ہمگام بلوچی نبشتانک :
دنیا، زِند ، بنی آدم ءُ وہد چہ بُن اَزل ءَ یک ءُ دومی ءَ گوں بندوک اَنت، داں روچ ء مروچی ایشانی سیادی اَست اِنت، وہدے کہ بنی آدم ودی بوتگ یا دنیا ءَ وتی چم پَچ کتگ اَنت، ہما روچ ءَ چہ گوں آئی ءَ بَندوکی انت.
بلے، بنی آدم اللّٰه پاک ءِ ہما جوڑ کتگیں مخلوق اِنت کہ آئی ءَ ہر وہد ءَ دیمروائی ءُ سوبین بوہگ ءِ ایشتاپ اِنت ءُ ہمے ایشتاپ ءُ لالچ ءَ بنی آدم انسان ءَ چہ مردم جوڑ کتگ، اَنچوشکہ زانتکار ءُ دانِشوروانی گشگ اِنت کہ سرجمیں بنی آدم حضرت آدم ءُ بی بی حوّا ءِ اُوبآتگ اَنت، گڑا حَضرت آدم ءُ بی بی حوّا ہم جنت ءَ چہ ہمے سَبَب ءَ دَرکنگ بَنت ءُ سر زمین ءِ سرا دنیا ءَ دیم دیئگ بَنت کہ آئیاں میوہگ ءِ ہاتر ءَ لالچ کُتگ اَت۔اللّٰه پاک حکم ات کہ پلاں درچک ءِ بر ءَ دست مہ جنت ات، بلے پدا ہم آئی ءَ وتی دل ءِ کت انت۔ ہمے سبب ءَ درکنگ زمین ءِ سرا راواں دئیگ بوت انت۔وہدے کہ ما اِے چیزاں کہ شر بچاراں گڑا ہمے گِندگ ءَ کئیت کہ انسان ءِ فِطرت ءِ تہا، لالچ، ایشتاپ ، بےصبری ءُ جاہلی بُن ازل ءَ ہوار انت۔ آئی ءَ چہ وراثت ءَ اے چیز گون انت۔ ہمے سَبَب انت، مرچی کہ ہر گوْرا ءَ چَماں شانک دئے، گڑا اے درست وڑے نہ وڑے، رنگے نہ رنگے ءَ ہر بنی آدم ءِ تہا گِندگ ءَ کا اَنت۔ انسان مُدام چہ وت ءَ چہ گیشیں واہشت کہ داریت گڑا المّ ءَ اے درستیں بیماریانی آماچ بِیت ، بے صبری، لالچ، ایشتاپ اے ہما بیماری آہاں کہ انسان ءَ تہا چہ ورانت ءُ ہلاس کناں، ہما لا علاج مرض زانگ بنت کہ انسان چارگ ءَ وا دُرست چاریت، بلے آ ہِچ نہ گندییت نہ ماریت ءُ شر ءُ ھراب ءِ نیام ءَ فرق کنگ ءِ سَنچ ءُ بود ءِ جِند ءَ ہلاس کناں، وہدیکہ دومی نِیمگ ءَ چاراں گُڑا مارا ”وہد“ گِندگ ءَ کئیت وہد ہما ظالم اِنت کہ آئی ءَ پہ کس ءَ نہ بیت نہ کہ پہ کسے جلئیت، وہد ءِ ہمرائی ءَ وا درست لوٹاں بلے وہد ہما آہانی ہمراہداری لوٹیت کہ آئی ءَ اے وڑیں ہِچ بیماری نیست اِنت، گڑا وہد ہما مردمانی گوما دوستی کُت کَنت کہ صبر ءُ برداشت ءِ مالک بِہ بیت، ہما انسان کہ لالچ ءُ واہشتاں چہ جُتائیں رُوح یے داریت ۔ بَلے! چش کُجا بوت کنت کہ اِنسان واہشت ءُ واہگ مہ دارئِیت، گڑا آ بہ زاں انسان یے نہ اِنت سِنگ ءُ دار ءِ مٹّ بُوت۔ اللّٰه پاک ءِ وتی شان اِنت کہ آئی ءَ چیزے انسان ہم چشیں جُوڑ کُتگ کہ آ ستا کرزگ ءِ لائق اَنت. ”وہد“ ءَ کہ چارئے گڑا آ وتی بادشاہ وَت اِنت، نہ کسی واستہ وت ءَ داریت نہ کسی واستہ وت ءَ مٹّ کَنت، ہر کس ءَ سوّجی ہمراہ بہ بیت، اگن نہ گڑا وہد ءَ کسی ہاجت ءُ پرواہ نیست۔
بنی آدم ءُ وہد ءِ دوستی ءَ یک چمے ہوار ءَ بچاراں گڑا نزیک ءُ گورا ءَ بازیں مردم ءُ عالِم گِندگ ءَ کا اَنت، کہ لہتیں مردم مردم وہد ءِ گوما اَنت، ءُ لھتیں وہد ءِ گوما نہ بلکیں وہد ءَ پِیسر بوگ ءِ واہگ دار اَنت۔
