جمال ناسر ءِ گلگدارے گوں انڈین نریٹیو ءَ
اِے گلگدار 27 مولمان ءَ انڈین نریٹیو ءِ تاکّار مارک کنرہ ءِ نیمگ ءَ چہ انگریزی زبان ءَ شنگ کنگ بوتگ، اِے گلگدار ھمگام ءِ وانوکانی واست ءَ بلوچی ءَ رجانک کنگ بوتگ۔
مارک کنرہ: 27 مولمان 1948 ءَ وھدے زرباری ایشیا ءِ تہ ءَ بازیں راجاں آجوئی گپتگ اَت، یک راجے ءِ سر ءَ یکبرے پد ءَ کبزہ گیری برجم اَت، بلوچستان ءَ 11 ساچان 1947 ءَ ھندستان ءُ پاکستان ءَ چہ پیسر وتی آجوئی ءِ جار جَت۔ بلے پاکستان ءُ برتانیہ کدی ھم اِے گپ ءَ وش نہ اِت اَنت کہ بلوچستان یک آجوئیں ریاستے بہ بیت، پہ ھِیلھْے نُھ ماہ ءَ چہ پد پاکستان ءَ زوراکی بنیات ءَ بلوچستان ءِ سر ءَ کبزہ کرت۔
پاکستان ءُ برتانیہ ءَ دو مُھائدھانی سر ءَ دَزنام کنگ ءُ بلوچستان ءِ وتواکیں بِستار ءِ منّگ ءَ چہ رَند ھم آیاں دھوکہ کرت۔ پاکستان ءُ برتانیہ ءِ سروکاں 4 ساچان 1947 ءَ پیسلہ کرت کہ بلوچستان آجو اِنت، ایشی ءَ چہ پد 11 ساچان ءَ 1947 ءَ پاکستان ءِ سرکار ءَ کلات ءَ را یک آجوئیں وتواکیں ریاستے ءِ بستار ءَ مَن اِت۔
مروچی بلوچستان ءِ سر ءَ پاکستان ءِ کبزہ ءَ را 75 سال سرجم بوگ ءَ اِنت، من بلوچستان ءِ راجدپتر ءُ آئی ءِ باندات ءِ سرھال ءِ سر ءَ گْوں جمال ناسر ءَ گلگدارے کنگ ءَ اوں، چُشکہ آ اِے وھد ءَ آجوئیں بلوچستان ءِ جُنز (FBM) ءِ ڈنّی کارگس (شعبہ خارجہ) ءِ سروک اِنت، اِے یک راجکاریں گلے، ایشی ءِ سروکی ءَ نواب ھیر بکش مری ءِ پرزِند ھیربْیار مری کنگ ءَ اِنت، اِے گل بلوچستان ءِ آجوئی ءِ واست ءَ جُھد کنگ ءَ اِنت۔
انڈین نریٹیو: 27 مولمان ءَ بلوچستان ءِ سر ءَ پاکستان ءِ کبزہ ءَ را 75 سال سرجم بوگ ءَ اِنت، یک بلوچے ءِ ءُ FBM ءِ زمہ واریں باسکے ءِ بِستار ءَ تو چے سرپد بہ ئے کہ جاور تاں کجام ھَد ءَ تاں بلوچانی ءَ بگیری شُتگ اَنت؟
جمال ناسر بلوچ: بلوچستان ءِ رودراتکی بَھر ءِ سر ءَ پاکستان ءِ کبزہ کنگ دگہ جُتائیں ڈیھ زانشی (جیوگرافی) ویلے نہ اِنت، پرچے کہ پاکستان ءَ گوں برتانیہ ءِ سرجمیں کُمک ءُ رزاہ ءَ بلوچستان ءِ سر ءَ کبزہ کرتگ، دومی جھانی جنگ ءِ سوَب ءَ وھدے برتانیہ مالی ھوالہ ءَ ھندوستان ءِ سر ءَ وتی نوآبادیات ءَ برجم داشت کرت نہ کرت گُڑا آئی ءَ نیکراھی (مزہبی) ءِ نام ءِ سر ءَ ھندستان ءَ را بَھر ءُ بانگ کرت، سلتنت اُسمانیہ ءِ زوال ءَ چہ پد اسلام ءِ نام ءِ سر ءَ آئی ءَ اولی ریاست پاکستان جوڑ کرت۔
