ترجمہ: آزاد میڈیا
بلوچستان کا معاملہ: ایران، پاکستان اور چین کے ہاتھوں میں ایک اسٹریٹیجک خطہ
بلوچ اپنے وطن میں دبائے اور استحصال کیے جا رہے ہیں۔ چین گوادر کو ایک “چینی کالینین گراڈ” میں تبدیل کرنے کا ارادہ رکھتا ہے، جو ایک فوجی اڈہ ہوگا جس سے وہ ہرمز اور بحر ہند پر تسلط جما سکے گا۔
جب سے اسرائیل 7 اکتوبر کے بعد حماس اور حزب اللہ کے خلاف جنگ میں شامل ہوا ہے، حالانکہ عسکری لحاظ سے اسرائیل کو برتری حاصل ہے، مگر میڈیا کے میدان میں یہودی ریاست کو شدید نقصان پہنچا ہے کیونکہ ایران کی حمایت یافتہ دہشت گرد تنظیمیں مغربی ممالک میں آسانی سے یہ تاثر پیدا کر رہی ہیں کہ متاثرہ کو حملہ آور کے طور پر پیش کیا جا رہا ہے۔
ایران، جو دہائیوں سے اسرائیل کو ایک قابض ریاست کے طور پر پیش کر رہا ہے، اپنے ہی ملک میں مختلف اقوام کے ساتھ بہت ظالمانہ طریقوں سے نمٹتا رہا ہے؛ اس کا سب سے زیادہ شکار بلوچ قوم ہے، جن کا تاریخی علاقہ آج ایران، پاکستان، اور افغانستان میں تقسیم ہو چکا ہے، لیکن اس کے باوجود وہ اپنی قومی آزادی کے حصول کی جدوجہد سے کبھی دستبردار نہیں ہوئے۔
بلوچستان کے بارے میں مزید سمجھنے کے لیے، جو کہ عوامی بحث میں کم ہی زیر بحث آتا ہے لیکن جنوبی ایشیا کے جغرافیائی توازن کے لیے بے حد اہم ہے، ہم نے حیربیار مری کا انٹرویو کیا، جو فری بلوچستان موومنٹ کے رہنما ہیں، مقبوضہ بلوچستان پاکستان میں پیدا ہوئے لیکن آج لندن میں سیاسی پناہ گزین کی حیثیت سے جلاوطنی کی زندگی گزار رہے ہیں۔
بلوچستان کی تقسیم
ناتھن گریپی: کیا آپ براہ کرم اس علاقے اور اس کے باشندوں کی تاریخ ہمیں بتا سکتے ہیں؟
حیربیار مری : تاریخی طور پر قدیم یونانیوں کے لیے یہ “گیدروسیا” کے نام سے جانا جاتا تھا، بلوچستان، جس کا مطلب “بلوچوں کی زمین” ہے، ایک ایسا ملک ہے جو طویل عرصے سے جنوبی ایشیا اور مشرق وسطیٰ کے درمیان ایک اسٹریٹیجک راستے پر واقع ہے۔ یہ خشک صحراؤں اور سنگلاخ زمینوں پر مشتمل ہے، اور یہ وہ جگہ ہے جہاں سکندر اعظم کو ہندوستان سے فارس واپسی کے دوران اپنی فوج کا تین چوتھائی حصہ کھونا پڑا ۔ بلوچ لوگ زیادہ تر بلوچی زبان بولتے ہیں، جو ایک ہند یورپی زبان ہے اور قدیم ماد اور پارتی زبانوں سے گہرا تعلق رکھتی ہے۔
بلوچستان نے اپنی علاقائی وحدت کو 1839 میں برطانوی سلطنت کی طرف سے حملے اور قبضے تک برقرار رکھا۔ جدید قومی ریاستوں جیسے اٹلی اور جرمنی کے اتحاد سے بہت پہلے، بلوچستان ایک متحدہ حیثیت میں موجود تھا۔ تاہم، 1839 میں برطانوی فتح کے بعد، ملک کو منظم طریقے سے تقسیم کیا گیا۔ 1871 میں اس کا مغربی حصہ فارس (موجودہ ایران) میں شامل کیا گیا؛ 1893 میں شمالی علاقہ افغانستان کے حوالے کیا گیا؛ اور مشرقی حصہ نیم آزاد رہا۔
