ھمگام بلوچی
سنجی جت کیچ ءِ دمگ شے زنگی نِگور ءَ جَتانی بازار ءِ نندوک بوتگ آ کدی ودی بوتگ اے چیز زانگ نہ بیت چُش کہ آ وھد ءَ کم مردم وانندہ بوتگ کہ چشیں روچاں یاداشت بہ کنت مئے بلوچ راج ءِ گیشتر یاداشتی سال چُش کہ پِلاں سال ءَ توپان بوتگ یا کہ پِلاں سال ءَ ھار بوتگ یا کہ پِلاں سال ڈکالی سالے بوتگ پِلان ءَ سال ءَ اے مردم ودی بوتگ مئے راج ءِ گیشتر (تاریخ) یاداشتی ھمے دروشم ءَ بیتگ۔ بی بی سنجی کدی ودی بوتگ ” روچ ءُ ماہ ءُ سال زانگ نہ بنت سنجی ءِ کماش ءِ نام ھسین اشرپ جت بوتگ ءُ آئی ءِ مات ءِ نام صابُک بوتگ واجہ ھسین اشرپ ءِ چار جنک زھگ بوتگ اَنت ءُ یک بچکیں زھگے کہ آئی ءِ نام پیرل بوتگ پیرل یک جنگے ءِ دِینّاں جَنگ بیتگ واجہ ھسین اشرپ بندات ءَ چہ زگری کیمونٹی ءَ چہ سیادی کنت چُش کہ ھسین اشرپ زگر یلہ کرت ءُ نماز بندات کرت گڑا آئی ءَ وتی درستیں کول ءُ زھگ بزانکہ وتی چک چاریں جنک ءُ یکیں بچک ءَ را ھم نماز کنگ ءِ سکین دات چُش کہ سنجی اے ھک ءَ نہ اَت آئی ءَ گشت کہ من وتی پت ءُ پیروکی زگر ءَ یلہ نہ کن آں چُش کہ سنجی سپت ءُ چوگان ءِ جنگ ءَ سک ماھر بوتگ ءُ آئی ءِ توار ھم سک وش بوتگ گڑا آئی ءِ کماش ءَ ھسین ءَ گشت کہ وھدے تو نماز نہ کن ئے گڑا من ھم ترا لوگ ءُ جاگہ بزانکہ سیر ءُ سانگ نہ دیاں ترا من لھتے بُز (رمگ) دیاں تو چارین اِش چُش کہ دگہ درد ءَ تو نہ ورئِے گڑا سنجی اے ھبر ءَ رازی بوت ءُ آ گوں مال ءُ دلواتاں دلگوش بوت گڑا سنجی ءِ سرجمیں زند گوں مال ءُ دلوتانی دمبالگیری ءَ شُت سنجی ءِ توار سک وش بوتگ آئی ءَ لھتے کلاسیکل شئیر یات بوتگ چُش کہ ھمل ءُ جیھند ءُ حضرت سلیمان ءِ کیا ءُ سدو ءُ ھانی ءُ شے مرید ءِ شئیر ءُ دگہ لھتے شئیر آئی چہ نواراں اش کرتگ انت ءُ آئی ءَ وتی دل ءَ یات کرتگ انت سنجی ءَ مدام ھمے شئیر جنگل ءَ رمگانی چارینگ ءَ دپگال کرتگ انت سنجی ءَ باز کم شئیر گوں ساز ءُ زیمل ءَ جتگ آئی ءِ ھسابی گوشتگیں شئیر گوں زیمل ءَ ھمل جیھند ئے ءُ حضرت سلیمان ئے ءُ حضرت علی ءُ کیا سدو ءُ ھانی ءُ شے مرید دگہ سے ءُ چار شئیر گوں وش تواری ساز ءُ زیمل ءَ گوں نوکیں دابے ءَ گوشتگ اَنت سنجی ءِ مستریں وش دروشمی اش بوتگ کہ آئی ءَ اے شئیر گوں وتی ترز ءَ گوشتگ اَنت وھدے کہ ائی ءِ کماش ھسین اشرپ وتی گڈی روچاں بیت گڑا آ سنجی ءَ لوٹاھینت ءُ گُش ایت کہ سنجی منی چُک من ءَ پَھل کن من ترا سور ءُ سانگ لوگ ءُ جاگہ نہ کرتگ من اَچ تو اے ردی ءِ پھلی ءَ لوٹ آں گڑا سنجی آئی ءَ را پسو دنت کہ منی ءُ تئی پھلی ھاوند ءِ درگاہ ءَ بیت ھساب ءُ کتاب ءِ روچ ءَ گڑا لھتے روچ گوز ایت ھسین اشرپ چہ اے دنیا ءَ روت سنجی ءِ سرجمیں زند گوں مال ءُ دلوتانی گوما گوستگ آ وتی رمگ ءُ مالانی گوما دلگوش بوتگ آئی ءَ وتی کار ءُ کسب درست وت کرتگ انت چُش کہ پسانی کاہ ءُ کدیم مزنیں کھیر ءُ چِشاں چہ ٹال ءِ بُرگ اے ھما کار انت کہ گیشتر مردین اش کن انت بلے سنجی ءَ وتی سرجمیں کار ءُ کسب وت انجام داتگ انت آئی ءِ بودناکی پیداوار بوتگ سنجی ءَ ابید چہ کلاسیکل شئیراں چہ ابید سوت ءُ نازینک، سپت ءُ چوگان ھم جتگ سنجی ءِ توار سک وش بوتگ سنجی دو ھزار چاردہ ءُ پانزدہ ءِ میانجی ءَ چہ اے کوڑھیں دنیا ءَ یلہ کنت ءُ روت پہ مدامی واستا سنجی ءِ توار ابدمان انت پہ راج ءَ آ مدام ھست ءُ نمیران انت سنجی ءِ گیشتر شئیر قادر جت ءِ گورا ھست انت چُش کہ سنجی ءِ زندنامہ ءُ کسہ چہ قادر جت ءِ گورا چہ اش کرتگ ۔
بلوچی ءُ بلوچستان سبزبات