آ وھد ءِ بلوچ سروک وتی سرڈگار ءِ جیو پالیٹکس ءَ سرپد نہ اِت اَنت، آ وتی کانودی ءُ راجکاری جْیڑھانی دیم ءَ برگ ءِ واست ءَ گیر بلوچانی وازمَنْدگ اِت اَنت۔ پہ دروَر یک گجراتی مسلمان ایم اے جناح ءَ را بلوچ ریاست ءَ کانودی کْیس کنگ ءِ ھاتر ءَ یک وکیلے ءِ بستار ءَ زمہ واری دات ءُ نوکر کرت، جناح ءَ 1946 ءَ کیبنٹ مشن ءَ را بلوچستان ءِ میمورنڈم پیش کرت تاںکہ برتانیہ اِے گپ ءَ بِہ زانت کہ بلوچستان یک گیر ھندستانی ریاستے ءُ برتانیہ ءِ چہ ھندستان ءَ در آیگ ءَ رَند بلوچستان ءَ را وتی آجوئی دوبر رَس اِیت۔ ھمے پیم ءَ آ وھد ءِ ھکمران ھان کلات ءَ وتی ھکومت ءِ تہ ءَ ھندستان ءِ مسلماناناں نوکری دات ءُ وتی ڈنی کارانی (خارجہ امور) واست ءَ انگریز ءَ را زمہ واری دات۔ بدبھتی ءَ بلوچ سروکاں وتی ورنایانی تہ ءَ اِلم ءُ زانت ءُ ریاست ءِ کارانی دیم ءَ برگ ءِ بْود ودی کنگ ءِ جاہ ءَ درملکیانی وازمَنْدگ بوت اَنت، ھمے پیم ءَ آیاں پد ءَ گوں بلوچستان راجدروھی کرت۔
چُشکہ دومی نیمگ ءَ برتانیہ ءَ پاکستان ءَ را وتی ڈیھ زانشی (جغرافیائی) راجکاریں لوٹ ءُ گزرانی ھاتر ءَ جْوڑ کرت اَت، ھمے سوب ءَ برتانیہ ءَ یک مھکمیں دابے ءَ پاکستان ءَ را بلوچستان ءِ سر ءَ اُرش کنگ ءُ کبزہ کنگ ءِ واست ءَ کانودی ءُ جیوپالیٹیکل موہ دات، انڈیب انڈیپنڈنس ایکٹ 1947 ءِ تہ ءَ برتانیہ ءَ بلوچستان ءَ چہ لِیز ءِ زرتگیں اِلاکہ وتی نوکیں استان بزاں پاکستان ءَ را پہ ٹْیکی (تحفہ) دات اَنت۔ وھدے کہ بلوچستان ءِ مْیڑو (پارلیمنٹ) ءَ پاکستان ءِ پیش کرتگیں ھْوار بوگی پیام (انضمام) ءِ پیشکش رَد کرت ءُ آجوئی ءِ ھکّ ءَ ووٹ دات گُڑا بلوچستان ءِ اُلسی پرمان ءِ پلہ مرزی کنگ ءِ جاہ ءَ برتانیہ ءَ پاکستان ءِ پلہ مرزی کرت۔ برتانیہ 1876 ءِ کلات ءُ برتانیہ ءِ مُھاھدہ ءَ برتانیہ بلوچستان ءِ آجوئی ءِ زامن اَت، ھمے مھاھدہ ءِ سوَب ءَ برتانیہ ءَ را بلوچستان ءِ تہ ءَ وتی پوج ءِ آرگ ءِ موکل دیگ بوتگ اَت ءُ آئی ءَ را بلوچستان ءِ سرڈگار ءِ کارمرز کنگ ءِ اجازت ھست اَت۔ 1876 مُھاھدہ ءِ سوَب ءَ برتانیہ ءِ سلتنت ءَ بلوچستان ءِ کوئٹہ ءِ تہ ءَ دُگنیا ءِ مستریں برتانیہ ءِ پوجی بُنجلاں چہ یک بُنجلے اڈ کرت۔
