چندے روچ بیت لھتیں انچیں جیڑہ ءَ دیم گوزگ ءَ انت سک باز دردناک انت بلوچ وتی ازگاریں زمین ءِ سرا پہ شُد مرگ ءَ انت انگریزانی وتساچیں سیمسر ءِ سرا بلوچانی جند ءِ زمین ءَ بلوچ ءَ را روزگار کنگ ءَ مکن کنگ بوھگ ءَ انت
چیزے روچ بیت ایران ءُ پاکستان ءِ میان ءَ وتساچیں سیمسر ءِ سرا بلوچ ءِ جند ءِ سرڈگار ءَ تہ ءَ پاکستان ءِ ناشریں ایپ سی ءَ بلوچاناں تیل ءِ کاروبار ءَ مہ کن کتگ رؤگ ءَ نیلگ ءَ انت نا آپ اِش دنت نا رؤگ ءَ کِل ایت اِش ھمے سبب ءَ سک باز بلوچ ورنا ءُ کماش چہ شد ءُ تن ءَ مرگ ءِ ارجان بوھگ ءَ انت نہ زاناں بلوچ ءِ میار چی انت اے رنگ ءَ ازابانی جنتر ءَ درشگ بوھگ ءَ انت
ھر نیمگ ءَ کہ بلوچ وتی لاپ ءِ شوھاز درے پچ کنت ناشریں پاکستان گوں وتی ناشریاں گوں ھمے در ءَ بند کنت پاکستان ءُ ایران ءِ میان ءِ وتساچیں سیمسر ءَ آ نیمگ ءَ ایران گوں وتی زوراکیاں بلوچاں تیر باراں کنان ءُ پیداک انت اے نیمگ ءَ پاکستان گوں مکر ءُ پندلاں بلوچ ءَ را مرگ ءِ امانت کتگ ءُ یل داتگ بلوچ وتی سرڈگار ءَ ھرکجا نشتگ زند ءِ ھمک جیڑھاں گوں گر ءُ چیل انت یکے شد لاپ کپتگ، یکے نادراھے یے ارجان انت بے الاجی کپتگ یکے دگہ جیڑھے دیمپان انت ھمے رنگ ءَ بلوچ ءَ پہ ھچ پش نہ کپتگ ھمک نیمگ ءَ چماں شانک دے ئے ابید جیڑہ ءُ جنجال ءَ ترا ھچ گندگ نھیت
اے گپ ءَ ھرکس زانت گلامیں راجانی ھر کجا جاور ھمے وڑ بوتگ گژن ءُ تن بزگی، لاچاری دگہ ھزاراں جیڑھانی دیمپان بوتگ انت مرچی اگاں وتی راج ءَ بچاریں اوں ھمے رنگ ءَ انت
مئے راج ءِ تہ ءَ گژنگی نہ انت بلکیں دگہ بازیں جیڑہ ھست چش مرچی اے وھد ءَ شومک ءِ دروشم نادراھے کپتگ بلوچ ورنا ءُ کماشاں گرگ انت اے وھد ءَ کسے ءَ وتی ھل ءُ جل ءَ انت کے را انچو زر ھست کہ بروت دہ بیست لک بہ دنت وتی الاج ءَ بہ کنت ھمے سبب ءَ بے زری ءَ باز مردم مرگ ءِ ارجان بوتگ من ھمے سرپد باں اے پاکستان و ءِ وتی آؤرتگیں وبا انت گژنگی بہ بیت یا نادراھی اے کُل چیزاں پاکستان پہ زانت کنگ ءَ انت دانکہ بلوچ نادراہ ءُ گژنگ ءُ بے وس بہ بیت وتی سرڈگار ءَ چہ شموش کار بہ بیت بروت گار بہ بیت پمیشکا پہ بلوچ ءَ ھمک راہ ءُ در بند کنگ بوتگ انت
