بیست ءُ ھپت جلکان( مارچ) پہ بلوچ راجءَ یک سیاہ ءُ تہار ایں روچے ءِ دروشم ءَ زانگ بیت۔ اے روچءَ ، بزاں بیست ءُ ھپت مارچ نوزدہ سد ءُ چلءُ ھشتءَ بلوچ راجءِ وت واجہی چہ بلوچءَ پہ پچگرگ بوتءُ ایردستی ءِ سانکل آئی ءِ پاداں مان لگو شگ بوت انت ۔ مروچی ہپتاد سال انت کہ بلوچ راج اے سانکلا نی سندگءِ ھاترا دژمن ایں استانءِ دیما چو راسکوءِ کوہءَ میلانک انت ۔ دژمن ءِ کوہ پروشیں زلم ءُ ذیادتیاں گُٹگیریں بلوچ راج گوں تمردے ءَ دیم پہ آجوئی ءِ گڈ ی منزلءَ جنزان انت ۔ تنی وھدے ہزاراں بلوچاں آجوئی ءِ راہ ءَ وتئی نگرائیں جان ببا داتگ انت کہ آئیانی تہاں پیرءُ کماش ،نوجوان، زالبول ءُ چُک ءُ چوریگ ہم ہوا ر اَنت ہمے رنگءَ ہزارانی ھسابءَ بلوچ ماں استانءِ سیاہ ءُ تہارایں کوٹیانی تہا گیر انسانی ھزیت سگگءَ اَنت۔ بلے دنیا ءِ راج دپتر ا ے گپءِ گواہ انت کہ راجی آجوئیءِ جنز پہ کشگءُ دور دیگ، پہ زور ءُ تاکتءَ اوشتءِ آماچ کنگ نہ بنت اگاں اے وڈ بوتیں گڈا امریکہ ءَ ویت نام ءِ آجوئیءِ جنز پروش داتگ اَت کہ انسانی راج دپتر ویت نام ءِ سرا بوہوکیں امریکہ ءِ زلم ءُ زیادتیانی ھنچیں کسہ آں کاریت کہ آ کسہ آنی ھِش کنگءَ پد ہلاکو خان ءُ چنگیز خانءِ رو پونڈے بنت ءُ آپءَ کپ انَت ۔ لھتیں راج دپتر بلد ماں ویت نام ءَ آجوئی ءِ جنزءِ وھد ءَ ویت نامی جھدکارانی سرا بوہوکیں امریکہءِ زلم ءِ داستانءَ درنگاز کنان ءَ گُشنت کہ امریکہ ءِ پوجیاں ویت نامی زالبولانی چُک دانءِ تہا سیاہ مار راہ داتگ ۔ بلے ماں دیست کہ ویت نامءِ آجوئیءِ جنزءِ دیم دارگ نہ بوت۔بلکیں امریکہ ءِ بیم ناکیں زلمانی سوبءَ ویتنامءِ آجوئیءِ جنز گیشتر ود اِت ۔ ءُ گڈسرا امریکہ ءَ ویت نامءِ آجوئی ءِ جنزءِ دیما پروش وارت۔ ماں ویتنام ءَ امریکہءِ پروش ورگءَ پد یک سھاپی ئے امریکہءِ ہما وھدءِ سر کماشءَ جست کنت کہ آ کجام سبب اِنت کہ امریکہ ءِ پیم ایں یک ٹو ئیں تاکتے ویت نامءِ نِزوریں لشکرءِ دیما بے وس بیت ءُ پروش وارت؟ امریکہ ءِ سرکماش پسہ دنت کہ اگاں مئے جنگ تہنا گوں ویت نامءِ پوجءَ بوتیں گڈا امریکہ ءَ ھجبر پروش نہ وارتگ اَت بلے ارمان کہ امریکہ ءِ جنگ گوں یک راجے ءَ بوتگ پمیشکہ امریکہ ماں ویت نام ءَ شکستءِ آماچ بوتگ۔