یہ تقسیم بلوچ عوام کی مرضی کے بغیر مسلط کی گئی، جس نے ایک مرتبہ متحدہ ملک کو ٹکڑوں میں بانٹ دیا اور اس کے علاقوں کو پڑوسی ریاستوں کے حوالے کر دیا۔ برطانوی دور میں بلوچستان کا یہ تقسیم پولینڈ کی جرمنی اور روس کی جانب سے دوسری جنگ عظیم کے دوران تقسیم سے مشابہ ہے، لیکن فرق یہ ہے کہ بلوچستان کو اس کے مبینہ اتحادی، برطانوی سلطنت، نے دھوکہ دیا۔
دوسری جنگ عظیم کے بعد، ایشیا کو نوآبادیاتی تسلط سے آزاد کیا گیا اور برطانوی سلطنت نے ہمارے علاقے سے پسپائی اختیار کی۔ بلوچستان کا مشرقی حصہ اور ہندوستان آزاد ہو گئے، لیکن ہندوستان کو بھی مذہب کے نام پر تقسیم کیا گیا، جس کے نتیجے میں پاکستان کا قیام عمل میں آیا۔ پاکستان ہندوستان اور افغانستان کے علاقوں پر قائم کیا گیا۔ ہندوستان کے ساتھ ساتھ، اس کی فوج – برطانوی ہندوستانی فوج، جو 1945 میں انسانی تاریخ کی سب سے بڑی فوج تھی – کو بھی تقسیم کر دیا گیا۔
پاکستان کو ستمبر 1947 میں اقوام متحدہ میں شامل کیا گیا۔ اقوام متحدہ کے رکن کے طور پر پاکستان کے پہلے اقدامات میں سے ایک اس کے بانی چارٹر کی خلاف ورزی کرتے ہوئے بلوچستان پر حملہ کرنا اور اسے طاقت کے زور پر ضم کرنا تھا۔ بلوچستان صدیوں تک ایک متحد اور آزاد ریاست کے طور پر موجود رہا، یہاں تک کہ برطانیہ نے اسے تقسیم کر دیا اور پھر پاکستان نے غیر قانونی طور پر اس کا الحاق کر لیا۔ بلوچ قوم نے کبھی بھی بلوچستان کی تقسیم اور غیر قانونی قبضے کو قبول نہیں کیا۔
ناتھن گریپی: 2022 میں مہسا امینی کے قتل کے بعد، ایران میں بلوچ اقلیت نے بھی حکومت مخالف مظاہروں میں حصہ لیا…
حیربیار مری : سب سے پہلے، چند کلیدی نکات کو واضح کرنا ضروری ہے: سب سے پہلے، بلوچ کوئی اقلیت نہیں ہیں، بلکہ وہ ایک قوم ہیں جن کی اپنی منفرد ثقافتی شناخت، زبان اور تاریخ ہے۔ دوسرا، بلوچ اپنی آبائی سرزمین میں رہتے ہیں، جہاں وہ ہزاروں سال سے اکثریت میں رہے ہیں۔
اس نقطہ نظر سے، بلوچوں کی صورتحال کا موازنہ یورپ کے ساتھ اس وقت کیا جا سکتا ہے جب نازی جرمنی نے قبضہ کر رکھا تھا۔ جب نازی فورسز نے 20ویں صدی میں یورپ کی خودمختار ریاستوں پر قبضہ کیا، تو کیا فرانس کے لوگ، جو اس قبضے کے خلاف مزاحمت کر رہے تھے، “جرمنی میں ایک فرانسیسی اقلیت” کہلائے؟ یا کیا پولینڈ کے لوگ جو جرمنی کے قبضے میں تھے، اچانک “نازی جرمنی میں ایک پولش اقلیت” کہلانے لگے؟ بالکل نہیں۔
