بلوچستان ءِ آجوئی ءِ راھبند

بَند01 : چوشکہ بلوچستان ءِ سر ءَ گئیر کانونی کوْزہ کنگ بوتگ، ھمے سوْب ءَ یک آزات ءُ جمھوری بلوچستان ءِ ھاتر ءَ جھد کانونی ءُ جائز انت۔

بَند 02: بلوچ راجی جُھد ءِ مول ءُ مراد بنیادماں زندگْوازینگ ءِ ھک دیگ ، رکّینگ ، وت پھریزی ءُ چاگرد ءِ تہ ءَ ھر مردمے ءِ ھکّاں برابریں دروشمے ءَ جم دارگ انت۔

بَند 03: بلوچ راجی جھد ءِ تہ ءَ ھمک مردم ءَ ی مستری دیگ وت یک مکسدے، نہ کہ اے پہ دگہ مکسد ءِ دست گرگ ءِ ھاتر ءَ انت ۔ ھمے سوب ءَ درھیں مردم برابر انت۔

بَند 04: بلوچ راجی جھد یک سیکولر جنزے، ایشی ءِ مول ءُ مراد ایش انت کہ مزھب چہ ریاست ءُ سیاست ءَ جتا بہ بیت۔ ایشی ءِ بنیاد مزھب ءُ نزریاتی لیکھاں چہ گیشتر دلیل ءُ گْواچن ءِ سر ءَ بہ بیت۔

بَند 05: مزھبی آجوئی ، سِتک (عقیدہ ) ءُ ھر ڈولیں گپّانی درشان بلوچستان ءِ مھلوک ءِ بندری ھک انت ۔ اے بابت ءَ ھر مردمے آزات انت کہ کجام ھم مزھب ءِ منوک بہ بیت یا دگہ گیر رواجی سِتک (عقیدہ) ءِ سر ءَ کار بند بہ بیت، بلے شر ایش انت کہ اے وڑ ءَ آ وتی مزھب ءُ سِتک (عقیدہ) ءَ دگہ کسے سر ءَ پہ زور مہ مُشیت ءُ اے وڑ ءَ اے دگہ مردمانی جتاجتائیں سِتک (عقیدہ) ءِ منوکانی آزاتی ءِ دیم ءَ اڑاند مہ بیت۔

بَند 06: بلوچ جمھوری جھد ءِ مول ءُ مراد نپر{فرد} ءِ وت واجھی ءُ آزاتی ءِ ھاتر ءَ انت ۔ اے جُنز اے راست ءُ گْواچنیں گپّ ءَ منّیت ءُ دلبڈی دنت کہ بنیادم ءِ پکر ءُ لیکہ ءِ ھچ ھد ءُ سیمسر نیست۔ اے ڈولیں تب بنیادمانی ابرم (فطرت) ءِ جوانی انت کہ آزاتیں پکر ءُ پدّرائشت ءَ پیش داریت۔ ما بنیادمانی اے ڈولیں تب ءُ

لیکھاں جْوان ءُ شاھگانیں چاگردے ءِ تہ ءَ رُدوم زورگ ءِ دلبڈی ءَ دئیں ۔ ھیال ءُ لیکہ چہ بنیادم ءِ وجود ءَ جتا نہ بیت ۔ ھورک ءُ پوچیں بنیاد پرستی کہ بنی آدم ءِ ھیال ءَ لیکھاں گوں زُلم ءُ جوْر ءَ داریت ، آ بنیادم ءِ ابرم (فطرت) ءُ بُنکی ھکانی ھلاپ انت ۔ پمشکا بلوچ جمھوری جُنز آزاتیں ھیال ءُ لیکہ ، ھیالانی پدرائشت ءَ را اولیت دنت۔

بَند 07: اے چہ بن ءُ بُندر ءَ بنیادم ءِ لیکہ ءُ ابرم (فطرت) انت کہ پکر ءُ ھیال ءِ سرپد ءُ پوہ بیگ ، سوج ءُ شَور ءُ سِتکانی (اعتقادات) تہ ءَ تپاوت (فرق) بیت۔ اے رِد ءَ پکری آزاتی ءُ پکری پدرائشت ءِ پادمال کنگ بنیادم ءِ ابرمی (فطری) ھک ءُ انساپ ءِ ھلاپ انت ۔

بَند 08: مردین ءُ زالبولانی نیام ءَ برابری بلوچ جمھوری جھد ءِ بنکی راہ ءُ رھبند انت ۔ یک آزات ءُ جمھوری ئیں بلوچستان ءَ مردین ءُ زالبول برابری ءَ چارگ بنت ءُ کانون ءِ رد ءَ درھیں ھک، دیمپانی کنگ ءُ آزاتی ءِ ھک ھوار انت ۔ اے برابری چاگرد ءِ درھیں تکانی تہ ءَ راجمانی ، اکتسادی

، وانگی ، دود ءُ ربیدگی ءُ سیاسی ھکانی تہ ءَ دیگ بنت۔