شال (ھمگام ھال) بلوچ اسٹوڈنٹس ایکشن کمیٹی لورالائی ھنکین ءِ آرگنائزنگ باڈی گل ءِ بنجاہی کماش شبیر بلوچ ءِ سروکی ءَ رجم دارگ بوتگ۔ دیوان ءِ ھاسیں مھمان بنجاہی کمیٹی ءِ باسک وقار بلوچ بیتگ۔
دیوان ءِ بن گپانی تہ ءَ پجاری نشست ، بنجاہی سرکیولر، راھبند، گل کاری ءُ آوکیں گامگیج ھوار بیتگ اَنت۔ آوکیں گامگیج ءِ بن گپ ءِ تہ ءَ ھنکینی آرگنائزنگ باڈی اڈ دیگ بیتگ۔
دیوان ءَ سنگتاں تران کنان ءَ گوشت کہ لورالائی ءِ نودربرانی اے وھد ءَ گل ءِ تہ ءَ آیگ گل ءِ واستہ شوکتریں عملاں چہ یکے۔ لورالائی ھنکین ءِ جوڈ کنگ ءِ باز زلورت بیتگ کہ ادءَ بلوچ نودربرانی مزنیں کچ ئے ہست، اے لوٹ مرچی پیلو کتگ۔ ادءَ بلاھیں کٙچ ئے ءَ کوہ سلیمان ءُ مکران ءُ ایندگہ بلوچ میتگانی نودربر وانگ ءَ اَنت ۔ ادءَ گل کاری بلوچ نودربراں یکجاہ کنت ءُ آہاں بلوچ سیاست ءِ بہر کنت۔ گل ءِ اے جہد اِنت کہ گیش ءَ چہ گیش نوکیں ھنکین جوڈ کنگ بہ بیت ءُ گل ءِ پروگرام ءَ ھمک بلوچ میتگ ءُ ھما ادارہاں سر کنگ بہ بیت کہ اودءَ بلوچ نودربر وانگ ءَ اَنت۔سیمی بنجاہی مجلس ءَ پد بنجاہی کمیٹی ءٙ ھمے پیسلہ زورگ بوتگ کہ گل ءَ بلوچ زمین ءِ لوٹ ءِ بنیات ءَ ہرچ جاھاں کہ سر کنگ ءِ زلورت بوت ھما جاھاں سر کنگ ءِ جھد بیت اِنت۔ گل کاری ءُ سیاسی عملءِ برورد اِنت کہ گل بلوچستان ءِ کنڈ کنڈءَ نوکیں ھنکین جوڈ کنگ بیگ اِنت ءُدیمترءَ نوکیں پروگراماں گوں دیم ءَ کیت اِنت۔
سنگتاں دیمترءَ وتی تران ءِ تہ ءَ ھمے گپ زور داتگ کہ گوست ءٙ بازیں جاھاں مئے دست ءَ بیتگ بلے یا وا اودءَ کار کنگ ءِ واستہ ورنا پوہ نہ بیتگ اَنت پمیشکا دیر کنگ بیتگ بلے اے رندءَ بنجاہ اے جہد ءَ کنت کہ کجام ھم ھند ءَ بلوچ راجی سیاست ءِ لیکہ نزور اِنت گڑا گل ھمے ہورکی ءِ جاھاں پُر کنگ ءِ جھد ءَ کنت۔ گل وتی تاک نوشت ءُ گام ءِ وسیلہ ءَ چہ ھم بلوچ لس نودربر ءُ میتگانی تہ ءَ سر اِنت ءُ وتی راج ءَ وانندہ کنگ اِنت۔ ھما جاھاں کہ اودءَ مئے گل ءِ جوڈشت نیست اِنت بلے گل ءِ سنگت وتی وسءُ واک ءَ چہ ہمودءَ سر کنگ ءِ جھد ءَ اَنت۔ اے میتگانی تہ ءٙ گام ءُ نوشت وانگ بوئگ ءٙ انت ءُ اشانی سرءَ باوست ہم بوئگ ءَ اِنت۔ اشی ءَابید گل ءِ باسک وتی میتگانی تہ ءَ لائبریری ءِ جوڈشت ءُ لس نودربراناں شعوری بنیات ءَ تربیتی عمل ءَ چہ گوازینگ ءَ اِنت۔ گل وتی کُلیں سنگتاں پابند کنت کہ آ وتسریں ءُ وتگڑیں باوستاں چہ وت ءَ دُور بہ دار اَنت ءُعلمیءُ شعوری بنیات ءَ دیوانانی بھر بہ بنت ءُ وتی کش ءُ گوراں سیاسی زانشتی تران بہ کن اَنت۔ گل زیت ایندگہ جاھاں ھنکین جوڈ کنگ ءِ نیمگءَروت۔
دیوان ءِ گڈی بُن گپ آوکیں گامگیج ءِ تہ ءَ ھنکینی آرگنائزنگ باڑی ٹہینگ بیتگ کہ آہی ءِ تہ ءَ آرگنائزر آسودی بلوچ، ڈپٹی آرگنائزر محبوب تاج ءُ آرگنائزنگ کمیٹی ءِ باسک ابرار بلوچ، ضیاء بلوچ ءُ اوئیس بلوچ گچین کنگ بوتگ انت۔
بنجاہی سنگت ءَ نوک گچین بوتگیں سنگت سوگند دات اَنت ءُ دیوان ہلاس کُت۔