اب تصور کریں اگر فرانس، جس کی آبادی تھوڑی زیادہ ہو، اٹلی پر قبضہ کر لے اور اس پر کنٹرول کر لے۔ کیا ہم اطالوی عوام کو صرف اس وجہ سے “اقلیت” کہیں گے کیونکہ فرانسیسی ریاست، جو قابض ہوگی، انہیں اپنے نئے حدود کے اندر تعداد میں پیچھے چھوڑ دے گی؟ اس مفروضے کی غیر معقولیت اس منطق کو واضح کرتی ہے جس کے تحت بلوچوں کو ان کی اپنی سرزمین میں اقلیت کہا جاتا ہے۔
ایک تاریخی قوم جیسے بلوچوں کو اقلیت نہیں کہا جا سکتا۔ بلوچ ایران میں اقلیت نہیں ہیں، بلکہ ایک قوم ہیں جو ایرانی قبضے کے تحت ہیں اور اپنی آزادی کے لیے فعال طور پر جدوجہد کر رہے ہیں۔
ایران میں بلوچوں کی حالت
ناتھن گریپی:عام طور پر، ایران میں بلوچوں کے ساتھ کیسا سلوک کیا جاتا ہے؟
حیربیار مری: ایران میں حالیہ واقعات اس جاری جدوجہد کو واضح کرتے ہیں۔ 16 ستمبر 2022 کو ایران اور مقبوضہ علاقوں میں مظاہرے پھوٹ پڑے، جب ایرانی پولیس نے ایک کرد خاتون جینا امینی کا ناحق قتل کیا۔
ان کا نام بھی جبر کی علامت تھا: ان کا اصل کرد نام، جینا، کو “مہسا” جیسے نوآبادیاتی نام سے بدل دیا گیا تھا، کیونکہ ایران میں بلوچوں، کردوں، عربوں، اور ترکوں جیسی قوموں کو اپنے روایتی نام استعمال کرنے کی اجازت نہیں ہے۔ یہ مزاحمت کا عمل بلوچوں کے دل میں گہرائی سے اتر گیا، جنہوں نے نہ صرف جینا امینی کے ساتھ یکجہتی کا اظہار کیا بلکہ اپنی سرزمین میں کیے گئے ظلم و ستم کے خلاف بھی آواز اٹھائی۔
1 ستمبر 2022 کو چابہار میں ایک 15 سالہ بلوچ لڑکی، ماحو، کو ایرانی پولیس کے ایک اعلیٰ افسر، کرنل ابراہیم کوچکزائی، نے زیادتی کا نشانہ بنایا۔ اس جرم کے خلاف احتجاج کرتے ہوئے بلوچ سڑکوں پر نکلے اور نہ صرف ماحو کے لیے انصاف کا مطالبہ کیا بلکہ ان طویل مظالم کے خلاف بھی احتجاج کیا جو ایران کی جانب سے ان کے ساتھ روا رکھے جا رہے ہیں۔
30 ستمبر 2022 کو زاہدان میں جمعہ کی نماز کے دوران ایک پرامن احتجاج قتل عام میں بدل گیا، جب ایرانی انقلابی گارڈز (IRGC) نے وحشیانہ کریک ڈاؤن کرتے ہوئے ایک گھنٹے میں 100 سے زائد بلوچ شہریوں کو قتل کر دیا، جن میں خواتین اور بچے بھی شامل تھے۔ سیکڑوں زخمی ہوئے، جن میں سے بہت سے مستقل معذوری کا شکار ہو گئے۔ یہ حملہ “خونی جمعہ” یا “زاہدان کا قتل عام” کے نام سے جانا جاتا ہے اور بلوچوں کی اجتماعی یادداشت میں ایرانی قبضے کے خلاف ایک اور باب کے طور پر درج ہے۔
ظلم و ستم زاہدان تک محدود نہیں رہا۔ احتجاج کا سلسلہ خاش شہر تک پھیل گیا، جہاں ایرانی افواج نے دوبارہ مظاہرین پر فائرنگ کی، جس سے مزید زندگیاں ایرانی قبضے کی بربریت کا شکار ہوئیں۔