برتانیہ ءِ سلتنت ءَ اولی جھَانی جنگ ءُ دومی جھَانی جنگ ءِ دوران ءَ بلوچستان ءِ سرڈگار کارمرز کرت، وھدے کہ بلوچ راج ءَ را آئی ءِ پکار بوت گُڑا آئی ءِ اِے مُھاھدہ ءِ بگیری کُرت، کلات برتانیہ 1876 ءِ مُھاھدہ ءِ آرٹیکل لمبر 3 ءِ بُنیات ءَ برتانیہ کانودی دروشم ءَ بلوچستان ءِ سر ءَ ھَر وڑیں ڈنّی ھَترہ ءُ اُرش ءَ چہ بلوچستان ءِ آجوئی ءَ را برجم دارگ ءُ رکینگ ءِ واست ءَ بلوچستان ءِ کمک کنگ ءِ پابند اَت۔ برتانیہ ءَ نہ کہ ایوک ءَ مُھاھدہ ءِ بگیری کرت بلکیں آئی ءَ بلوچستان ءِ بگیری ءَ پاکستان ءِ کمک کرت۔ برتانیہ ءَ انڈین انڈیپنڈنس ایکٹ 1947 ءِ تہ ءَ بلوچستان ءِ سر ءَ کبزہ ءِ توم ئِے کَل کُرت ءُ برٹش بلوچستان ءِ ھواری ءَ بلوچستان ءِ تیوگیں ھَند پاکستان ءِ دست ءَ دات اَنت ءُ پد ءَ یک برتانیہ ءِ جاھمنند ڈگلس ڈیوڈ گریسی ءِ چیردستی ءَ پاکستانی لشکر ءَ بلوچستان ءِ سر ءَ ارش کرت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
انڈیں نریٹیو: یک درونتے ءِ متابک ءَ چین ءَ بلوچ راجدوستان ءَ وتی کارندہ ءُ اسکیمانی رکینگ ءِ ھاتر ءَ ھال ھوال کرتگ۔ گُڑا اِے درگت ءَ چین ءَ گْوں FBM ءَ اھوال کرتگ؟ اگاں اھوال ئِے کرتگ گُڑا کے اھوال کرتگ؟
۔۔۔۔۔۔۔۔۔۔۔۔۔۔۔۔۔۔۔۔۔۔۔
جمال ناسر بلوچ: چین ءَ ھما ٹولیانی گْون ءَ نزیکی داشتگ کہ آ پاکستانی ریاست ءِ کارندہ اَنت، ھمے ٹولہ چہ چین ءِ ریاست ءَ ملام ءُ ٹھیکہ گِرَگ ءَ اَنت، منی زانت ءِ متابک ءَ چین گْوں اکتر مینگل ءُ آئی ءِ راجکاریں دیم ءِ زمہ وارانی گْون ءَ ھال ءُ اھوال کنگ ءَ اِنت، چشکہ آیاں آجوئی ءِ پْوشاک گْور ءَ کُرتگ بلے راستی ءَ اِے ٹولی بی این پی مینگل بَھر اَنت ما اِے پیمیں ٹولیاناں اسلیں آجوئی دوست سرپد نہ بنت۔ من اسلیں بلوچ آجوئی دوستیں چُشیں ھِچ گلے ءِ زمہ وارانی گْوں چین ءَ ھال ءُ اھوال ءَ سرپد نہ آں۔ چین اِے وھد ءَ بلوچستان ءُ بلوچ راج ءِ بگیری ءَ پاکستان ءَ را کمک کنگ ءَ اِنت، چین مئے ھَند ءِ تہ ءَ یک گیر جانبداریں تاگتے نہ اِنت ءُ آئی ءَ پیسر ءَ بلوچ ءُ بلوچستان ءِ بگیری ءَ یک دژمنے گچین کرتگ، ھمے واست ءَ ما اِے جاورانی تہ ءَ چین ءَ گْوں گپ ءُ باوست کرت نہ کن اَنت۔
۔۔۔۔۔۔۔۔۔۔۔۔۔
انڈین نریٹیو: کینیڈین بیرک گولڈ ءَ را ریکوڈک ءِ کَھنانی سر ءَ واکداری رس اِتگ، ترا اِے گپ ءِ سر ءَ بْیسہ بیت کہ آ بلوچستان ءِ گْون ءَ اِے جْیڑھانی سر ءَ انساپ کنت اِنت؟
جمال ناسر بلوچ: بلوچستان پاکستان ءِ یک کالونی یے، اِے یک کبزہ کرتگیں الاکھے، بلوچستان ءِ تہ ءَ کینیڈین بیرک گولڈ ءُ چینی ایم سی سی ءِ تہ ءَ ھچ تپاوت نیست، پاکستان واجہ اِنت ءُ آ تیوگیں سُودانی سر ءَ نپ ءُ پائدگ چِست کنگ ءَ اِنت، بلوچستان ابرمی مڈیانی درگت ءَ سْیر تریں استانانی تہ ءَ چہ یکے بلے ایشی ءَ چہ ابید انگت بلوچ راج پدمنتگیں راجانی لڈ ءَ ھوَار اِنت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انڈین نریٹیو: ایف بی ایم ءِ سرشونیانی بُنیات ءَ ایرانی بلوچستان ھم بلوچستان ءِ یک بھرے، تو مارا سرپدی دات کرت کن ئے کہ زاھدان ءِ ویلہ ءَ چہ رَند ایرانی اِلاکہ بِزاں سیستان بلوچستان ءِ تہ ءَ چے بوگ ءَ اِنت ؟
