شال (ہمگام ھال) بلوچ اسٹوڈنٹس ایکشن کمیٹی شال ھنکین ءِ نیمگ ءَ چہ بلوچ لٹریسی کمپیئن ءِ درچ ءَ انٹرایکٹیوو سیشن (گندءُ نندی) مراگشے برجم دارگ بوت۔دیوان ءِ ھاسیں مہمان بنجاھی مزن کارگشاد اظہر بلوچ ءُ گچینی مہمان بنجاہی کمیٹی ءِ باسک پیرجان بلوچ ءُ فوزیہ بلوچ بوتگ اَنت۔ دیوان جتائیں بھرانی تہ ءَ بوتگ کہ چو اے ڈول ءَ بوتگ انت، گشتانک، پینل ڈسکشن، انٹریکٹیوو سیشن ءُ ٹیبلو ۔
دیوان ءِ بندات گوں راجی سوت ءَ کنگ بوت، آئی ءَ پد اولی بھر تران اَت کہ آئی تہءَ جویریہ بلوچ (یک نودربرے) کہ آئی ءَ سریاب شال ءِ وانگ سپر ءَ وتی دیستگیں اڈ ءُ جنجال پیش کرت اَنت کہ چوں آئی ءِ وتی وانگ ءِ دہ سال سرجم کرت ءَ ھمدءَ سریاب ءَ کہ ادءَ اسکول ءُ استاد نہ بوگ ءِ ھساب ءَ اِنت، ھمے جاورانی تہءَ آئیءَ چوں اے گرانیں پند بُر اِتگ ءُ وتی وانگ برجاہ داشتگ۔
دیمتری تران بنجاھی کمیٹی ءِ باسک فوزیہ بلوچ ءِ تران اَت کہ آئی ءَ نندوکیں مھلوک ءُ نودربرانی دیمءَ تران کرت ءُ گشت کہ بلوچ لٹریسی کمپیئن ءِ پیسلہ بساک ءَ ھمے واستہ زرتگ کہ ھر ھما بلوچ جاہ ءُ دمگ کہ اودءَ وانگی نظام نہ بوگ ءِ ھساب ءَ انت اودءَ ھما ڈیٹایاں یکجا ءُ ھوار بکن ایں دانکہ ھمے ڈیٹایانی وسیلہ ءَ ما وتی لوٹاں زھرشانیانی دروشم ءَ دیمءَ بیاریں ءُ کارداراں زور دات بہ کنیں کہ وانگجاہانی وانگی نظامءِ سرءَ کار کنگ بہ بیت۔ مروچی ایں وھد ءَ اگاں وانگی نظام سد سال گوست ءِ وڑءَ بہ بیت گڑا بژن بیت بلے ما دستِ وت ھمے وڑ کنگ بوتگ ایں۔ دنیا ءِ تہءَ لٹریسی ریٹ سد فیصد بوگ ءَ اِنت ءُ ما انگت ءَ اسکول ءِ لوٹ ءَکنگ ءَ ایں۔
دیمتری بھر پینل ڈسکشن اَت کہ آئی ءِ موڈریٹر ھنکینی سنگت علی بلوچ اَت ءُ پینلسٹ واجہ کلیم اللہ بلوچ اَت، سنگت ءَ وتی جست واجہ ءِ دیمءَ ایر کرت ءُ واجہ ءَ وتی پسو دات ءُ اسکول ءُ وانگی نظام ءِ جیڑہ گشت اَنت۔ واجہ ءَ تران کنان ءَ گشت کہ من وت سریاب ءِ جاہ منندے آں ءُ اے جیڑہاں گندگ ءَ آں کہ ادءَ اسکول ءُ وانگی نظام نیست۔ من چش کہ ھمے لٹریسی سرءَ کار کتگ منا ھمے گندگ ءَ اتکگ کہ کم ءَ چہ کم سد وانگجاھ بند اَنت ءُ دگہ بازیں وانگجاہ کہ پچ اَنت گڈا اودءِ زلورت ءِ ھچ آسراتی ءُ استاد نیست۔
واجہ ءَ وتی گپ دیمءَ بران ءَ گشت کہ ایش جیڑھانی سوب ءَ مئے جنِکیں زھگ چہ وانگ ءَ دیر بیان اَنت کہ اے جیڑہ ءِ سرءَ کار کنگی اِنت۔ واجہ ءَ گشت کہ من بلوچ اسٹوڈنٹس ایکشن کمیٹی ءِ سنگتانی جہدءِ سرءَ باز وشاں کہ ھما کار مارا کنگی بوتگ ما کت نہ کت ءَ شما کنگءَ اِت، اے مئے واستہ مزنیں گراں بهائیں کارے، ءُ من گوں اے نندوکیں مھلوک، پت ءُ زھگاں گوں ھمے دست بندی کناں کہ ما شما کُل اے سنگتانی جھد ءَ ھوار بہ بیں کہ ایش بلوچ ءِ آؤکیں پدریچءِ واستہ کار کنگ ءَ اَنت۔
دیوان ءِ دیمتری بھر انٹرایکٹیوو سیشن اَت کہ آئی ءِ سروکی ءَ بنجاھی مزن کارگشاد اظہر بلوچ کنگ ءَ اَت، ءُ آئی ءَ وانگی نظام، وانگجاہ ءُ استادانی بابت ءَ نندوکیں مردمانی دیمءَ جست ایر کت ءُ آہانی ھیال ءِ ھساب ءَ آوانی پسو گپت۔
گڈی بھر یک ٹیبلوئے اَت کہ آئی ءِ تہءَ ، اسکول ءِ نودربراں چارٹانی سرءَ نبشتگیں کلوہانی وسیلہ ءَ چہ وتی لوٹ ایر کُت اَنت، کہ آہانی تہ ءَ وانگ ، استاد، وانگجاہ ءُ ایدگہ کُلیں آسراتی اوار اِت اَنت۔ ٹیبلو ءَ اے کلوہ ہم اوار اَت کہ مارا چہ نشہ ءُ ایندگہ سلکاریاں درائگ ءُ وتی راجی لوٹ سرپد بوگ لوٹ اَنت۔ ما سریاب شال ءِ تہ ءَ نندوکیں بلے مئے وانگی نظام انگت ءَ انچش درا بیت کہ دو سد سال پشت ءَ اِنت۔
سرجمیں بھر یک پہ یکءَ اڈ دیگ بیت اَنت ءُ دیوان ہلاس کنگ بوت۔
