ھمگام بلوچی
اے گپ ءَ ھمک بلوچ ورنا ءُ کماش، برات ءُ گْوھار ءُ سْیاد ءُ وارس بزاں کُل سرپد انت کہ اگاں دژمنے یک راجے ھلاس کنگ لوٹ ایت گُڑا جِند ءَ ھلاس نہ کنت ئِے بلکیں آئی ءِ زبان ءَ پیسر ءَ ھلاس کنت چمیشکا آ راج وت چہ پاداں گار بیت بزاں آ مجگی گلام بیت وتی دود ءُ ربیدگاں بے ھال ءُ شموشان کنت ءُ زالم ءِ دود ءُ ربیدگانی رندگیری ءَ کنت پمیشکا آئی ءِ راجی بستار گار بیت پد ءَ دژمن ھم نہ منّ ایت ئِے چمیشکا بے تُرس ءَ پد ءَ ھما راج ءَ کشان کنت۔
اے گپ ءَ ھر وڑیں دژمن ھم زان اَنت کہ اگاں ما چہ بنداتی ءَ یک راجے ءِ سرا زُلم ءُ کَھر ءَ کن ایں گُڑا چہ ھمے زُلم ءُ گیشی ءَ راج گیشتر یکمُشت بیت پد ءَ راج ءِ تپاکی مارا پروش دنت پمیشکا دژمن اولی بَر ءَ آ راج ءَ را پیسر ءَ ھجبر زُلم ءُ اندوہ نہ دنت داں وھدے کہ دژمن راجے ءِ هُنڈالاں مہ دِر ایت بزاں راجی پجار ءُ آئی ءِ زبان ءَ ھلاس مہ کنت آئی ءَ بَھر ءُ ونڈ مہ کنت۔ دژمن پیسر ءَ آئی ءِ ڈیھ ءَ ماں بازیں جاھاں ونڈ ءُ چُنڈ کنت گُڑا زیر دستیں راج ءِ میان ءَ اجبیں دگری ءُ زھراں ودی کنت ءُ راج ءِ مردماں وت ماں وت مڑائینیت، پد ءَ آئی ءِ شھر ءُ دمگاں ھچ وڑیں بُنکی آسراتیاں ھم نہ دنت ناں کہ پہ پوریاگِری ءَ چیزے بیت ءُ نیکہ ورگی آپ، لین، وانگجاہ ءُ نادْرھجاہ بِہ بیت ئِے، ابید چہ نشہ ءَ دگہ ھچ نہ بیت۔ اگاں وانگجاھے بیت گڑا آئی ءَ بُنکی آسراتی نہ بنت پد ءَ آئی ءِ زھگ ءُ پدریچ ءَ دروگ ءُ درآمدگی زبان ءَ وانینگ بیت ناں کہ ماتی زبان وانینگ بیت۔ پہ گلامی ءِ ھُنڈالاں رودینگ ءَ ءُ پہ راج ءِ ھلاسی ءِ پندلاں ساز کنگ ءَ آ وتی جِند ءِ راجی بستار ءُ ارزشت ءِ بابتاں ھر وڑ کور کنگی اِنت۔ آئی ءَ اے وانینگ نہ بیت تو کَے ئے ءُ تئی راج چے یے ءُ تئی راجی پجار چے اِنت بزاں چہ ھمد ءَ آئی ءِ پدریچ مجگی گلام جوڑ کنگ بیت
نادْرھجاھانی نہ بوگ ءَ ورنائیں زالبول چکی درداں بیران بنت ءُ بے کساس بلوچ رستگیں زھگ ھم نادْراھی ءِ سوب ءَ نیم جان بنت یا آ ھم بیران بنت۔ پد ءَ چہ یک دومی ءِ جیڑھانی سوب ءَ راج ءِ ٹَکر وت ماں وت ھونی جنگاں اڑ اَنت ءُ دژمن ھمے اڑ ءُ جنگاں گیشتر روک کنان روت، بزاں ھما راج ءِ تہ ءَ نپرتاں ودی کنائین ایت ءُ راج ءِ تہ ءَ کاسگ چٹّاں گیشتر کنت چمیشکا راج ونڈ ونڈ بیت انچوشکہ انگریزانی یک ڈولے(پارمولایے) ھست کہ “ڈیوایڈ اینڈ رول” گْوش اَنت ئِے۔ گڑا ایشاں رند دژمن راج ءَ ھر وڑ ءَ آسانی ءَ ھلاس کنت توری زبان ءُ آئی ربیدگ بِہ بیت توری آئی ءِ پدریچ کُشگ یا نسل کشی کہ “جینوسائیڈ” ئِے گْوش اَنت۔
