کراچی (ہمگام نیوز ) بلوچ اسٹوڈنٹس ایکشن کمیٹی کراچی ھنکین ءِ نیمگ ءَ چہ بلوچی زبان ءِ مزن نامیں شائر واجہ مبارک قاضی ءِ یات ءَ مراگشے برجم دارگ بیتگ، مراگش چار جتائیں بھرانی تہ ءَ ات کہ آئی ءِ تہ ءَ پینل ڈسکیشن ، دروتی تامُربند (ٹریبیوٹ ویڈیو)، گُشتانک، شئیر ءُ شائری ءِ بھر آوار بیتگ اَنت-
مراگش واجہ مبارک قاضی ءِ یات ءَ دو سھت ءِ ھاموشی ءَ پد بندات کنگ بوت ءُ مراگش ءِ اولی بھر پینل ڈسکیشن ات کہ ایشی ءِ تہ واجہ شرف شاد ، واجہ شاکر شاد ءُ سنگت ثانی سید ءَ قاضی ءِ ازم ، شاعری ،لَچہ ءُ غزل ءَ ھوار قاضی ءِ سیاسی زند ءُ پگر ءِ سرءَ وتی ھیال درشان کُت اَنت-
دیوان ءِ دومی بھر دروتی تامربند اَت کہ بلوچ اسٹوڈنٹس ایکشن کمیٹی ءِ نیمگ ءَ چہ جوڈ کُتگیں تامُر پیشدارگ بوت ءُ دیوان ءِ سئیمی بھر گُشتانکی بھر ءِ تہ ءَ پروفیسر ریاض احمد ءُ واجہ رمضان بامری ءَ مبارک قاضی ءِ زِند ءُ ازم ءِ جتائیں تھرانی سرءَ گپ کُت-
دیوان ءِ گُڈی بھر شئیر ءُ شائری اَت کہ ایشی ءِ تہ ءَ کراچی مزن شاہ دربرجاہ ءِ نودربراں جوانیں وڈے ءَ بہر زُرت ءُ ھمد ءَ چہ مراگش آسر بوت-