جمال ناسر بلوچ : من اِے گپ ءَ راست کنگ لوٹ اِیں کہ ایف بی ایم ءِ سرشونی بلوچستان ءِ کَچ ءُ کساس ءَ کم یاںکہ گْیش کرت نہ کن اَنت، بلوچستان یک راستی یے، اِے یک راستی یے چاھے ایشی ءَ را یکے دوست دار اِیت یاںکہ نہ دار اِیت، ایرانی کبزہ کرتگیں بلوچستان، بلوچستان اِنت، پاکستان ءِ کبزہ کرتگیں بلوچستان کہ آئی ءِ تہ سندھ ءُ پنجاپ ءِ لھتیں اِلاکہ ھم ھوَار اَنت، اِے کُل بلوچستان ءِ بَھر اَنت۔
اوگانستان ءِ گْوَستانکی بلوچ الاکہ کہ آ گیر کانودیں ڈیورنڈلائن ءِ وسیلہ ءَ بَھر ءُ بانگ کنگ بوتگ اَنت آ ھم بلوچستان ءِ بَھر اَنت۔ بلوچستان ءَ را گیرکانودی بنیات ءَ بھر بانگ اِش کرتگ، ھمے سوَب ءَ مارا وتی سرزمین ءِ دوبر یکجاہ کنگ ءِ ھاتر ءَ مئے جُھد یک راستیں ءُ کانودی جُھدے۔
تومشان (ستمبر) 2022 ءَ زاھدان ءَ اُلسی کْوش (قتل عام) ریاست ءِ نیمگ ءَ چہ پیسر ءِ جْوڑ کرتگیں ھِیلہ ءُ بَھانھے، چُشکہ اِے آئی ءِ سوشانیانی ھساب ءَ نہ بوت، ایرانی ریاستی لشکر ءِ دست ءَ کساس سَد ءَ چہ گیش بے میاریں بلوچ کُشگ بوت، سدانی کساس ءَ چہ گْیش بے میاریں بلوچانی کْوش ءَ مئے یکجاھی ءُ یکشمتی ءَ را مُھکم کرت، ھمے سوَب اِنت کہ ایران ءِ کبزہ کرتگیں بلوچستان ءِ تہ ءَ ھر پِڑ ءَ گْوں بندوکیں مردم آجوئی ءُ انساپ ءِ لْوٹ ءَ کنگ ءَ اَنت۔کردستان، اربستان، الاھواز، ترک، آزربائیجان ءَ ھم لس مھلوک پاد آیگ ءَ اِنت۔
ایران ءِ انوگیں تَھِی جاورھالانی سرپد بوگ ءِ واست ءَ مارا اِے سرپد بوگ ءُ زانگی اِنت کہ نوکیں ایران چے پیم ءَ ھستانک ءَ (وجود) اھتگ۔ ایران یک نوآبادیاتی جیوپولیٹیکس ءِ پیداوارے، ما بلوچستان ءِ انوگیں جاورھالاں چہ ایران ءِ آ دگہ جاھانی جاورھالاں چہ جُتا چار اِت کرت نہ کن اَیں۔ ایران ءِ ڈیھ زانشی راجکاری چہ پاکستان ءَ جُتا اِنت، پاکستان تہ ءَ گیر پنجاپی اکلیت ءِ تہ ءَ اَنت ءُ آبادی ھساب ءَ پنجاپی گیش اَنت، بلے ایران ءِ تہ ءَ آبادی ءِ ھساب ءَ پارسی گیش نہ اَنت، کساس ءِ متابک ءَ ایران ءِ آبادی ءِ 40 درسد پارسی اَنت۔ آ دگہ راجانی تہ ءَ بلوچ، کرد، ارب، آزربائیجانی ترک ءُ پارسی انوگیں نیکراھی سرکار ءَ چہ نجات لوٹ اَنت۔