ایران نے اپنے عدالتی نظام کو بھی بلوچوں کو نشانہ بنانے کے لیے استعمال کیا ہے، انہیں منشیات کے جرائم یا “محاربہ” (یعنی خدا کے خلاف جنگ) جیسے الزامات میں پھانسی دی جاتی ہے۔ یہ مقدمات اکثر خفیہ عدالتوں میں چلائے جاتے ہیں، جہاں ملزمان کو مناسب قانونی نمائندگی سے محروم رکھا جاتا ہے۔ اگرچہ بلوچ ایران کی کل آبادی کا صرف 5 سے 8 فیصد ہیں، لیکن وہ ملک میں ہونے والی پھانسیوں کا 20 فیصد حصہ بنتے ہیں، جو اس قوم کے ساتھ ہونے والے غیر متناسب اور منظم ظلم و ستم کو مزید اجاگر کرتا ہے۔
چین ایک دشمن ہے
ناتھن گریپی: گزشتہ چند برسوں میں چین نے پاکستان کے ساتھ بلوچستان کی قدرتی وسائل سے فائدہ اٹھانے کے لیے معاہدے کیے ہیں۔ اس پالیسی کا مقامی آبادی پر کیا اثر پڑا ہے؟
حیربیار مری: میں نے اکثر اپنی گزشتہ انٹرویوز میں چین کو بلوچ قوم کا دشمن قرار دیا ہے۔ یہ صرف ایک جذباتی بات نہیں، بلکہ ایک سخت حقیقت ہے جو چین کی مسلسل پاکستان کی حمایت سے جنم لیتی ہے، خاص طور پر بلوچوں کی قومی آزادی کی جدوجہد کو دبانے میں۔ چین کا کردار صرف معیشت تک محدود نہیں ہے؛ یہ جغرافیائی سیاست، وسائل کے استحصال، اور ایک قوم کے آزادی کے حق کو دبانے پر مشتمل ہے۔
چین کی عالمی حکمت عملی، جو اس کی معاشی طاقت سے تقویت پاتی ہے، آزاد دنیا پر اپنی بالادستی مسلط کرنے کی کوشش کرتی ہے۔ اس سلسلے میں چین کا سب سے اہم ہتھیار “بیلٹ اینڈ روڈ انیشی ایٹو” (BRI) ہے، جو ایک ایسا منصوبہ ہے جس کے ذریعے چین تجارتی راستوں اور انفراسٹرکچر کے نام پر اپنے طویل مدتی اسٹریٹیجک مفادات کے لیے فوجی اڈے قائم کر رہا ہے۔
وسائل کا استحصال
بلوچستان میں یہ منصوبہ “چین-پاکستان اقتصادی راہداری” (CPEC) کے ذریعے نافذ کیا جا رہا ہے۔ پاکستان اور چین کے درمیان یہ معاہدہ بلوچستان کے قیمتی وسائل کے استحصال کا ایک سوچی سمجھی منصوبہ بندی ہے، جو چین کو بلوچستان کے سمندر تک رسائی فراہم کرتا ہے، جو اسٹریٹیجک لحاظ سے بے حد اہم ہے۔
سی پیک کے ذریعے چین بلوچستان کے ساحل پر بحری اڈے بنانے کی کوشش کر رہا ہے، جس سے اسے بحیرہ عرب میں ایک مضبوط مقام مل جائے گا۔ گوادر، جو اس منصوبے کا مرکز ہے، ایک قید خانہ نما شہر میں تبدیل ہو چکا ہے۔ مقامی بلوچ آبادی کو مسلسل نگرانی اور کنٹرول میں رکھا گیا ہے اور وہ اپنے ہی وطن میں آزادانہ نقل و حرکت کرنے سے محروم ہیں۔
لیکن بلوچستان میں چین کی جانب سے استحصال کا سلسلہ CPEC سے بہت پہلے شروع ہو چکا تھا۔ کئی دہائیوں سے چین پاکستان کی مدد کر رہا ہے تاکہ بلوچ آزادی کی تحریک کو دبایا جا سکے اور اس کے ساتھ ساتھ بلوچستان کے وسیع قدرتی وسائل کے استحصال کے حقوق بھی محفوظ کر رکھے ہیں۔ بلوچستان میں متعدد معلوم اور غیر معلوم کانیں چین کے کنٹرول میں ہیں، جن سے مقامی آبادی کو بہت کم یا کوئی فائدہ نہیں پہنچ رہا۔
