہبودی ءِ ہاترءَ جہد بہ کن اَنت۔ اے ہوالہ ءَ دنیا ءِ بازیں کُنڈاں روچ دارگ بیت ءُ استاد ءِ ماں چاگرد ءَ کرد ءِ بابتءَ سرپدی دیگ ءُ گپ ءُ تران بیت۔
بلوچ راج ہم وتی استادانی اِزت ءُ کدرءَ کنت ءُ بلوچ چاگرد ءَ استادانی مزنیں شرپے ہست۔ بلوچ چاگرد ءَ لہتے استاداں وتی گران بہائیں کرد پیلو کتگءُ وتی راج ءِ رہشونی کتگ۔ اے روچ ندر اِنت پہ ہما استاداں کہ آہاں وتی زاتی نپ ءُ سیت نہ چاریتگءُ وتی راج ءِ دیمروئی ءُ گہتری ءِ واستہ وتی سرجمیں زِند داتگ کہ آہانی تہ ءَ استاد سباء دشتیاری اولی سرپءَ اوشتوکیں استادے بیتگ۔ استاد صباء دشتیاری، زاہد آسکانی، رزاق زہری، ماسٹر بیت اللہءُ ورنائیں رؤف بلوچ ہما بلوچ استاد بیتگ اَنت کہ آہانی چم پچ بیتگ اَنت ءُ چاگرد ءَ زلمءُ زوراکی ءَ ھوار ایدگہ بلوچ دُژمنیں پندلانی ہلاپءَ گپ جتگ ءُ جہد کتگ۔ یا رفیق اومان ءِ وڈیں استاد کہ رُژنا پِگرءُ بلوچ دوستی ءِ سوْبءَ روچ مرچیگ ہم گارءُ بیگواہ اَنت کہ آ بلوچ راج ءَ جاہے نہ جاہے آگاہی دیگءَ بیتگ اَنت۔ اے ہما استاد بیتگ اَنت کہ وتی راجی زلورت ماریتگ ءُ بلوچ نودربراں ھکیگیں رنگءَ وانیتگ ءُ چاگرد ءَ وتی کردءَ پیلو کنگ ءِ بابتءَ جہد کنائینتگ۔ بلوچ راجی نپانی ہاترءَ ہر جاہءُ دیارءَ جہد کتگ۔ بلوچ راج ءَ آگاہی ءُ شعوری دیگ ءِ سپر ءَ وتی جان ایش داتگ ءُ بلوچ چاگردءَ نمیران بیتگ اَنت۔
دومی نیمگءَ بلوچ چاگرد ءَ انچیں ہم استاد ہست کہ پہ نام استاد اَنت کہ آہاں وتی چم بند ءُ زبان لِلّ کُتگ ءُ وتی کش ءُ گورءِ راجی جیڑہانی بابتءَ تِرْکگ ہم نہ کن اَنت۔ بلوچ زہگانی وانگ تباہ اِنت، ورنایانی زانشتی ءُ ساچشتی بود زوال کنگ بیتگ، ورنا جتائیں چاگردی سلکاریانی آماچ اَنتءُ دومی نیمگءَ بلوچ راج مرچی مزنیں زلم ءُ زوراکی ءِ آماچ اِنت۔ اے وھدءَ استادانی بلاہیں زلورتے بیت کہ آ راجی جوڈشت ءَ وتی کردءَ پیلو بہ کن اَنت ءُ چاگرد ءِ گہتری ءِ واستہ کار بہ کن اَنت۔ بلوچ استاد وتی راجی گہبودی، ورنایانی آگاہی ءُ چاگرد ءِ گہتری واستہ باز کار کُت کن اَنت۔ نودربر راجانی جوڈ کنوک اَنت ءُ نودربرانی جوڈ کنوک ءُ سکین دیوک استادانی زمہ واری اِنت۔ ادارہ بلوچ استاداں گوں ہمے لوٹءُ دزبندی ءَ کنت کہ آ چاگرد ءَ کردءَ بہ شوہازنت ءُ ہرکجا کہ بلوچ ءِ راجی زلورت اِنت اودءَ وتی کردءَ پیلو بہ کن اَنت۔
