ڈاکٹر شکیل بلوچ۔
ھمگام بلوچی
اِے دیارے انچیں کہ اِد ءَ بِچکندانی بِچکند پُلگ بَہ اَنت۔ سکی مدام وشگپی ءُ بِچکندگ ءَ اَت، آئی ءِ شیرکنیں، کنگ ءُ مزاکاں مردم ءِ تب وش بوت، آئی ءِ دیوان ءَ کدی ھم مردم گمیگ نہ اَت۔
سکُل جان تو مرچی من ءَ بے کساس گِیر پیداک ئے، من اِے جْیڑگ ءَ آں کہ تو باریں چْے جْیڑگ ءَ ئے ءُ اِے ساھتاں زندان ءِ تنک ءُ تھاریں کْوٹیاں تئی جاورھال چے اَنت؟ ھُدا بِہ زانت کہ آئی ءَ اِے زمینی ناھدا جْوڑ کرتگ اَنت پہ مئے بِچکندانی پُلگ ءَ ۔۔۔
سکی جان مدام پہ وتی بچکندیں ھمراہ ءَ گمیگ اَت، آئی ءَ من ءَ ھم بے کساس دوست داشت ءُ گْوشت “ڈاکٹر جان” تو من ءَ پمیشکا دوست ئے کہ تو من ءَ بِچکند ءِ یات ءَ دیگ ءَ ئے۔
بس زاناں مئے بھتیں انچیں کہ اِے دیار ءِ تہ ءَ مارا نہ بِچکند ساچ اِیت ءُ نہ کہ بِچکندوکیں ھمراہ نسیب بیت۔
اِے اھد ءِ زوراکیں جاوراں بازیں بِچکند پُل چہ ما گِستہ کُرتگ اَنت۔
بلے انچش کہ اِے بِچکندانی اَرزشت ءَ کسّے بِہ زانت، سکی یک مِھروانے اَت ءُ مدام مِھر ءِ شُوھاز ءَ راھیگ اَت۔
سکی سگ ءُ اوپار ءِ یک چْیدگے اَت، آئی ءَ جھان ءِ تژن، بُھتام، ھبر وتی جبین ءِ اندر ءَ ایر برت اَنت ءُ یک بے تواریں آھے ءَ چہ دل ءِ پاھار ئِے کش اِت اَنت۔ بلے اِے تژن ءُ بُھتانانی میان ءَ مدام بِچکندگ ءَ اَت، کسّے ءَ اِے گپ نہ زانت کہ سکی ءِ اندر چِنچو زیمیگ اِنت، آ تہ ءَ چہ چِنچو پُروشگ بوتگ۔۔۔۔ بِہ گند ئے اِے درداں دگہ کسّے مار اِت کرت مہ کنت بلے من آئی ءِ اِے درد چہ نزّیک ءَ دیستگ ءُ مار اِتگ اَنت۔
8 دہ ماہ ءَ پْیسر کیچ ءَ وھدے کہ منی ءُ دگہ یک سنگتے ءِ سَر کپت، ما سکی ءَ را ھال ھم نہ داتگ اَت، بلے اناگت ءَ من ءَ کالے اھت کہ تو کُج ءَ ئے، من پَسّو دات کہ من کیچ ءَ آں، گُڑا یک بچکندے جتے ءُ گْوشتے کہ یک ساھتے ودار کن کہ من انوں کایاں، ساھتے ءَ پد آ اتک، دپ ئِے بِچکندگ ءَ اَت، گْوں مِھروانیں مِھراں من ءَ ھمباز ئِے کرت، دگہ یک سنگتے ءَ گْوشت کہ سکی مدام بچکندگ ءَ اِنت سک ءَ وشھالیں مردے۔۔۔۔
بلے من زانت کہ آ سنگت سکی ءِ باتن ءِ درد ءُ مارشتاں سرپد بوگ ءَ نہ اِنت۔ من آئی ءِ بچکندانی تہ ءَ چہ آئی ءِ درد مار اِت اَنت کہ تہ ءَ چہ چِنچو پُروشگ بوتگ، آئی ءِ جَزبات چو لیبوکے ءَ گوازی کنگ بوتگ اَنت۔
سکی منی کَش ءَ نشت ءُ گْوشت کہ ارواہ تو گپّے زان ئے؟ من گْوشت وتی گپّاں بہ گْوش کہ تئی جبین ءِ پاھار در بْیا اِنت ءُ بْوج سُبک بہ بیت۔۔۔۔
آئی ءَ پسّو دات کہ “پُل منی مزّوری ءَ ھم لھتیں مردم وش نہ اِنت، من وتی اِلاکہ یلہ کُرتگ ءُ کیچ ءَ اھتگ آں پہ پوریاگری ءَ، بلے لھتیں مردماں منی نزّیکیں سنگت کُلوہ کرتگ انت کہ سکی ءَ وتی کِرّ ءَ کار ءَ مہ دار اِت سکی جْوانیں مردمے نہ اِنت”۔
آئی ءَ یک آھے کش اِت ءُ گْوشت کہ مردم نہ زانت کہ گْوں اِے ناداناں مردم چے گپ ءُ چونیں ھبر بہ کنت۔۔۔۔ بلے وھد ھر چیز ءَ پدّر کنت۔۔۔۔۔۔