چین کی سرکاری ملکیت والی کمپنی “میٹالرجیکل کارپوریشن آف چائنا لمیٹڈ” (MCC) گزشتہ 30 سالوں سے اس استحصال میں سب سے آگے ہے۔ اس کا سب سے بڑا منصوبہ “سیندک” ہے، جہاں چین نے سونے اور تانبے کے ذخائر نکالے ہیں، اور اس منصوبے میں شفافیت یا جوابدہی کا فقدان ہے۔ منافع چین اور پاکستان کو پہنچا، جب کہ بلوچ عوام کو غربت میں چھوڑ دیا گیا۔
چین اور پاکستان کی استحصالی پالیسیوں کا بلوچ قوم پر تباہ کن اثر ہوا ہے۔ ہزاروں بلوچوں کو جبراً اغوا کیا گیا اور سیکڑوں کو قتل کیا گیا، اور پوری کی پوری کمیونٹیز کو زبردستی بے گھر کیا گیا تاکہ چینی منصوبوں کے لیے جگہ بنائی جا سکے۔ چین صرف ایک اقتصادی شراکت دار نہیں ہے؛ وہ پاکستان کی بھرپور مدد کر رہا ہے تاکہ بلوچوں کی قومی آزادی کی تحریک کو دبایا جا سکے۔ چین پاکستان کو جدید ترین ٹیکنالوجی اور اسٹریٹیجک مدد فراہم کر رہا ہے، جس کا مقصد گوادر کو ایک “چینی کالینین گراڈ” میں تبدیل کرنا ہے، ایک فوجی اڈہ جس سے وہ ہرمز کے تنگے اور بحر ہند پر تسلط جما سکے۔
اس دوران، پاکستان گوادر میں آبادی کا تناسب تبدیل کرنے کے منصوبے پر عمل پیرا ہے، جہاں وہ غیر ملکی آبادکاروں کو علاقے میں لا رہا ہے۔ یہ پیش گوئی کی جا رہی ہے کہ 2048 تک چینی آبادکار بلوچ آبادی سے زیادہ ہو جائیں گے، جس سے بلوچوں کی اپنی ہی سرزمین پر شناخت مزید ختم ہو جائے گی۔ یہ آبادیاتی تبدیلی اور جاری جبر ایک سوچی سمجھی حکمت عملی کا حصہ ہے جس کا مقصد بلوچ قوم کا خاتمہ ہے۔
ایرانی پراکسیز
ناتھن گریپی: بلوچ عوام ایران اور اسرائیل کے درمیان جاری تنازع، بشمول ایران کے پراکسی گروپس جیسے حزب اللہ اور حوثی، کو کیسے دیکھتے ہیں؟
حیربیار مری: ہم ایرانی تھیوکریٹک حکومت اور اس کے علاقائی پراکسی گروپس کے درمیان کوئی فرق نہیں کرتے؛ یہ سب ایک ہی چیز ہیں۔ یہ پراکسیز دراصل ایرانی ملا حکومت کے توسیع ہیں، جو اس کے جابرانہ ایجنڈے کو فروغ دینے کے لیے کام کرتے ہیں۔ جس طرح ایرانی ریاست بلوچوں کی آزادی کی مخالفت کرتی ہے، اسی طرح یہ پراکسیز بھی ہمارے قومی حق خودارادیت کے خلاف ہیں۔
ایران ان گروپوں کو “آزادی کے مجاہدین” کے طور پر پیش کرتا ہے، لیکن حقیقت میں ایران خود خطے میں سب سے بڑی جابر قوت ہے۔ جبکہ ایران اپنے اتحادیوں کی مدد کرتا ہے، وہ دوسری قوموں جیسے کردوں اور بلوچوں کو بے دردی سے قتل اور دبانے میں مصروف رہتا ہے، جو اپنی آزادی کے لیے جدوجہد کر رہے ہیں۔
