بلوچ راجی رھشون فری بلوچستان مومنٹ ءِ سروک ءَ چاگردی رسانکدر ءَ تامری دروشم ءَ وتی شنگ کتگیں کلوہ ءِ تہ ءَ گُشتگ بلوچ راج پاکستانی گچینکاریاں بھر مہ زور ایت، پاکستان ءِ گچینکاریانی سیت ءُ نپ پاکستان ءِ مپاد پرستیں راجکاراں رَس ایت ءُ اِش پنجاب ءَ پاھدگ دے انت ءُ اے ھچبر بلوچ ءِ نپ ءَ نہ جیڑ انت،
راجی رھشون ءَ گشتگ کہ ھوٹ نہ دیگ ءِ ئے باز پاھدگ انت، اولی پاھدگ اِش بیت کہ ما دنیا ءِ دیم ءَ گپ ءَ تچک بیت کہ بلوچستان پاکستان ءِ زورگیری ءُ ھاکمی ءَ نہ منّگ ءَ انت ءُ بلوچ وت ءَ پاکستانی گشگ ءَ ساڈی نہ انت ءُ گش انت کہ ما بلوچ انت-
دومی تاوان اِش انت کہ اگاں ما پاکستان ءِ گچینکاریاں بھر زُرت مپاد پرستیں راجکار دیم ءَ آؤرت انت ءُ پاکستان ھمے گش ایت کہ بلوچ پاکستان ءِ ھک ءَ انت وت گچینکاریاں بھر زورگ ءَ انت، ھما کہ بلوچستان ءِ لٹ ءُ پل کنگ ءَ انت آیاں جاھز کرار دے انت، بلوچانی جنگ ءُ کشگ ءُ آیانی آوار جنگ ءَ جاھز کرار دے انت، اے درستیں تاوان، زوراکی ءُ دو نمبری پارلیمنٹ ءِ سبب ءَ مئے سرا بوھگ ءَ انت-
اگاں ما اے وتگڑیں گچینکاریاں بھر مہ زوریں جھان ءِ دیم ءَ سابت کت کنیں ما بلوچیں، مارا پاکستان ءَ گوں ھچ نزیکی نیست ءُ پاکستان ءَ گوں مارا ھچ وڑیں سیادی نیست نا وشی ءَ نا کہ گماں-
اے مئے دژمن انت، مئے سرا زورگیر انت، زورانسری مئے زمین ءِ سرا کوزہ بوتگ، اے زورانسری مئے زمین ءِ سرا نشتگ ءُ اے مارا چہ وتی زمین ءَ کشگی انت، کشگ ءِ بازیں وڑ ءُ پیم ھست انت،
راجی رھشون ءَ دیمتر ءَ گشتگ کہ اے مزنیں سوبمندی یے بیت کہ بلوچ پاکستان ءِ گچینکاریاں بھر مہ زور ایت- آئی گشتگ کہ ایشی ءِ ھمنچو مزنیں بستارے چش کہ سرمچار کوہ ءَ نشتگ انت سرزمین ءِ پاسبانی ءَ کنگ ءَ انت ءُ ھمے پیم تو ھوٹ مہ دے ءُ تو اوں زمین ءِ پاسبانی ءَ کنگ ئے، ھوٹ نہ دیگ انچیں مزنیں بستارے- جھان ءِ دیم ءَ سابت بیت کہ پاکستان بلوچ ءِ دوست نہ انت دژمن انت، ھیربیار مری ءَ دیمتر گشت کہ بلوچاں گوں پاکستان ءِ راجکاری ءَ ھچ نزیکی نیست، پنجابی یک جتائیں راجے ھمے پیم ءَ بلوچ ءِ جتائیں پجار ءِ ھواری ءَ یک جتائیں راجے! ھندوستان ءَ پروشگ بوتگ ءُ پاکستان جوڑ کنگ بوتگ، چش کہ بلوچ وتی زمین ءَ ھزاراں سالی کوھنیں راجدپتر ءِ ھواری ءَ وتی زمین ءَ نشتگ- بلوچ ان شالا وتی آجوئی ءِ جھد ءَ سوبین بیت- سوبینی بلوچ ءِ بھت ءَ انت- بلوچستان زندگ بات!!
