ـــــــ نبشتہ کار ـ چراگ رژن ــــــ
ھمگام نبشتانک
ما انچیں سپرے ءَ سرگپتیں دل ءَ ھیال ءُ جیڑگانی کورے ءَ ھار کرت وڑیں وڑیں ندارگانی اکس دیم ءَ میلانک بوت انت بلے سرگرگ ءَ پیسر ما نہ جیڑ ات اے سپر مارا تھنا کنت ءُ اے تھنائی مارا یکے دومی ءَ چہ گسر کنت، ھچ نہ زانتگ ات مئے میان ءَ بس ایوکی پش کپیت انچو نہ زانت کہ ایوکی مارا چو سیہ مار ءَ دجیت بلے چے کن ئے اے زندمان ءِ دستور انت ھما کار نہ بوھگی انت بیت ـ
سپر رواں ات ما گوں ھمک رنگیں کارستاں دچار کپان اتاں کدی اے شھر ءَ ءُ کدی آ شھر ءَ سپر جنزگ ءَ ات دگہ نوکیں کارستاں گوں دچار کپیں مزنیں مدتے پہ لاچاری ھمد ءَ گوازینگ بوت، بلے چہ کن ئے ما لاچار اتیں ءُ پدا مساپر اتیں مساپر ھر رنگ بے وسی بزگی ڈیک دے انت ـ
وھد گوزان ات ماہ ءُ روچ بدل بوان بوت انت روچ سالاں بدل بوت انت ما گوں اے نوکیں انچو آژنا بوتیں کہ گش ئے زاناں مارا کرنے بیت یکجاہ انت دیوان ات وشی ات ـ
برے برے گوں ٹھک ءُ کندگاں درائیں بازار سرا زرتاں کدی انچو ابیتکی ءَ مانشانت ھر نیمگ ھاموشی بوت کہ گش ئے ما کسے ءِ مَرگ ءِ پتر ءَ نشتگ اتیں، مئے میان ءَ نشتگیں درستیں مردم وتی تہا گار ات انت بلے ھر کسی جھد ھمیش ات بس یکے دومی ءِ لنٹانی بچکنداں گار بوھگ ءَ میل انت چوناھا درست گمانی گرنچاں بڑ ءُ بار اتاں ھرکس وتی تہا تھنا ات، ھورک ءُ ابیتک ات، کس ءَ اے پیش نہ داشت من تھناھاں ابیتکاں، درستاں لوٹ ات مجلس ءُ دیوان بدل بہ بیت داہم مجلس ءُ دیوان ات مئے تہ ءَ کسے اے گمان بوت مرچی یکے ابیتک انت گڑا درستاں وتی کار یل کت انت دیوانے ٹھینت ھما ابیتکی ءَ را گوں ٹھک ءُ کندگاں بدل کت ـ
وھد بدل بوان بوت چش کہ ما درست مساپر اتیں ھرکس پہ راھے درکپت بس تھنائی پش کپان ات درست رواں بوت انت ھرکس کہ مئے میان ءَ شت مئے تہا ابیتکی گیش بوان بوت ھرکس مونجا ءُ ملور بوت گش ئے اے جاہ ءُ دیار چو رسترے ءَ مئے ورگ ءَ پیداک ات، لھتیں پشت کپت لھتیں سپر ءَ رھادگ بوت باریں کجا شت انت ـ
ھمے میان ءَ من اوں سرگپتاں سپرے ءَ آ دگراں نہ زاناں بلے پہ من چنچو سنگین ات اے سرگرگ ءِ ساھت گش ئے پہ من سکرات ئے ساھت ات بہ گند ئے من ءَ چہ رند اوں باز ابیتک بوتگ آ ساھت ءَ بازیں وھد گوزگ رند شما شموشکار بہ بیت بلے من ءَ باور نہ کنت مئے میان ءَ نشتگیں یکے دومی بہ شموش ایت نوں من شمارا وتی ھال ءَ دیگ لوٹاں
من ھما روچ ءَ سپر ءَ سرگیپت آں ھما انت تھناھاں، ابیتک آں ایوکاں ملوراں ھما انت من نہ کند اتگ ات ھما وھد کہ ما ھور گوازینتگ ات آ درستیں کسہ من چو اکسے ءَ سنگارتگ دل ءِ دیوال ءِ دیما دراتکگ ھمک سھب پادکایاں ساپ ئے کناں اے یات ءُ گیرانی کسہ دنزیں مہ بنت ءُ تامور مہ بنت!!!!!!!
