ہمگام بلوچی نبشتانک : 2006ءِ سال ات کہ یک ورنائے ءَ گوں دیم پہ دیم بوتاں. چوناہا ایشی ءَ پیسر بازیں دیوان ءُ نبشتانکانی تہا گوں آئی ءَ پجہ آروک اتاں بلے یک دومی ءَ گوں گند ءُ نند نہ بوتگ ات. اے پٹکیں ورنا ءَ گندگ ءَ گوں ہمے گمان ءَ بوت کہ اے سک اشتاف انت ہر کار ءَ زوت کنگ لوٹیت نزانتاں کہ اے آئی تب ات یا کہ آ وہد ءِ قدر ءَ زانتگ ات کہ وہد روت گڑا وہد ءَ دست ءَ بہ گر ءُ آئی ءَ شہ پیش ہمے کار ءَ سرجم بہ کن. شہید علی شیر کرد ءِ دست ءِ چیرا رستگیں ورنا ءَ ماتیں گلزمین ءِ رکھگ ءِ خاترہ 2003 ءَ بی ایل اے ءَ ہوار بوتگ ات شہید علی شیر کرد ءِ ہمراہی ءَ کاہان ءَ شتگ ات ٹریننگ کرتگ ات۔ ہما ات کہ وتی علاقہ ءَ دست ءُ پاد جنئگ ءَ ات۔ آ 3 مارچ 1978 ءَ رئیس کیچی خان بنگلزئی ءِگس ءَ اسپلنجی ءَ ودی بوتگ ات چیزے وہد ءَ رند آئی پس کار ءُ روزگار ءِ خاترہ مچھ ءِ شار ءَ آتگ ات ءُ ہمیدا نشت انت آ وانت ءُ 10 جماعت چہ مچھ ہائی اسکول ءَ پاس کرت رند ءَ دیمترا وانگ ءِ خاترہ بھاگ انٹر کالج ءَ داخلہ زرت ءُ 1998 ءَ بھاگ انٹر کالج ءَ شہ دوانزدہ پاس کرت آ بی ایس او ءَ گوں 1994 ءَ شہ ہمگرنچ ات کالج ءَ آ بی ایس او خیر جان گروپ ءِ تہا وتی قومی کرد ءَ پورو کنگ ءِ جہد ءَ ات چیزے وہد ءَ رند آ شہ بی ایس او خیر جان گروپ ءَ استعفی دات ءُ بی ایس او سعید فیض گروپ ءَ ہوار بوت.آئی ءَ جارات نیست ات پرچیکہ آ وطن ءَ آزات گندگ لوٹ ات ئے گڑا کش ءُ گور ءَ پارلیمانی سیاست ءِ دھول ات، وختیکہ پارلیمانی سیاست ءِ خلاف ءَ بی ایس او اللہ نظر گروپ دیم آہت آ گوں ہمیشاں ہوار بوت رند ءَ آوتی مادنین راہ ءَ بلوچ لبریشن آرمی ءَ در چت ئے
وانگ ءُ سیاست ءَ ہوار آ واپڈا ءَ سرکاری ملازم ات وتی لوگ ءَ چلائینگ ءَ ات آ واپڈا ءَ یک ہیلپر ءِ بستار ءَ کار کنگ ءَ ات تاکاری ءِ پڑ ءَ آ کساس 2006 ءَ گام ایر کرتگ ات آ مچھ ءَ روتاک آزادی ءُ روتاک توار ءِ جھگیر ات تاکبند ایلم مستونگ، تاکبند استار سوراب، ماہتاک نوائے بولان ءُ تاکبند چراگ نوشکے، ماہتاک برانز ءِ جھگیر ات اے تاکبندانی تہا آئی ءَ رپورٹ نبشتگیں سورت ءَ آئی مہروانین زند ءِ پدراہی کن انت آئی نبشتانک ءُ آئی شائری گوں ماتیں گلزمین ءَ باوری ایں مہر ءَ درشان کن انت کہ آ یکیں مردمے ات بلے بازیں کار کنگ ءَ ات وہد ءِ ترندی ءَ مارگ ءَ ات آ سرپد ات کہ وہد ءَ پیسر وتی کاراں بہ کنت ءُ آ وتی کاراں کنگ ءَ ات آئی تاکاری ءِ پڑ ءَ زوت نام ءُ توار کش ات آ 2007 مچھ پریس کلب ءِ سیکرٹری بوت ءُ ہنکس دزگٹیانی تہا آ وتی ہر کار ءُ فرض ءَ پورہ کنگ ءَ ات سلاہ بندیں آجوئی ءِ جہد ءَ وتی راجی ذمہ واریاں ہم گوں گلائش ات وتی سنگتاں سنبھالگ ءَ ات آئی پاد کدی لہڑی ءُ کچی ءَ لگت دات انت ءُ کدی شال مستونگ ءُ کلات ءَ. آبولان ءِ گٹ ءَ رستگ ات بولان ءِ تہا رستگیں کارستانی پیم ءَ عبدالعزیز کرد محمد حسین عنقا ءُ بابو عبدالرحمن کرد ءِ وڑ ءَ آ اوں ماتین گلزمین ءِ عشق ءَ شہ در کپت نہ کرت ءُ سلاہ بندیں راہ ءَ گچین کرت مچھ ءِ وتی یک تاریخی بستارے کہ اے کاروانانی راہ گوز بوتگ آئی ءَ وتی پیرینانی زبان ءَ کوہنیں کسہ اشکیتگ اتنت ءُ آ ہما دور ءُ باریگ ءِ کوہنیں جاہاں گندگ ءَ ات آ کوہ ءِ برزگاں سر کپت گڑا وتی ڈیھ ءِ تہا وترا بادشاہ یے سرپد بوت پرچیکہ آ کوئلہ ءِ سیاہی ءِ جہلانکی ءَ الماس ءِ گندگ ءَ ات ءُ آئی ءَ ماریتگ ات کہ اے کوئلہ منی ڈیھ ءَ درکپ ایت بلے منی نہ انت چاگئے ءَ تلاہ درکپ ایت بلے منی نہ انت گوادر ءِ زر منی نہ انت منی ماتیں گلزمین ءَ منا ھچ رسگ ءَ نہ انت بولان ءِ برزی ءَ برزیں ہیال سر بوت کن انت ہمیش ات کہ آ بولان ءِ سرا بال کنگ ءَ ات بولان ءِ تہا رودوکیں ورنا بولان ءِ تب ءِ پنام ءِ پہ وترا زرتگ ات آ شائرے بستار ءَ شاہین بوتگ ات آ یک شاہین ئے ات آ رحمتیں شاہین ئے ات کہ بولان ءِ کوہاں بال کنگ ءَ ات آئی ءَ وتی برزیں ھیالاں کدی جہل نیاورت آ وتی ڈیھ ءَ چو شاہین ءَ آزات کنگ لوٹ ات آئی ءِ تب ءَ شاہین ءَ جاگہ کرتگ ات ہمیش ات کہ ہر وخت چیزے چیزے بلوچ راج ءِ رکھگ ءِ خاترہ کنگ ءَ ات روچے دشمن ءِ سرا ارش روچے بلوچ ءِ گلامی ءِ کسہ ءَ وتی نبشتانکانی براہ کرت آ وطن ءِ مہر ءَ یاگی ایں شائرے ات کہ ہر وہد ءَ آئی چماں بیدے وطن ءِ مہر ءَ دگہ ہچی گندگ ءَ نہ بوت آ قلم ءِ ارزشت ءَ اوں سرپد ات ءُ توپک ءِ زور ءَ اوں زانگ ءَ ات آ یکیں وہد ءَ گوں دوئیں ہنراں کار گرگ ءَ ات آ پہک ءَ یک ملنگ تبیں انسانے ات آ گریبی ءَ رستگ ءُ مزن بوتگ ات دنیا ءِ زند ءَ گوں آزادی ءِ مقصد ءَ معنی یے داتگ ات آ یک شاہین ئے ات ءُ شاہین ءِ چم برزگ ءَ سک اتنت آ کوہانی آ دست ءَ وتی ڈیھ ءِ آزادی ءَ گندگ ءَ ات بس ہما ات کہ شہید علی شیر کرد ءِ ہمراہی ءَ آجوئی ءِ مادنیں راہ ءَ ہوار بوتگ ات وتی روچ ءُ شپ پہ راج ءَ یک کرتت شہید رحمت شاہین ءَ گوں دوچار کپتین ئے آ چیزے نہ چیزے نوکیں ھیالے دیم ءَ کاورت کہ اے کار کنگ بہ بیت آ کار کنگ بہ بیت مخلوک ءَ وتی فکر ءَ زوت سر کنگ بہ بیت ہمیش ات کہ ہر وہد ءَ پمفلٹ لوٹگ ءَ ات کہ علاقہ ءِ مہلوک ءِ تربیت ءِ خاترہ پمفلٹ المی انت اے کار کنگ بہ بیت آ کار بہ بیت زوت بکن ات وخت دست ءَ چہ روگ ءَ انت آ اشتاپ ات کہ وہد روگ ءَ انت یا مئے گام سست انت آ وتی فرض ءَ سرپد ات ءُ ہمائی خاترہ رمبگ ءَ ات. آئی کالج ءَ وانگ ءِ زند ہلاس بوتگ ات نون آ بلوچ وطن مومومنٹ ءَ بندوک ات آ سیاسی پڑ ءَ جلسہ کنگ ءَ ات مہلوک ءَ گلامی ءِ خلاف پاد کنگ ءِ جہد ءَ ات وتی قلم ءَ گوں ہر روچی ایں ھال ءَ ھالتاکانی براہ کنگ ءَ ات مہلوک ءَ زانت دیگ ءِ خاترہ مضمون نبشتہ کنگ ءَ ات شائری کنگ ءَ ات بلے شپاں آ دژمن ءَ گوں توپک ءَ جنگ ءَ ات آ یکیں وہد ءَ کلیں کاراں کنگ ءَ ات آئی ءَ چک است بلے آ لوگ ءَ سنبھالگ ءَ ہوار وتی راجی ذمہ واریاں ہر پڑ ءَ پورہ کنگ ءَ ات. کہ دژمن ءِ بدیں چم بہ آئی ءَ کپتگ اتنت ءُ آئرا آئی ایس آئی ءِ کارندہ 8 دسمبر 2009ءَ دزگیر کرت انت کہ آ مچھ گریڈ اسٹیشن ءَ وتی کار ءَ روگ ءَ ات آ داں چیزے وہد ءَ گار ءُ بیگواہ بوت آ دشمن ءِ زندان ءَ وتی مھکمیں فکر ءَ گوں دشمن ءَ دیم پہ دیم ات یک تاکارے پدا زندان ءَ چہ آجو بوہگ ءِ اومیت آں زندگ ات. چیزے وہد ءَ رند آئی ایس آئی ءَ آئی سرا بغاوت ءُ بمب تراک ءِ کیس جتگ ات ءُ پولیس ءِ دست ءَ داتگ ات. آ وتی کیساں گوں دیم پہ دیم ات. سبی جیل ءَ چار ماہ ءَ رند عدالت ءَ چہ آئی کیس ہلاس بوت انت آ پدا آزاتیں شکاری یے ات پدا بولان ءِ سرا بال ات زندان ءَ رند اوں آ وتی کلیں ذمہ واریاں پورہ کنگ ءَ ات دشمن ءِ چم آئی ءَ سک اتنت آ اوں دشمن ءِ پرواہ ءَ نہ ات آ دشمن ءِ زوراکی ءَ دیستگ ات بلے آ پشت ءَ نہ کنزاتگ ات آ انچش وتی کاراں گلائش ات. آ دشمن ءِ ھلاپ ءَ وتی نبشتانک آں یکشل ءَ نبیسگ ءَ ات آ ماتیں گلزمین ءَ چہ دشمن ءِ سانکلاں پروشگ ءِ جہد ءَ ات. کہ دژمن ءِ بدیں چم آئی ءَ سک اتنت ءُ آ وتی سیاد رسول بنگلزئی ءَ گوں 12 مارچ 2011 ءَ ڈھاڈر ءَ چہ پیداک ات کہ نیم راہ ءَ آئی ایس آئی ءِ کارندھاں آواں آوار جت انت بولان ءِ شاہین گوں وتی سنگت عبدالرسول بنگلزئی ءَ گار ءُ بیگواہ ات آ اے رندی پدا زندان ءِ سکیاں سگگ ءَ ات دشمن ءَ آئی یک رندے یلہ داتگ ات بلے اے رندی دژمن آئی مھکمیں فکر ءَ سرپد ات ماتین گلزمین اوں وتی مہروانین بچ ءِ خاترہ زہیری ات ءُ آ اوں 1 اپریل 2011 ءَ وتی کپ کپیں جان ءَ گوں ماتین گلزمین ءِ ریکاں ہوار بوت گلزمین ءِ شاہین پہ مدامی جتا بوتگ ات آ گلزمین ءِ رکھینگ ءِ وتی ساہ داتگ ات بلے آئی ہیال مارشت نبشتانک سوچ ءُ فکر داں ابد منتگ اتنت آ بولان ءِ گر ءُ گٹانی برزی ءَ گوں وتی پاکیں ھیالاں گندگ بیت آئی مارشت ءُ فکر چو بولان ءِ کہور ءَ پہ مدامی تچان انت. بولان ءِ ہر ول آئی مھکمیں فکرے ءَ وتی سینگ ءَ ایر کرتگ ءُ راجدپتر ءَ زندگ داشتگ.
