ھمگام بلوچی
نبشتانک: کریم تهل
25.09.2023
مهر ءِ ماه ، ماں ایران و ماں بلوچستان ءَ وانگ و زانگ ، وانگجاهانی پاچ بیگ و وانگ ءِ کار ءِ بنگیج انت !
مهر ءِ جند ءِ گال گوں دوستی و هُب ناکی ءَ بندوک انت . جهان ءَ دیمرئی و بدلی ، بے زانت و زانگ ءَ نه بیتگیں چیزے . په هر چیز ءِ جوڑ کنئگ ، یا آئی ءِ رندا روگ ، یک زانت و زانگے یا یک هُب و مهرے درکار انت . بزان مردماں هما کار ءِ رند انت که آهاں لوٹنت و آهانی هُب اش هست یا آهاں زاننت .
بزان مئی زندمان ءِ هر چیز گوں مئی زانت و زانگ و هب ناکی ءَ بندوک انت . نابزانتیں مردمانی نابزانتی ، آهانی زند ءِ تهاری و بے وسی انت .
زانت و زانگ ، دیمرئی و گهبودی ءِ راه و دروازگ انت . هما مردم که زانت ، وتی لوٹ و واهشتاں بیان و درشان کنت و آهانی رند ءَ رؤت و په آهاں جهد ءَ کنت . هما مردم که زانت ، وتی و وتی راج ءِ سرا ، زلم و نارواییاں ماریت و آهانی دیما ، اوشتیت ، هما مردم که زانت ، دگرانی چست کنئگ و آهانی مدت ءَ هر داب و هر چون توانت ، سرین ءَ بندیت . په همے هاتر انت که زانتکاریں مردماں ، مدام زلم و زیادتی ، گلامی و بے وسی ءِ هلاپ ءَ ، اولی رد ءِ اوشتوک و جهدکار بیتگ انت . په همے هاتر انت که وشنیتک و دژمنانی تیر ءِ نشان ، مدام زانتکار و وانندهانی نیمگ ءَ بوته . په همے هاتر انت که دژمن مدام ماں بلوچستان ءَ وانگ و زانگ ءِ راه و در بند کرته و هچ په جوانیں وانگجاه ءِ بندگ و ٹهینگ ماں بلوچستان ءَ جهدی نه کتگ و هما سامان که بلوچ زهگانی دیمرئی ءِ سوب به بنت ، تیار نه کرتگ انت .
په زهگانی گهتر دیمرئی اولی کار و اولی گام آهانی تالیم ءِ بنگیجی ماں آهانی ماتی زبان انت . هما زبان که چه گوانزگ ءَ آئی ءَ اشکناں بیته و گوں هما زبان ءَ تاں آ جاه ءَ رسته . په ماتی زبان ءِ وانینگ ، درکار انت که زبان ءِ جند منئگ به بیت و زبانانی و راجانی برابری ءِ هک زانگ و منئگ به بیت ، که باز بژنی گپے که مئی ملکانی رستریں هکومتاں ، نه کدیں بلوچ ءَ وتیگ زانتگ و نه که په آئی ءِ راج و زبان ءَ ، برابری ءِ هک اش منتئگ .
دومی گام جوانیں وانگجاه گوں زانتکاریں استا و وانینوک ( معلم ) ءِ تیار کنگ انت که باز بژنی گپے بلوچستان ءِ نیم ءَ چه گیش وانگجاهاں درچک و دارانی چیر یا دیوالانی پُشت یا تگردی کُڈکان انت که اوداں آسرات که هچ بلکیں زند ءِ نشان کمتر گندگ ءَ بیت . پدا بلوچستان ءِ وانگاهاں یا وانینوک نیست ، یا وانینوکانی مزنیں بهرے هنچیں بلوچ دژمن و پلیتیں مردم انت که هچ داب بلوچ ءِ دیمرئی ءِ لوٹوک نه انت .
اگں ما وتی زهگانی زند ءِ گهبودی ءِ لوٹوکیں پیکه جهد بکنیں که بلوچستان ءِ سرجمیں وانگجاهانی وانگ ماں بلوچی زبان ءَ به بنت و په بلوچستان ءِ وانگجاهاں جوانیں و بلوچ دوستیں وانینوک تالیم به دئیں و تیار به کنیں و په بلوچ زهگانی گهتر وانگ و دربرگ ءَ ، آهانی زند ءِ آسرات ءَ کم و گیش تیار بکنیں . و بلوچستان ءِ وانگجاهاں بلوچستان ءِ شهید بیتگیں زهگ و وانندهاں یا شهزانتانی باره ءَ هم باز درونت گیش کن اوں ، تاں بلوچستان ءِ راجدپتر ءِ تاکاں ، مدام په نوکیں پدریچاں ، آهانی همت و دیرچاری ءِ راه ءَ شون به دینت .
بے شک بلوچستان ءِ هر شهیدے ، چه بلوچستان ءِ گهتریں ، روشنتریں و زانتکارتریں مردماں ، ماں وتی چاگر ءِ تها بیته ! بلوچستان ءِ مهر ءِ ماه ءَ ، گوں وتی شهیدانی یات و نام ، و بلوچ راج ءِ گهبودی و دیمرئی ءِ مراد ءَ بنگیج کنیں !
سبز و سوبیں بات بلوچ راج !
