ہمگام بلوچی نبشتانک (سیمی بہر)
2015ءَ چہ پسنیءَ کسانیں کاروبار کنوکیں بلوچے آوار جنئگ بیت۔ آوار جنئگءِ چیزے روچءَ پد، آوار جنوک چہ ہمے مردمءِ کہولءَ زرّءِ لوٹ کن اَنت کہ شمئے مردم مئے کرّا انت، اگاں شما آئیءِ جان سلامتیءَ لوٹ اِت، گڑا مارا اینچو زرّ سربکن ات۔
من نزاناں، اے مردم بنداتءَ چینچو زرّ لوٹ انت، بلئے رندا چلّ لکءَ رازی بنت۔
ہمے آوار جتگیں مردم ءِ ھاندان ءِ مردم وام ءُ شام کن انت، چیزے زرّ وت ماں وت یکجاہ کن اَنت، لوگءِ دپءَ گاڑی یے بیت، آئیءَ اوں بھاکن انت، اغوا کاراں چلّ لکّ کلدار سر کن انت، رندا آہانی مردم یلہ کنگ بیت۔
مردم ترس انت کہ اگاں زرّاں سرمہ کنیں، چومہ بیت کہ مئے مردم گدّاریءِ بُھتامءَ جنئگ ءُ چگل دئیگ بہ بیت، پرچاکہ چد ءُ پیسر انچو ہمیشانی مردمے برگءُ جنئگ بوتگ۔
یلہ کنگءَ پد، اے مردم جست ءُ پرس، پٹ ءُ پول کن انت، گڑا اشاں سرپدی رسیت کہ بروک خلیل موسیٰ ءِ مردم انت۔۔
بی این ایمءِ تہا اشانی مردم بیت، اے مردم گڑا پارٹیءِ مردماں کلوہ ءُ کاسد کن انت کہ شما مردم برگءَ وا برتگ، زرّ گپتگ ءُ یلہ داتگ، پہ بلوچءَ چد ءُ مستریں کم شرپی نیست، بلئے نوں ھداءِ دوستیءَ ہمے زرّاں مارا پدا بدی اِت، پرچا کہ اے زرّانی کمائینگ ارزان نہ انت ءُ اے زرّانی واستہ ما وتی شپءُ روچ یک کتگ انت ءُ لہتے زرّ وام ءُ شام ہم کتگ۔
یک برے پارٹیءِ مردم نہ منّ انت، بلئے رندا ثبوتانی دئیگا پد منّ انت ءُ گش اَنت کہ ما شمئے زرّاں واتر کنیں، بلاہیں مُدتےءِ گوزگا پد اوں داں روچء مرچی آ زرّ پدا دئیگ نہ بوتگ انت۔
اسر مندیں لوگءِ مردم انگہ پہ زرّانی پد جنئگ ءَ سُہل ءُ تران ءُ گپّءَ تیار اَنت، بلئے آ ہمے گُشگا اَنت گَلءِ ہائی کمان ءُ زمہ داریں سروک اے زِمہءَ بزور اَنت کہ پدا مئے ھاندانءَ دگہ تاوانے نہ دینت۔
اے گَلءِ باسک ءُ دوزاہیں مردمانی ھال انت کہ آیاں گَلءِ سروک زرّءِ واستہ چست کن انت ءُ براَنت زرّ گِراَنت۔ نوں ہما مردم کہ آئیءَ یا آئیءِ مردماں گوں سیاسی ءُ سلاہ بندیں گلانی گوما نزیکی یا رابطہ نیست، چُشیں ویلے بہ گیپت اش، آیانی جیڑہ چوں گِیشّ انت؟
اے ویلءَ پد اوں ہمے مردمانی دگہ نامداریں ماہیگ ءِ کاروبار کنوکیں سیٹےءِ چُکّ برتگ، زرّ گِپتگ ءُ یلہ داتگ۔
ہمے ہسابءَ بی این ایمءِ شہید واجہ گلام محمدءِ دورءِ دوزواہ ءُ کُمک کارے بی آراے والا آوار جن اَنت، اے ھم 2015ءِ سال بیت، جولائیءِ ماہ بیت، چہ دشتءَ سیادی داروکیں ہمے دوزواہیں واجہ کار کہ گوادرءِ نزیکءَ آئیءَ روڈءِ گونڈیں ٹیکہے گون بیت، چست کنگ بیت۔ چست کنوک آئیءَ 10 لکّ کلدار گِراَنت ءُ یلہ دینت۔
رندا اغوا کنوک پدّر بنت کہ آ ہما دَورءِ بی آر اےءِ نامداریں کماندارے ءُ آئیءِ ہمراہ بنت۔
ہمے ٹیکہ دار شہید واجہءِ دوستیں مردمے بوتگ ءُ بی این ایمءِ کْوہنیں دوزواہے بوتگ، سیاسی سنگت باز رندا کُمک ہم کتگ انت ئِے۔
رندا کہ واجہ کار یل دئیگ بیت، کماشیں مردے بیت، سک پریشان بیت ءُ مردمانی کرّا ہمے سرمچارانی سرا مدام اپسوز کنت ءُ ہمے گپ ءَ دل ءَ کاریت کہ منی وڑیں کماشیں مردمے اشاں آوار جت ءُ کم شرپ کت، من شمئے دوزواہے بوتگاں، شما انچو کلوہے رہ بداتیں من وتی گنجائشءَ شمارا چیزے داتگ ات۔
مردکار ہمے پریشانی ءُ غم ءُ وسواسءِ تہا، آوار جنئگ ءُ یلہ بؤگءِ دو ماہءَ رند 6 ستمبر 2015 دلءِ دؤرہءِ سببءَ بیران بیت۔
چشیں دوزواہیں مردمے مپتء ناھکّءَ اشاں دلترک کت ءُ کُشت، اے مَرکءِ زمہ دار ہم ہمے سنگت اَنت۔
اے اغوا برائے تاوانءِ دْرچ ہمے وڑا برجاہ اِنت، وھد پہ وھد بازیں بیگناہیں کاروباری ءُ بے کاروباریں مردم ہمے وڑا چست کنئگ ءُ زر گِرگا پد یل دئیگ بنت۔
ہمے وڑا پدا چہ روکپتی بلوچستانءِ دمگ بمپشت ءَ یک بلوچ کاروباری مردمےءِ چُک چست کنئگ بیت ءُ چہ آئیءَ مزنیں زرّے ءِ لوٹ کنئگ بیت۔ اے مردم جست ءُ پرس کن انت ءُ وتی عرض ءُ پریاتءَ بی ایل اے آزادءِ کرّا سر کن اَنت۔
رندا سرپدی رسیت کہ اے گونڈو خلیل موسیٰ ءِ گروپءَ چست کتگ، گڑا بی ایل اے آزاد اے ویلءِ تہا دزمانجنی کنت ءُ خلیل موسیٰ ءِ کرّا ہمے گونڈوءَ پچ گرائین اِیت ءُ یلہ کنائین اِیت۔
(روان اِنت)