بلے پارسی ھمے پَھم اَنت کہ آ انوگیں نیکراھی ھکومت ءَ چہ پد نام نِھادیں پارسی سلتنت ءَ دوبر زندگ کن اَنت ءُ آ دگہ تیوگیں راجانی سر ءَ وتی ھکومتی ءَ برجم داشت کرت کن اَنت۔
دومی نیمگ ءَ گیر پارسی وتی باندات ءِ پیسلہ ءَ وت کنگ لوٹ اَنت، آجوئیں بلوچستان ءِ جُنز (FBM) آجوئی لوٹوکیں آ دگہ گیر پارسی ئیں راجانی کمک ءُ تاوان ءَ کنگ ءَ انت۔ ما سرپد باں کہ ایران ءِ تہ ءَ گِھتری کیت، ایران ءِ انوگیں فاشسٹیں ھکومت ءَ ھلاس کنگ ءَ چہ آ دگہ تیوگیں ایردستیں راجاناں وتی باندات ءِ پیسلہ ءِ گچین کنگ ءِ موہ رس اِیت، اِے وڑیں آشوب ممکن انت اگاں تیوگیں گیر پارسی اُلسی تاگت مئے گْون ءَ کمک ءُ تاوان بہ کن اَنت ءُ پارسی اشرافیہ ءَ را مئے مُچی نپانی ءُ الاکھی ایمنی ءِ واست ءَ اُلسی رھبندانی منّگ ءَ مجبور بہ کن اَنت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انڈین نریٹیو: تو ایران ءُ سئودی ارب ءِ میان ءَ تازگیں ایمنی مُھاھدہ ءَ را کجام چمّ ءَ چار ئے؟ بلوچستان ءِ ایرانی ءُ پاکستانی بَھرانی تہ ءَ اِے مُھاھدہ ءِ سوَب ءَ چونیں سانمَنْدی بوت کرت کن اَنت؟
جمال ناسر بلوچ: بائیڈن انتزامیہ ءِ گْوں مھمد بن سلمان ءِ روِشت ءِ سوَب ءَ سئودی ارب گْوں چین ءَ نزّیک بوان اِنت، چُشکہ چین ءِ نیمگ ءَ سالسی کنگ بوتگ، اے مُھاھدہ ءِ دراجیں اُمبر ءِ کساس کنگ اشتاپکاری یے، اِے مُھاھدہ ءَ چہ کم از کم اِے پدّر بیت کہ چین مئے ھندانی تہ ءَ یک مزنیں کِردے پیلو کنگ لوٹ اِیت ءُ امریکہ ءِ اتھادی مشرق وسطی ءِ تہ ءَ چہ امریکہ ءِ ھکمت اَملیاں دلجم نہ اَنت، اِے مُھاھدہ ءَ چہ بلوچستان ءِ تہ ءَ سئودی ءُ ایرانی پراکسیانی نپاناں نُکس رس اِت کرت کنت۔ چُشکہ آ وتی ھستانک ءِ برجم دارگ ءِ ھاتر ایران ءُ سئودی ءِ کلدارانی وازمَنْدگ اَنت۔ بلے ایشی ءَ چہ آجوئیں بلوچستان ءِ جُنز (FBM) ءُ بلوچ راجی جُنز ءِ واست ءَ ھِچ جْیڑ ءَ ودی نہ بیت پرچے کہ ما یک ھاسیں ملکے ءِ نپانی ھاتر کار ءَ نہ اَیں، ما بلوچ راج ءِ راجی نپانی ھاتر ءَ کار کنگ ءَ اَنت ءُ ایران ءِ زورگریں ھکومت ءِ تھت ءِ چپّی کنگ مئے راجی نپ اِنت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انڈین نریٹیو: بلوچ گَل جُتائیں تلّوانی سر ءَ جنگ کنگ ءَ اَنت، (راجکاری، سلاھبندیں) بلے مارا ھچ وڑیں یکمشتی ءِ کوشست گِندگ ءَ پیداک نہ اَیں، اِے درگت ءَ تو چے گْوش ئے؟ اگاں شُما انگت یکجا نہ اِنت گُڑا تو چوں جْیڑ اِت کرت کن ئے کہ یک آجوئیں بلوچستان ءِ گورنمنٹے ءَ را شُما داشت کرت کن اِت ؟