ایران نے بلوچستان کے سمندری بندرگاہوں کو بھی استعمال کیا ہے تاکہ حوثیوں کو ہتھیار فراہم کیے جا سکیں، جس سے خطے میں عدم استحکام پیدا ہوا ہے۔ اگر بلوچ ایک آزاد قوم ہوتے، تو ہم کبھی بھی اپنی زمین اور پانیوں کو دوسرے ممالک کے خلاف جارحیت کے لیے استعمال نہ ہونے دیتے، بشمول اسرائیل کے خلاف۔ ایک آزاد بلوچستان علاقائی تعاون اور امن کے اصولوں کی حمایت کرے گا، اور ایرانی حمایت یافتہ ملیشیاؤں یا جہادیوں کو اپنے ملک میں کام کرنے کی اجازت کبھی نہ دے گا۔
یہ یاد رکھنا ضروری ہے کہ ایران کا ظلم ایک دن میں شروع نہیں ہوا؛ اس کا آغاز بلوچ، کرد اور عرب قوموں سے ہوا۔ ان قوموں کو دبانے کے بعد، ایرانی ملا حکومت نے اپنی توجہ اسرائیل پر مرکوز کی۔ اگر آزاد بلوچستان اور کردستان جیسے ممالک ہوتے، تو ایرانی حکومت کی مذہبی انتہا پسندی اور توسیع پسندانہ ایجنڈے کو روکا جا سکتا تھا۔
سیکولرازم اور جمہوریت
ناتھن گریپی: آپ نے کہا ہے کہ ایک آزاد بلوچستان سیکولر اور جمہوری ریاست ہو گا۔ اگر بلوچستان آزاد ہوا، تو مغرب اور اسرائیل کے ساتھ تعلقات کیسے ہوں گے؟
حیربیار مری: ہم سیکولرازم اور جمہوریت کی حمایت مغرب کو خوش کرنے کے لیے نہیں کرتے، بلکہ ہم سمجھتے ہیں کہ یہ اصول بلوچ قوم کی بقا اور ترقی کے لیے ضروری ہیں۔ بلوچ قوم مذہبی طور پر متنوع ہے، اور ایک سیکولر ریاست ہی وہ واحد راستہ ہے جس سے حکومت مذہبی معاملات میں غیر جانبدار رہ سکتی ہے، تاکہ ہر شہری اپنی مرضی سے اپنی عبادت کر سکے۔ جمہوریت ہمارے معاشرے کی تنوع کو قبول کرنے اور منانے کا بہترین نظام ہے، جہاں ہر آواز کو مستقبل کی تشکیل میں کردار ملتا ہے۔
ہم ایک جمہوری بلوچستان کا تصور کرتے ہیں، جیسا کہ ہماری “بلوچستان لبریشن چارٹر” میں بیان کیا گیا ہے۔ یہ چارٹر ہماری سماجی انصاف، انسانی حقوق، مساوات، اور خوشحالی کو یقینی بنانے کے منصوبوں کی تفصیل فراہم کرتا ہے۔ بین الاقوامی تعلقات کے حوالے سے، ہم تمام ممالک کے ساتھ باہمی احترام کی بنیاد پر شراکت داری قائم کرنے کے خواہاں ہیں، بشمول اسرائیل اور مغربی ممالک کے۔
مثال کے طور پر، بلوچستان کا علاقہ زیادہ تر بنجر اور آبی وسائل کی کمی کا شکار ہے۔ اسرائیل نے زراعت اور سمندری پانی کو صاف کرنے میں جو مہارت حاصل کی ہے، وہ ہمارے جیسے سخت ماحول کو بہتر بنانے میں مددگار ہو سکتی ہے۔ اگر ہم اسرائیل جیسے ممالک کے ساتھ مل کر کام کریں، تو ہماری سرزمین میں ایک مثبت تبدیلی آ سکتی ہے، جو نہ صرف ہمارے عوام بلکہ ہمارے پڑوسیوں کے لیے بھی فائدہ مند ہو گی۔ ایک آزاد بلوچستان نہ صرف اپنے شہریوں کی فلاح و بہبود کو یقینی بنائے گا، بلکہ خطے میں استحکام اور ترقی میں بھی اہم کردار ادا کرے گا۔
