نبشتہ کار: کریم بلوچ
ھمگام نبشتانک
مرچاں دنیای ءِ گیشتریں راجاں دیر انت که په وتی راج واجهی ، وتی راج و ملک ءِ ایمنی و آرامی ءَ رستگ انت و په گهتریں زندمانے جهد کنان انت ، جهان ءَ نوکیں کانود و رهبند ٹهتگ و مَنّئگ بیتگ انت . جهان ءَ دیر انت که راجانی برابری ، دودانی برابری ، هکانی برابری ، زبانانی برابری ، جنین و مردین و نه نر نه مادگانی برابری ، جوڑ و ناجوڑانی برابری ءِ کانود منئگ و زیرگ بیتگ انت ، بلے هنگت لهتے ملک که ایران و پاکستان یا اوگانستان که بلوچستان اش ایر دست و بهر و چنڈ کته ، آوانی رَد ءَ هوار انت ، چه مردم و مردمگری ءَ سَدانی سال پُشت انت . ماں اے ملکانں هر دابیں هک ءِ لوٹگ ءِ پسه و جواب ، تیر و لٹ و کٹ انت ، بلے زلم و زوراکی هر چنت باز و زوراک ببیت ، په آئی ءِ پروشگ ءَ الم ءَ راهے درکپیت و کوه هرچنت بُرز و تیهر ببیت ، الم ءَ په آئی ءِ گوزگ ءَ راهے ودی بیت و بلوچ ءِ هنیگین جاور ءَ ، هزاراں ساه ءِ ندرکنئگ ءَ رند ، بلوچاں یک مُشت و یکجاه کته و جهان بلوچانی زرمبش ءَ گنداں و باور کنان انت .
بلوچستان ءِ مردم ، رند چه سد سال واب ، وتی زور و واک ءِ ناباوری ، تهنائی ، وتی هک ءِ نزانگ ءَ ، نون که دگه مردماں هم پاد آتکگ انت ، سد سالی زلم ، مردم کشی ، لگتمالی ، زا و بدانی اشکنگ ، ایردستی و گلامی ءِ سگگ و برداشت کنئگ ، هنون چست بوته و هر روچ دابے نه دابے ، زوراکانی دیما اوشتاتگ و اوشتیت . پرچا که جوان زانت ، په وتی هکانی رسگ ءَ آئیا دگه راهے ابید چه لوٹگ و گِرَگ ، و په وتی هکانی لوٹگ ءَ درکپگ ، نیست انت .
مرچاں بلوچانی زرمبش همے مزنیں ریلیانی برکت ءَ ، جهان ءِ میڈیا و هالتاکاں ، تا یک کساسے شنگ بیان انت و هرچنت ، مئی جنز ءِ هال و هبر جهان ءِ مردم دلگوش کننت ، زوراکانی کشت و هون بلوچستان ءِ تها ، گرانتر و مشکل تر بیت . نون زوراکانی سیاست همیش انت که مئی مزنیں ریلی و مُچیاں بند کنائین انت ، پروش انت ، یا ما را بهر بهر کننت تاں جهان مئی مزنیں مُچیاں مه گند ایت .
مئی مزنیں مچیاں ، مئی هم سنتی و هم پگری ءِ گوئشوک انت ، همے مزنیں مچیانی برکت انت که ما یک و دگر ءِ درد و رنج ءَ گیشتر زانیں و گوں یک و دگه په گهتریں راهے ءِ شوهاز ءَ گپ و هبر کت کنیں و وتی جنز ءِ راه و زرورتاں گیشتر زانیں ، زوراکانی دل ءَ همے مزنیں مچیانی برکت ءَ تراکینانیں .
همے هاتر ءَ دژمن ءِ پندلانی نیمگ ءَ که لوٹنت ما را آرام ، و تَرکا پَرکا کننت ، بزانیں و سرپد بئیں .
