دومی بہر
نبشتانک۔ ۔ شبیر نور
دسمبر 2011 ءَ بی این ایل ایف ءِ کماندار محمد بکش جگو ءَ یعقوب بالگتری گشیت بیا منشیاتءِ مزنیں بارے چہ مئے ہنکین ءَ گوزگا اِنت، گڑا محمد بکش جگو وتی ہمراہاں شؤر کنت کہ ما رویں منشیات ءِ اے بار ءَ پُل ایں کہ بی این ایل ایف ما نوک اڈ کتگ اشی ءِ واستہ مارا وتی مالی سسٹم شر کنگی اِنت ءُ گواجن الّمی انت۔
بی این ایل ایف ءِ سربراہ ماسٹر سلیم ءُ شہید امین بادشاہ ءِ سنگتے اشکنگا آ وہدءَ رازیگ نہ بنت ءُ گشنت کہ چشیں کار مکن اِت، ماسٹر ءُ ہمے سنگت اشاں گشنت کہ مرو اِت، اگاں روئے شما وت زان اِت، ما شمارا داشت ہم نہ کنیں شما وتی گیگ ءَ بچار اِت۔
گڑا ماسٹر سلیم ءُ آ سنگت نہ رونت گوں۔
بلئے جگو شہید امین بادشاہ ءَ زوریت گوں 9 کسّ ءَ روت بالگترءَ، ہمودا ڈنے ءِ سرا لہتے پرشتگیں کوہنیں کوٹی است ہمودا دارنت۔ یعقوب بالگتریءَ رابطہ کننت کہ بیا ما فلاں جاگہ ءَ داشتگ، گڑا یعقوب گشیت من تُربَتءَ الّمی کارےءَ اتکگاں، شما بجل ات من کایاں، من دو مردم راہ دیاں شمارا نپاد،ورگ ءُ سامان آسراتی دیئنت۔ یعقوب مردم دیم دنت اشانی آسراتیاں سر کننت ءُ پدا درکاینت۔
دومی شپ ءَ فوجءَ راہ دنت فوج اشاں اَنگِرّ کنت، دوئیں نیمگاں جنگ بیت، امین بادشاہ گوں سنگتاں جنگءَ داریت، جگو ءَ گشنت کہ کماش تو وتا کشّ۔ جنگ برجاہ بیت، شپ ءَ جگو گوں دوسنگتءَ درکپیت۔
اے جنگ ءَ امین بادشاہ داں بانگواہ ءَ داریت ءُ رندا شہید بیت۔ جگو ءِ چُک بیبگر ءُ برازتک شیہک ہمے جنگءَ شہید بنت، شہید بالاچ بابو ، شہید خلیل نگوری، شہید حسن نگبت ہم ہمے جنگءَ شہید بنت۔
6 ورنا گوں امین بادشاہءِ وڑیں زْرِنگیں فکری ءُ کارآمدیں جنگولیں سنگتے بے پائدگیں کاروائی یےءَ شہید بوتنت ۔
شہید امین بادشاہ ہما کردار بوتگ کہ آئی ءَ بی ایل اے، بی ایل ایف، بی آر اے ءُ بی این ایم، درستیں گَلانی واستہ یکیں وڑا گران بہائیں کربانی داتگ ءُ پہ درستیں گلاں یک ہساب ءَ مہکمیں باسکے بوتگ، آئیءِ جتائیں، مزنیں کردارے بوتگ۔ شہید واجہ گلام محمد ءِ نزیکتریں فکری سنگتے بوتگ ءُ شہید سگار امیربکش ایڈووکیٹ ءُ شہید مجید دومی ءَ بگر داں ڈاکٹر اللہ نزر ءُ شہید ڈاکٹر منانءَ یا اے دگہ سروکیں رہبر ءُ کماندار درستانی گوما نزیک بوتگ ءُ درستانی ہمراہداری کتگ ے۔
بالگتر ویلءِ دومی روچ ءَ محمد بکش جگوءِ سرا اخترندیم فون کنت کہ تو اگاں جاگہے نگیگ ئے، گڑا من تئی کُمکءَ مردم راہ دیاں۔ جگو گشیت اناں، من درکپتگاں مردماں منا دست گپتگ۔
ہمے یعقوب بالگتری کہ سنگتاں شہید کنائینیت بی این ایل ایفءِ جوڑ بؤگا پیسر محمد بکش جگو ءُ بی ایل ایفءِ ایدگہ کماندار ءُ سرمچارانی سنگت بوتگ، اشیءِ لوگءَ سنگت پیسرا ہم شتگ انت۔
ہمے وہدءَ یک تواربندے ہم سوشل رسانکدرءَ شنگ ات کہ بی ایل ایفءِ کمانڈرے بَلّک گوں ہمے یعقوبءَ گپءَ انت ءُ اشانی رازداریں مردمے۔
رندا یعقوب بالگتری گوں شش ہمراہءَ بی ایل ایفءَ وت جت ءُ کُشت۔
اے منشیاتءِ لُٹ ءُ پُلءِ دْرِچ چِداں ہلاس نہ بیت، بلکیں گیش ودّینگ بیت۔
پدا پروم ءَ سیٹ وارث نامیں منشیات فروشے ءِ منشیاتانی برگءِ واستہ بی آراے ءِ سنگت رونت، بلئے ہمے ہنکین ءَ بی ایل ایف ءِ سنگت ہم ہمودا بنت، اشاناں ہم ہمے ھال گیپت، گڑا بی ایل ایف ءُ بی آراے والا اے منشیاتانی گرگءَ ہور بنت۔ چار گاڑی منشیات بنت کہ اشانی تہا مورفین، تریاک، چرس ءُ دگہ مواد بنت۔
سیٹ وارثءِ چک کہ مالانی ہمراہی ءَ گون بیت، اڑی کنت کہ من مالاں نہ دیاں، گڑا سرمچار سیٹ وارثءِ چک ءَ کُشنت ءُ مالاں برنت۔
بی آراے ءِ گوستگیں باسکے گشیت کہ اے وہد ءَ من بی ایل اےءِ اوتاکءَ بوتگاں، بلئے بی آر اےءِ باسک بوتگاں، من گوں بی ایل اےءِ سنگتاں اے عملءِ مزمت کتگ کہ اے شرّیں عملے نہ انت، باید انت اے وڑ مہ بیت، بلئے بی آر اے ءُ بی ایل ایف ءِ سنگتاں مئے گپ نہ زرتگ۔ گشتگ اش کہ گَلءِ مالی سسٹم ءَ شر کنیں۔
رندا ہمے زرّ وت ماں وتا بہر ءُ بانگ بوتگ انت ءُ پدا اڑی کُڑی ءُ پرشت ءُ پروش ہم بوتگ۔ بی آراے ءِ ولی خان بگٹی ہم ہمے وہد ءَ گون بوتگ، گشتگ ے اے شریں عملے، جوانیں کارے، رندا ہمے واجہ کار وت سرنڈر بوتگ۔
(روان انت)