انسان گوں اِنسان ءَ مَرچی چوں گِندگ ءَ کئیت اِنت! یَکے ءِ شاہ بیت یکے گَدھا، یکے وار بِیت ءُ یکے سیر. بَاریں انسان اِے چِیز ءَ کدی ماریت کہ وہد پہ کس ءَ مُدامی یَکیں وڑا نہ بیت، چیزے ءَ وہد مغرور کنت پہ چیزے مدات ءِ واستہ، بلے آ ہمےسرپد بنت کہ وہد نو بس ایوّکا مئے وتی انت۔ مرچی بازیں مردم چہ وتا چہ کمترِیں مردماں وتی مٹّ ءُ داروار نہ لیک انت، باندا پدا ہمے مردمانی وزمندگ بَنت۔ دومی گورا ءَ چاراں، گڑا بَازیں مَردم اَنچِیں ہم گِندگ ءَ کَئیت کہ چہ وتی واہِشتاں ءُ واہگاں چہ انچوش مجبور بَنت کہ وتئ جِند ءِ ساہگ ءَ جند ءِ باتِن ءَ چہ وتا سِند اَنت ءُ جُتا کَناں، پرچا؟ پرچاکہ آ اداروکیں واہشتاں سرجم کُت نہ کناں گا اَنت، پرچاکہ آئی ءِ گورا ءَ ہِچ نیست کہ آئی ءِ ضرورتاں سرجم کُت بکَنت، گڑا وتا گیشین اَنت ءُ پُشت ءَ کنزاں اے ہم نہ چار اَنت کہ ہمے ہمراہ ءُ دوست ءُ عَزیز ءِ واستہ چے چے کُتگ کہ مروچی آئی ءِ گوما اے جگہ ءَ اتکگ ءُ سر بوتگ ۔ بلے نیستی ءِ وہد انت کہ مردم ءَ وہد ءِ احساس بیت، وہد چہ دُرستاں گیش انت، وہدیے کہ مردم سَما کَنت ءُ چارِیت کہ نوّ کس ہمراہ داری کنگ ءَ نَہ اِنت، گڑا بزاں وہد ءَ دَگہ کتگ انسان بے وفا بوتگ، اَنچوش کہ زانتکارانی یَک گَپ یے کہ باز نام اِنت، شریں وہد ءَ ہمراہ ءِ پَجار کَنگ گِران انت بلے! ھَرابیں وہد ءَ شیریں ہمسفر ءُ ہمراہ ءِ اَرزِشت ءُ آئی وفا زانگ ببیت، وفا دار ءُ مِہروانیں بیل ءُ ہمراہ ھرابیں وہد ءَ زانگ بِیت کہ داں کُجا ہمراہ داری کَنت ءُ داں کُجا بارِیں سفر جاناں کَنت گوں۔ بقول ءِ زانتکاریے ئیگ ءَ کہ آئی ءَ اے گَپ ءَ را جوانی ءِ گوما جَتگ کہ دوست ءِ اوقات ھرابیں وہد ءَ زانگ بِیت۔ مرچی اے گَپ راست گِندگا آہاگ ءَ اِنت کہ ھرابیں وہد ءَ ہما سَنگت ءُ دوست ءُ دَزگہار ءُ کَس ءُ عزیز یلہ کَناں، مرچیگیں دوستی ءُ یاری سیم ءُ زَر اِنت۔ لَہتیں مردم کہ وتی مردماں نیستی ءِ سَبَب ءَ یلہ دئینت ءُ پُشت ءَ کِنز اَنت، آئیاں پَدا وہد الّم جایے نہ جایے وڑے نہ وڑے ءَ یلہ دانت ءُ دْرویت۔ پرچا کہ وہد ءَ چُشیں مردم ءِ ہمراہی درکار نہ اِنت، وہد ہم ہمے گُشیت کہ اَگن ترا پہ وتی کس ءُ عزیز، ہمبل ءُ یاراں کہ نہ بیت گڑا منا ہم پہ تؤ نہ بیت۔
چُشیں مَردم وتی زِندگی ءَ مُدام اِیوّک ءُ بزگ، در پہ در بَنت۔ بلے اَنچوش کہ مَن گُشتگ اَت کہ چُشیں ہم مَردم اَست اِنت کہ سَتا کرزگ ءِ لائق انت گڑا وہد آئیاں الم وتی گوما بارت گوں ءُ آئیاں مَنزل ءَ سر کَنت۔ ستا کرزگ ءِ لائق اَنت ہما جوانیں مردم کہ سَکیں وہد ءَ ہم وتی ہمراہ ءُ یاراں کُپگ پہ کُپگ چُو ساہگ ءِ وڑا ہمراہ بَنت ءُ دِلبڑی دئیاں اَنت۔ ھَرابیں وہد ءَ ہم اَنچو پہ کَندگ ءُ مسکارا گوازین اَنت کہ ”وہد ءَ “ آ مردم دوست بَنت ءُ آئیانی گوما وتئ سَفر ءَ بَرجا ءَ دَاریت،