جمال ناسر بلوچ: انوگیں بلوچ راجی جُھد یک یکجاھیں مُھازے ءِ دروشمے ءَ بندات کنگ بوتگ ، بلے لھتیں دوستیں مُلکانی نیمگ ءَ چہ دزمانجنی، پاکستانی پلہ مرزی کنوکیں لھتیں راجکاریں گل چُشکہ بی این پی مینگل ءِ آجوئی لوٹوکیں گلانی تہ ءَ دزمانجنی ءُ آ دگہ لھتیں سلاھبندیں ٹولیانی ردیں سرشونیاں جُھد ءِ تہ ءَ انتشار ءُ بدگمانی پیداک کرتگ۔ گْوست ءَ ما جُتائیں وھداں گْوں راجکاریں گلاں یکجاھی ءِ جُھد کرتگ ءُ اِے وھد ءَ ھم گْوں آیاں یکجاھی ءِ درگت ءَ گپ ءُ باوست بوگ ءَ اِنت۔ کجام ھَد ءَ تاں آجوئی ءَ رَند بلوچستان ءِ سْیادی اِنت، ایشی ءَ را بلوچستان لبریشن چارٹر ءِ سیمی تَھر، گورننس ءِ ھوالہ ءَ مئے سرشونیاں پَدّر ءُ زاھر کنت۔ مئے سرڈگار ءَ را کے آجو بِہ کنت ایشی ءِ تہ ءَ ھچ وڑیں تپاوتے نیست، آجوئی ءَ چہ رَند بلوچستان ءِ سر ءَ ھکمران ٹولی ءِ پیسلہ ءَ تِیر نہ کنت بلکیں بیلٹ کنت۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
انڈین نریٹیو: پاکستان گزرانکی ءُ راجکاری جنجالاں چہ گْوزگ ءَ اِنت، پاکستان ءِ واست ءَ اڑ ءُ جنجال گیش بوان اَنت، بلوچ اِے جاورھالاں چْوں چار اَنت ءُ پاکستان ءِ گیر مھکمی ءَ بلوچ جُنز ءِ سر ءَ چونیں سان کپ اِیت ؟
جمال ناسر بلوچ: پاکستان کدی مُھکم نہ بوتگ، درملکی کُمک، اوگان ءُ سوویت یونین ءِ جْیڑہ ءُ پد ءَ ناشرکاری ءِ بگیری ءَ جنگ کنگ ءَ پاکستانی ریاست ءِ واست ءَ راہ پَچ کرتگ، روکپتی ملکانی مدت ءُ کمک ءِ وسیلہ ءَ پاکستانی ریاست ءِ مشینری جُنزگ ءَ اِنت، پاکستان یک درکانودی ریاستے ایشی ءِ تہ ءَ اُلسی (جمہوریت) نیست ءُ نہ کہ چاگردی ءُ راجی ھمدپی ھست، دنیا ءِ نکشہ ءِ تہ ءَ ایشی ءِ ھستانک ءَ را ھچ وڑیں گْوستانکی بُنیات ءُ منّانک نیست، پاکستان ءِ وڑیں پولیٹیکل انٹیٹی، چِست بوکیں گزرانک ءِ بْودناک نہ بیت، پاکستان چنیچو گیش گیر مھکم بیت، بلوچانی واست ءَ دوبر آجوئی ھمنچو گیش ارزان بیت، پاکستان گڑ بڑ ءِ تہ ءَ اِنت، بلے من ھمے سرپد بہ اِیں کہ پاکستان ھم یک وش بھتے کہ آئی ءَ را بھارت ءِ پیمیں نِزوریں ءُ ترسوکیں دژمنے رس اِتگ، بھارت ءَ را گزرانکی تاگتے ھست بلے آ انوگیں مودی ءِ ھکومت ءِ سوب ءَ مئے ھند ءِ جاورانی سر ءَ کم ءَ چہ کم سانمند بوان اِنت۔ انڈیا ءِ جاہ ءَ اینچو دولت ءُ گزرانکی تاگت داریں اگاں دگہ راستی ءِ منوگریں ملکے بوتیں گُڑا آئی ءَ سالاں چہ پیسر پاکستان ءِ جْیڑہ ھلاس کرتگ اَت۔