بلے من ءَ سبر اِنت، ھر چیز گْوش اِیت بِلّے گْوش اِیت دنیا ءِ دپ دارگ نہ بیت۔۔۔۔
ساھتے ءَ رند آئی ءَ زور ءِ پُرّ یک ٹھکے جَت ءُ گْوشت کہ پُل من ءَ اِد ءَ تئی وڑیں گنوکیں سنگت ھم باز اِنت، ما وَ گنوک اَنت مارا وتی گنوکیں سنگت ھم بے کساس دوست بہ اَنت۔
بلے پُل گپّے زان ئے، من ءَ کیچ ءَ ھم تئی وڑیں گنوکیں سنگت رستگ، یک انچیں مردمے ءَ من ءَ وتی کِرّ ءَ کار ءَ داشتگ کہ آ منی سنگت ءِ جاہ ءَ سنگت اِنت ، پت بْرات ءِ جاہ منی بْرات اِنت۔ آئی ءَ من ءَ وتی کِرّ ءَ چو وتی براس ءِ پیم ءَ سھڑینتگ ءُ داشتگ۔ آئی ءَ من ءَ گْوشتگ کہ تو دلجم بہ بو من ءَ دنیا تئی بابت ءَ ھر وڑیں گپ بہ کنت من ءَ آیانی گپ باور نہ بنت، من ترا وت زان اِیں۔۔۔
سکُل جان سک ءَ وش اَت کہ کیچ ءَ من ءَ اِے وڑیں شکسے رستگ، آئی ءَ مارا ھم بُرت گْوں وتی سیٹ ءَ دیوان دارینت، تاں من چار اِت کہ واکی سکی ءِ سنگت ھم سکی ءِ وڑیں مھروانیں مردم اَنت کہ پہ بلوچ ءَ تلوس اَنت ءُ مِھروان اَنت۔
ما رھادگ اِت اَیں کہ راہ ءَ گنوک تبیں راشد دیدار ءِ ھم دیدار نسیب بوت، سکل جان گْوشت کہ اِے مئے وڑیں گنوکے، سکی جان ھم راشد ءَ ھمباز کرت، من ھم ھمباز کرت، دیدار ءَ گْوشت کہ سد کلدار بہ دے یک شئرے گْوش آں، پد ءَ آئی ءَ یک انچیں شئرے ونت گُڑا مردم ءَ پَھم اِت کہ راشد ھم یک گنوکے نہ اِنت بلے آئی ءَ را جھان ءِ لھتیں نہ بزانتاں گنوک کرتگ۔
کیچ اَت، جمبر اَت، ھور اَت، سکی اَت، بچکندگ اَت، سارتیں گْوات شِیک شِیک ءَ کشّگ ءَ اَت، سکی جان ءِ گپ ءُ تران ھم دل ءِ تہ ءَ ایر کپان اِت اَنت، کندگ اَت، مسکراہ اَت، من نہ زانت کہ گوادر ءِ دراجکشیں پَند، کیچ ءِ دراجکشیں پند ءِ دمبرگ ءُ جان درد کُج ءَ شُت اَنت۔
کیچ وت یک مھروانیں جاھے، بلے سُکل جان تئی بچکنداں کیچ گیش ڈولدار کرتگ اَت، من نہ زانت کہ تئی بِچکنداں اِے زالم ءُ زوراک چہ ما پُل اَنت ءُ ترا گِستہ کن اَنت۔
من گْوشت سکل جان مردم نہ گْوش اِیت کہ کیچ درامَد اِنت من ءَ انچش گُمان بیت کہ من ھم ھمے جاہ ءَ ودی بوتگ آں ءُ وتی کسانی ھم ھمے دِرمکاں گْوازینتگ۔
سُکل جان چْو مُدامی ئیں وڑ ءَ کندگے جَت ءُ گْوشت کہ کیچ پُل درامد نہ اِنت پرچے کہ بازار بِہ گِرد ترا پیماز وار باز رس اِیت۔ مارا دگہ کارے نیست بس ھمد کیچ ءِ بازار ویل اَنت۔۔۔۔۔۔
ب
بلے سکی جان!
مروچی باور بہ کن من ءَ تو چہ پیسریگیں مردم ءَ ھم گیش گیر پیداک ئے، پرچے کہ تو مرچی مئے کَش ءَ ساڑی نہ ئے، ما وتی مردم ءِ اَرزِشت ھما وھد ءَ زان اَنت کہ آ چہ ما گِستہ نہ بوتگ، مئے چاگرد ءَ گستہ بوگ ارزِشت ءَ گیش کنت۔
سکُل جان ھَر کج ءَ ئے، گل ءُ شادان بات ئے، تئی بِچکند ھچبر مہ پُرشات اَنت۔ تئی سر سلامت بات۔۔۔۔
منی دوا ھما ھمیش اِنت کہ تو دوبر زوت گْوں ھما بِچکنداں واتر بات ءُ بْیاھات ئے۔۔۔۔
بَد بَھتی سوگاتاں اِمبروز ءِ کَوار ءَ کنت
بِراتے کہ بہ بیت دژمن سد دژمن ءِ کار ءَ کنت۔
ما تئی ودار ءَ ھما پیم ءَ نِشتگ اَیں۔