بَلکیں وتئ دِل ءَ سَک وَار ءُ بزگ اَنت بلے ائیانی تہا صَبر ءُ بَرداشت ہمینچو باز اِنت کہ وتی ہمراہانی ہاتِر ءَ وَتا دَار اَنت ءُ مُہر ءُ مہکم کَن انت کہ مئے ہمراہ ءُ بیل مہ مار اَنت وتی واری ءَ، اِنسان مُدام ہما وہد ءَ سوبین بیت کہ آ وتئ درد ءُ تکلیف ءَ پہ وتی دوست ءُ یارانی ہاتر ءَ یک نیمگ یے ءَ ایر کَناں داں دومی ہمراہ مہ پرُوشیت۔ اِے وَڑیں انسان بنی آدم گُشگ بِیت کہ صَبر ءُ تمبولے ِ گوں سکی آہاں ہَمراہ بَنت، اِے وَڈیں انسان بنی آدم گُشگ بِیت کہ صَبر ءُ تمبولے ءَ گوں سکی آہاں ہَمراہ بَنت۔ گُڑا ”وہد“ چُشین مردم ءِ گوں سفر کَنگ ءَ باز جوانیی ءَ گوں وش بِیت کہ آئی قدر ءُ قیمت ءَ زَانت ءُ آئی واستہ صبر کنت۔
دنیا ءِ تہا ہما مردم دیمروی کناں ءُ یا کتگے کہ آئیاں سکی آں صَبر کُتگ اَنچیں ہم مَردم اَست اِنت کہ بلکیں آہانی شَپ ءُ سُہب یَک سالے ءِ وڑا جُنزگا آہاں، آئیاں وتی واہشت ءُ واہَگ ضرورت ءُ بلکیں شُد لَاپی ہَم سگِتگ بَلے پُشت ءَ نہ کِنزِیتگ اَنت۔ بَقول ءِ عَطاشاد، بَلکِیں سِنگ اِیش ہم سَرا وارتگ بَلے سر بَستگ ءُ دِیما رواں کُتگ۔ چہ وتئ جِند ءِ باتِن ءَ گوں وتا ہم جَنگ کُتگ۔
”وہد ءَ “ گڑا اَنچِیں مردم دوست بیت چُشِیں مردم سفر ءِ تہا بَلکیں وار ءُ بَزگ بِیت ہَزار رَنج ءُ غَم گِندِیت بَلے وہد ایشاں منزل ءَ الم سر کنت، وہدے کہ منزل ءَ سر بنت گڑا نہ کہ ایوّک بنت ءُ نہ گار بنت، من وہدے کہ نزیک گوار ءَ چاراں ءُ ماراں گڑا ہمے گِندگ ءَ کئیت اِنت کہ مئے چَپ ءُ چَاگردہ دوئیں رَنگے مردم اَست اِنت، سَتا کَرزاں ہما آہاں کہ وتی وشی ءُ واہگ، وتئ ضرورت ءُ وَاہِشت ہم یَک نیمگے ءَ اِیر کُتگ اَنت ءُ پہ وتی منزِل ءِ سر بوہگ ءِ ہاتِر ءَ بَہ مَردی گوں وَت ءُ گوں دارامداں جنگ کناں پہ وتی باندات ءِ ہاترا وتی مرچیگیں وشی قربان کتگ اَنت، وہد ہم ایشاں الم منزل ءَ سر کنگ ءِ جہد ءَ کنت، پرچا کہ ”وہد ءَ “ ہما مردم دوست بنت کہ آہائی تہا صبر اَست اِنت۔ اَنچوشکہ من اے گَپ پیسر ءَ ہم گُشتگ اَت کہ وہد ہمائی ءِ بِیت کہ ”وہد ءِ “ وڈا بِیت۔ وہد ءَ چہ پُشت بئے گُڈا پَشت کَپئے وہد ءِ ہمراہ بئے گُڑا وہد دؤر نہ دَانت بَلے وَہد ءَ چہ گوازگ لوٹئے وہد موہ نہ داَنت چمیشکہ گڑا پَدا وہد ءِ دوستی گوں بنی آدم ءَ نبیت۔
زندگی یَک اَنچیں داد یے ھُدا وَند ءِ کہ سَرجمیں وشی گوں دَرد ءُ تَکلیف، رنج ءُ غم، واری ءُ بزگی دَر پَہ دَری ءَ تہاراسنت۔ بَلے اِنسان اَنچو بے زَانگ اِنت کہ ایوّکا وشی ءِ تلبگار اِنت بے سَکی ءُ سُوری ءَ وشی بے تام ءُ بے لِزّت انت۔ اگں بنی آدم گوں وہد ءَ ہمگرنچ ءُ ہمراہ بہ بیت گڑا وہد کس ءَ دؤر نہ دانت. وہد ءَ دوست بِہ دار وہد دوستاں دوست داریت۔ ۔ ۔!
”چَک جَن ساہتاں سال کَن
وہد ءَ بانزُل پِریں بال کن”
