بلوچ راج ایران ءِ زورگیپتیں بلوچستان ءَ چہ صدارتی گچین کاری ءَ دور بہ بیت ءُ اے گپ ءَ بہ منارین ایت مارا گوں ایرانی گچینکاریاں ھچ سیادی نیست۔ایپ بی ایم

لندن (ھمگام نیوز) پری بلوچستان مومنٹ ءَ وتی شنگ کتگیں درشان ءِ تہ ءَ گْوشتگ کہ ایران ءِ صدر ءِ گچینکاری ءِ وھد ءَ آ ایران ءِ زورگیپتیں بلوچستان ءِ بلوچ گچین کاری ءِ عمل ءَ بائیکاٹ بہ کن اَنت ءُ دگنیا ءَ اے گپ ءَ پدّر بہ کن اَنت کہ بلوچ نا آئی بھر بوتگ نا بیت

بیان ءِ تہءَ گشگ بوتگ کہ زورگیپتیں بلوچستان ءَ زورگیریں ایران ءِ صدارتی گچین کاری ءِ وھد ءَ ووٹ ءِ بدلی ءِ درسد کمتر بہ بیت دنیا ءِ دیم ءَ اے گپ گیشتر پدر بیت کہ بلوچ کدی ایرانی ریاست ءِ بھر نہ بوتگ انت بلکیں زوراکی ءِ وسیلہ ءَ ایران ءِ زیردست بوتگ ءُ مزنیں مدتے بیت بلوچ راج وتی زلم ءُ زوراکیانی چیر ءَ داشتگ ئے۔

بیان ءِ تہ ءَ دیمتر ءَ گوشتگ ئے کہ ایران ءِ زلم ءُ زوراکی ءِ ھلاپ ءَ توار چست کنگ ءُ وتی راجی پرز ءِ پیلو کنگ ءِ یک راہ ءُ درے ھمیش اِنت کہ بلوچ راج زورگیریں بلوچستان ءَ زورگیریں ایرانی گچینکاریانی بائیکاٹ بہ کنت زورگیریں ایران ءَ ھرکجا بلوچستان ھوناں رنگیں کتگ ءُ ھمک روچ بلوچ ءِ چکچینی ءُ کم شرپی کنگ بوھگ ءَ انت، بلوچ ءِ کم شرپی واکیہ اود ءَ ریکارڈ کنگ بوگ ءَ اَنت بلے پہ بلوچ راج ءَ سیاسی آجوئی ھم پُلگ بیتگ اَنت۔ بلوچ گوں وتی راجی ءُ دودمانی دروشم ءَ زندگ بوت نہ کنت ءُ آیاں ایشی ءِ ھلاپ ءَ توار چِست کنگ ءِ ھک ھم دیگ نہ بیت۔

آئی ءَ گوشت کہ بلوچستان ءِ سرزمین ءِ سر ءَ ایران ءِ ھاکمی ءِ سانکلاں سندگ ءُ یک آزات ءُ آزاتیں سرزمینے ءِ گرگ ءِ واستا اے گپ ءِ سرپد بوھگ المی اِنت کہ زورگیریں گیریں ایران ءُ بلوچستان ءِ سیادی ایوک ءَ پہ زور زوراکی ءُ ھاکمی ءَ گوں ءَ بندوک اِنت. اے سیادی ایران ءِ زوراکیں سرکار ءِ زوراکی ءِ بنیاد ءَ جوڑ کنگ بوتگ۔

بیان ءِ آسر ءَ گشگ بیتگ کہ زور گیریں ایران ءِ ھرچ وڑیں انتظامی پابندی ءُ ووٹ دیگ ءَ چہ وت ءَ رکّینگ بلوچستان ءِ زورگیپتی ءِ ھلاپ ءَ بے تواری ءِ زھرشانی ھساب اِنت۔ ایران ءِ صدارتی گچین کاری ءِ عمل ءَ بائیکاٹ کنگ ءَ دنیا ءَ باوری دات کنت کہ بلوچ راج ایران ءِ دست ءَ پہ زور دزگیر کنگ بوتگ ءُ بلوچ راج چہ اے گلامی ءِ سانکلاں سندگ لوٹ ایت یک آزات ءُ آزاتیں ریاستے ءِ تہ ءَ نندگ لوٹ ایت۔ اے گپ ءَ ابید چہ گچینکاری ءِ عمل ءَ دور دارگ ءُ زورگیپتیں بلوچستان ءِ تہ ءَ گچینکاری ءِ عمل ءِ سست بوھگ ءَ چہ دنیا ءَ اے گپ پدر بیت کہ بلوچ ایران ءِ انکلیو ءِ تہ ءَ بس یک زورگیپتیں راجے کہ ابرمی رنگ ءَ زور گیریں ایران ءِ زلم ءُ زوراکیانی آماچ اِنت۔ ایران گوں تھنا مئے سیادی زلم ءُ زوراکی ئیگ انت دگہ ھچ نیست۔

اے گپ یات بہ بیت کہ زور گیریں ایران صدر ءِ بیرانی ءَ پد پد ءَ ایران ءَ گچینکاری بوگ ءَ انت کہ اود ءَ نوکیں صدرے گچین کنگ بیت بلے ایران ءِ سرکار ءِ واھگ انت کہ اے گچینکاری بلوچستان ءَ کجام رنگ ءَ سوبمند بہ بیت دانکہ دگنیا ءَ اے باور بہ کنت کہ بلوچ راج ایرانی رژیم ءِ تہ ءَ نندگ لوٹ ایت ءُ اے گچینکاری 28 جون ءَ بوھگ ءَ اَنت۔