اگاں تو مرچی پہ یک ساھتے ءَ بلوچ چاگرد ءَ چماشنک بِہ دے ئے گُڑا ترا مان کیت کہ بلوچی راج ءَ گوں ھمے وڑ ءَ بوان ءَ پیداک اِنت۔ آئی ءِ زھگ ءُ پدریچ ءَ ماتی زبان وانینگ نہ بیت بلکیں درآمدگی زبان ھندی وانینگ بیت، آئی ءَ را ھمل ءُ جیند، چاکر ءُ گھرام ءِ بارو ءَ وانینگ نہ بیت بلے مھمد اَلی جناہ ءُ دومی بازیں دروگ وانینگ بنت پمیشکا آ چہ وتی راجی پجار ءُ راجی راجدپتر ءَ بے ھال اَنت ءُ مرچاں بلوچ گوں بلوچ ءَ ھندی گپ کنت بژن انت کہ وتی ماتی زبان ءَ شَری ءَ ٹوک کنگ ءَ نہ زانت۔ آئی ءِ ڈیھ ءِ اَمبار پہ زور کشک بوگ ءَ اَنت ءُ وت گژنگ اِنت آئی ءَ ھچ سما نیست من چے ءَ گژنگ ءُ لنگڑ آں، من چے کن آں۔ ھما بلوچ کہ سندھ ءُ پنچاب ءِ نیمگ ءَ میزر اَنت آیاں ھچ سما اوں نیست کہ بلوچستان ءَ چے بیگ اِنت ءُ مئے راجی پَجّار چے اِنت۔ آ شپ روچ سندھی ءُ پنجابی ءَ وان اَنت ءُ گپ کن انت پمیشکا آیانی زبان ءِ ھما بلوچی ءِ لزت مان نیست انت بزاں بلوچی ءِ زگری گار ءُ بیگواہ اِنت۔
مرچاں بلوچ ءِ راجی پَجّار گار ءُ بیگواہ بیگ انت۔ بلوچ ءِ سر ءَ ھر پیمیں زُلم ءُکَھر بیگ ءَ اَنت پمیشکا باید انت بلوچ ءَ را تپاک ءُ یکمُشت بیگ لوٹ ایت۔ راج ءَ را وتی راجی پجار ءِ واستا آئی ءَ را بلوچی وانگ لوٹ ایت۔ البت ما وتی لوگ ءَ زگریں بلوچی ھبر کن ایں، بلوچی نبشتانک بِہ وان ایں ءُ وتی سیاد ءُ وارساں بلوچی ءَ وانین ایں۔
مرچاں بازیں تندجاہ چہ بلوچی نبشتانک ءُ نکاناں سر ریچ اَنت۔ باید انت ما اود ءَ وانگ ءِ ھیل کن ایں۔ اگاں ما وتی گوانکواں بلوچی کلیتاک ءُ سید گنج بزانت بلد ایرگیج ءُ کارمرد کن ایں پد ءَ وتی سیاد ءُ دَمگ ءِ وٹس ایپی گَلاں بلوچی ءَ نبشتہ کن ایں۔ سْیاداں گوں ھال ءُ اھوال، ھر پیمیں کلوہ ءُ پیگام یا گپرپ سرجمی ءَ بلوچی بِہ بنت۔ بزاں مارا پیسر ءَ پہ ماتی زبان ءِ دیمروئی ءَ جُھد کنگ لوٹ ایت۔ پد ءَ وھدے کہ راجی پجار مھکم ءُ ھاٹیگ بوت پد ءَ دژمن ھم چہ مئے جُھد ءَ بے وس بنت۔ پمیشکا باید انت ما بلوچ چاگرد ءِ تہ ءَ آگاھی ءَ بیار ایں ءُ بلوچ راج ءِ تہ ءِ ھمے آگاھی ءُ سرپدی بیت کہ بے زبان ءَ ما پد ءَ گار ایں۔
ھُدا بلوچاں پہ ماتی زبان ءِ وانگ ءُ نبشتہ ئِے کنگ ءَ باھند بِہ دنت ءُ بلوچ شالا سوبین بات انت۔