ما هنیں جوان زانیں که هر مردمے ءِ وتی لیکه و هیالے الّم بیته و هست و ما یک و دگر ءِ لیکه و هیالانی آزاتی ءِ منوک و پُشتیوانیں . جهد بکنیں همدگر ءِ هیالاں گوش کنیں و یک و دگر ءِ گپ و هبر و لیکهانی بیان ءِ دیمگر مه بئیں و ما وهدے زوراک و پر تاکت بئیں که درست ، بلوچ ءِ نام ءَ تپاک بئیں ۔ یک و دگر ءِ پُشت ءَ بیکاریں هبراں ویل کنیں . دیم په دیم به نندیں و راجی جیڑهاں هوری ءَ و تپاکی ءَ به گیشینیں ، نئیکه وتی کس میان نیارگ ءَ ، دگرانی هساب به نبیسیں . هما کس که دگرانی باپشت ءَ زنگ جنان انت ، بزانیں که آئی ءِ نیت یا هراب انت یا دژمن ءِ هبراں په دلکشی یا دل نا کشی شنگ و تالان کنان انت . جنز ءِ راه ءَ ڈنگر جنان انت .
بلوچ ءَ هم ملا ، هم واننده ، هم استا ، هم کاری ، هم کشتکار ، هم باپار ، هم مالدار ، هم زرگر ، هم ازمکار ، هم کاربلد ، هم سازگر و هزار دگه کار و کسب ءِ مردم هست ، آهاں بازیں پگر و نیکراهی ءِ منوک یا نه منوک هم بیت کن انت ، و درست پیکه بزاننت که بلوچستان ما درست بلوچانی لوگ انت ، مئی پت و مات و بلک و پیرکانی هنکین بیته و مئی پدریچانی پناه و هستی انت و ما هوری ءَ آئیا گپت ، آبات و ایمن کرت کنیں . بلوچستان ءِ آباتی و ایمنی درست بلوچانی وشهالی و پهر انت .
روکپتی بلوچستان ءَ ورنایانی جار و سڑکانی راجی جیڑه و کوکاراں ، مرچاں مسیتانی تها هم گپ و هبر بیگ انت . اے جوانیں رهبندے که مئی مسیتاں هم ، وتی راج ءِ درد و هبراں بیان کن انت ، وتی ورنا و زانوگرانی هبراں درشان کننت و بگوئش انت . اے مئی نزیکی و تپاکی ءِ دلیل انت و مئی دربندیں راج ءِ تپاکی ، مئی راج ءِ مستریں زور و تاکت انت . مئی ملا هم جوان بزاننت که اگں مردمانی دردانی زبان بات انت ، آهانی دیوان مدام بَز بیت و مردم و راج ءِ ورنایاں آهانی دیواناں ، کاینت و اشکنگ ءَ تیار بنت ، بلے اگں نه ، بلوچستان ءِ مردمانی سرا بیتگیں زلمانی بابت ءَ مئی ملا وتی چمان مُٹ کن انت و بند انت ، ورنا و سرپدیں مردم هم آهانی دیوان ءَ کدیں بهر نه زیر انت و آهاں زوراکانی همراه زاننت .
چیزے که هنیگین زرمبش ءَ باز پکار انت ، سیاسی گروپ و گلانی هوریں کمیٹی یے انت ، تاں په کارانی گهتر دیمبرگ ءَ ، مدام هوریں پیسله یے بکن انت و چه یک و دگر ءِ پُشت ءَ گپ بیگ ءَ دیمگری ببیت . دومی گپ ، مزنیں جهدے لوٹیت تاں جهانی عدالتخانهاں ایران و پاکستان ءِ راج کُشی سنداں ، آهانی دیما ایر بکنت و بلوچستان ءِ کیس ءَ میان استمانی و جهانی عدالت جاهاں دیما ببارت .
بلوچستان ءَ ماں هنیگین جاور ، گیش چه هر وهد ءَ بلوچانی یکجاهی و هم سَنّتی پکار انت ! بلوچ ءِ آزاتی و دیمرئی ءِ مانزمان بلوچ ءِ تپاکیں جهد انت !
