غیر جمہوری ملکانی تہ ءَ وھدے کہ لس مھلوک یا کہ یک طبقہ ئے ملک یا فوج ءِ ردیں پالیسیانی سرا ایراد(تنقید) بہ کنت ءُ لوٹ کنت کہ ملک یا ملک ءِ پوج وتی ردیں رپک ءُ پالیسی آں مٹ بہ کنت گڑا مدام اے ملکانی تہ ءَ فوج دیم ءَ کیت ءُ چشیں بیان دنت “گپ جنگ ءِ آزادی(Freedom of expression) ءِ نام ءَ مئے راجی ادارھانی ڈوباروک دژمن ءِ ایجنٹ انت ءُ راج ءِ دژمن انت”۔ دور مہ چار ات۔ ھدا داتیں پاکستان ءِ ضیا الحق و یحیی خان ءَ بہ گر داں روچ مرچی ھرچ آرمی چیف ءِ ھمک تقریر ءِ تہ ءَ ھمے گپ رنگے نہ رنگے ءَ دیم ءَ گوزیت کہ گوزیت۔ پی ٹی ایم احتجاج بکنت، لبرل تنقید بہ کن انت یا کہ بی وائی سی ریاستی جبر ءِ بگیری ءَ بکنت گڑا آ دمان ءَ اشاں “کوھنیں رپک” یا کہ “دژمنانی پندل” ءِ نام ءَ دی انت۔ ھیر پاکستان ءُ غیر جمہوری ملکانی سردار انت۔ آئی ءَ بہ گند ئے اے گپ زیب اوں دنت بلے بلوچ جہد ءِ یک مزن نامیں واکدارے (Stake holder ) ءُ کماندارے ءِ بیان منی دیم ءَ گوست کہ “آزاتی ءِ نام ءِ سرا سرمچارانی ایراد گرگ کوھنیں رپکے”۔ من ھیران منتاں کہ اے و ھما دار ءِ سر انت کہ ھدا داتیں پاکستان ءَ ھم داشتگ ءُ مئے آجوئی جھد ءِ رھشون ءَ ھم۔ بلوچ ءِ جہد پاکستانی ریاست ءِ غیر جمہوری عمل (قبضہ گیری و نا انصافی) ءِ ھلاپ ءَ یک ردعمل ئے شکل ءَ دیم ءَ اتکگ ات گڑا بلوچ جھد ءِ Standpoint بائد انت کہ “جمہوری” بوتیں بلے اے چونیں ھوپے کہ ما مدان مدان ءَ وتی دژمن ءِ رنگ ءَ جنان ایں؟
پالو پریرے ءَ وتئی کتاب Pedagogy of the opressed ءِ تہ ءَ نبشتگ: “”آزاتی یک ساھتے ءِ نام نہ انت، یکوئی سفر کنوکیں عملے کہ خود احتسابی (Self accountability)، سوال و ایراد ءَ ابید ناسرجم انت”
مئے رھشونانی رد پھمی یے اش انت کہ آ آزاتی ءَ را یک ذاتی تصورے سرپد بوتگ انت ءُ وتارا آزاتی ءِ یک ءُ تھنائیں علمبردار پمیشکا آھانی تہ ءَ اے سوچ پہ زانت یا نازانتی ودی بوتگ کہ آ ھرچی جیڑ انت ھما شر انت ءُ ھرکس کہ آھانی سوچے بگیری ءَ بہ کنت یا ایراد بہ گیپت گڑا پراھاں ھزار نام انت۔ کہ آھانی تہ ءَ یکے “دوست ناکیں دژمن” انت۔
اگاں آزادی مچانی(اجتماعی) انت گڑا تنقید کنگ ءِ حق اوں سرجمیں راج ءِ کرّا است انت۔ ڈکٹیٹرشپ ءِ ھلاپ ءَ مئے سلاہ بائدیں “جمہوری اقدار” بہ بنت نا کہ “پاکستانی ذہنیت”۔