ہمے رنگءَ اگاں ماں ہندوستان ءِ راجی جنزءِ دپتر ءِ تاکانی سرا چم شانکے بدی انت گڈ ا اُودا ہمک لبز اینگریزانی ترسناکیں کَہرانی بُکچءَ بوج ایت ۔ ءُ اے درگتءَ جلیان والہ باغ ءِ ویل ھیدگہ کلیں ویلاں اَچ بیمناک تِر پدر بیت کہ اُودا جنرل ڈائر وتی مشن گنءِ دپ ءَ پَچ کنت کہ سہتے ءَ رند جلیان والہ باغ ءِ میدان ءَ ابید ھونءِ شاہ جوہ ءُ جو نءِ کتارءَ دِگہ ھِچ گندگءَ نہ اِت بلے ماگندیں کہ تاکت ءِ ءُ زوراکیءِ دیما ہندوستان ءِ راجی جنز نِزو ر نَتر اِت بلکیں ماں ہندوستان ءَ قابض ءِ ھلاپءَ نوکیں کینگءِ سیلابے ہار کنت کہ ہمے وھدءَ کسان سالیں بگھت سنگھ جلیان والہ باغ ءِ ھو ن لِپچیں ھاکا ں چنکے دستءِ مُچءَ کنت ءُ برٹش ءِ ھلاپ ءَ جدوجہد کنگ ءِ عہد کنت ۔ بلے برٹش سامراج وتئی دا یمی دودءِ ردءَ زلمءُ زوراکیءِ آس ءَ یک شلا جمبو ر دار یت ء ُ دیم تِرا ہمے زوراکیءِ رِدءَ بگھت سنگھ گوں سنگتاں پاہوءِ سادءَ درانجگ بوت ۔ بگھت سنگھ ءِ شھادت ءَ چہ پد ہندوستانءِ راجی جنز گیشترگرم تران بوت۔نوزہ سدءُ چِلءِ دھکءَ اے جنزءِ برانز ھَنچو تَبد گران بوت اَنت کہ میزان ، میزانءَ برٹش سامراج ءَ وتئی پاد پُشت جنان کت اَنت ۔آکِر کار پانزدہ گوپشان ، نوزہ سد ءُ چِل ءُ ھپتءَ ہندوستان ماں جہانءِ نکشہءَ یک آجوئیں استانےءِ دروشما سھرا بوت ۔ ھمے پیما برٹشءِ اَچ برصغیرءَ دراھگءَ رَند بلوچستان ءُ پاکستان ھم دو جُتائیں استانءِ شکلءَ دنیا ءِ نکشہ ءِ تہا جاگہ دیگ بوت انت( آ دگہ گپے کہ برٹشءَ پاکستان وتئی سیاسی لوٹانی پیلو کنگءِ ھاترا چہ انڈیا ءَ سِست ءُ جتا کُت) بلوچستان ءِ آجو بوھگءِ چند روچءَ رند پاکستان ءَ وت اے گپ منیتگ کہ آ بلوچستان ءِ وت واجہیءِ ارزشتءَ منیت ءُ آ بلوچستانءَ یک جتائیں ءُ آزاتیں استانےءِ چمءَ چاریت بلے اے مھلوکءَ پہ وتی ماتیں سرڈگار ہندوستانءَ نہ بوت آ چوں پہ بلوچاں وتئی زبانءُ لبزانی سرا مھکمیءَ اُشت اَنت۔بلوچ نوکی آجوئیءِ سارتیں ساھگءَ کرنی ایں ایردستیءِ درد ءُ دوراں اَچ گِسر بوھان اَ ت کہ پاکستانءِ شکلءَ دگہ بلَبلاء آپتے آتک ءُ بلوچ ءِ گردنءَ میلانک بوت۔ بزاں بلوچستان ءِ آجو بوھگءِ ھپت ماہ ءَ پد ، بیست ءُ ھپت جلکان، نوزدہ سدءُ چِل ءُ ھشت ءَ گیر پتری استان پاکستان ءَ بلوچ راج ءِ و ت واکہی ءِ سرا اُرش کُت۔ کہ کل بلوچ راج اے روچ ءَ یک سیاہیں روچےءِ بستارءَ گیر کار انت ۔ پرچہ کہ ا ے ہمے روچ اِنت کہ بلوچ ءِ پاداں گلامیءِ ریدگیں ریز مان لوپ کنگ بوت انت ءُ بلوچءِ زمین ءِ دلبند ءِ سرا درآمدانی پادانی تراپ آں درئیں دنیا سرا زورت ۔ہر نیمگءَ کُکار ءُ جاگ ، ہر نیمگءَ بمب ء ُ توپانی توا رءَ گلیں گلزمین ءِ دلبند جَکسینت ۔ گشے بشامی گرند اَنت کہ زمین ءِ دلبندءَ سُمب اَنت۔ اجگیں تپلانی جو ن اَنت کہ ماں آکوٹاں کپتگ انت ماتانی دلءِ آہ تلارانی بالاد ءَ لگ انت ءُ ھرشءِ پہناتءَ جکسین اَنت گوھار چہ نگرائیں برات آں زبھر بوت اَنت ءُ پِسانی ھَسا چہ پِساں پَچگر بوتاں ۔ماں بلوچ سرڈگارءِ دلبندءِ سرا اے دوزائیں آس محمد علی جناح ءِ ھکمءِ پدا جنرل اکبرخان ءَ جمبو ر کُت کہ آئیءِ آسرا سدانی ھساب ءَ پیر ءُ کماش ، چکءُ زالبول بمب ء ُ ٹوپانی آماچ کنگ بوت انت ۔ھمے نیامءَ پاکستانءِ یزیدی پوج ءَ ماں بلوچستانءَ یک مسیتے ءِ سرا ھم بمب ءُ ٹوپ گواری کوت پہ یے ھاترا کہ اے مسیت ءِ گمبندءِ سرا آزات بلوچستان ءِ بیرک مِک بیت ۔اسلامءِ نام ءِ سرا جوڈ بوتگ ایں استان ، پاکستانءِ اولی تراک ہمے مسیت ءِ سرا کپیت ءُ ترک ایت کہ چرائی ءِ سوب ءَ اے مسیت سر جمءَ شھید بیت ۔
بلوچ پاکستانءِ اے بدماشی ءَ نہ منیت ۔ آغا عبدالکریم ءِ سرکماشےءَ بلوچ پاکستانءِ قبضہ ءِ ھلاپ ءَ دیم پہ مات کوہاں رہادگ
بیت ۔پاکستان مزنیں ریپک ءُ ھیلائےءَ اَچ پد آغا عبدالکریم ءُ آئی ءِ ہمراں دزگیر کنت بلے پہ وتئی راجی آجوئیءِ بھالی ءِ ھاترا بلوچ ءِ اے کاروان روچ پہ روچ ودان کنت کہ روچءِ مروچی ھم بلوچ راجی جنزءِ اے کاروان دیم پہ مردانی منزل ءَ جنزان انت ۔ روزء اول ءَ بگر داں روچ ءِ مروچی ءَ پاکستان بلوچ راجی جنز ءَ زیر کنگ ءِ ھاترا بے کساسءَ ز لم ءُ زوراکی ءِ آس ءَ روچ پہ روچ جمبور کنان اِنت بلے ھَنچو کہ من بُرزا گشتگ اَت کہ راجی جنز پہ کشگ ءُ دور دیگ پہ زلم ءُ زوراکیءَ ھتم نہ بنت ۔ ہمے رنگءَ بلوچ راجی جنز ھم پاکستان ءِ کو ہ پروشیں زلم ءُ زوراکیاں چک پروش دنت ء ُ الم روچے نہ روچے وتئی گڈی منزلءَ روت ءُ سر بیت
