ھمگام بلوچی
دری آب ءُ دری گال اے دو اَنت آب ھما کہ تئی توارینکانی توارءَ دینت ءُ ھمے آب وھدیکہ یکجاہ بنت گال جوڑ بنت ءُ ھمک راجانی زبان ءُ آیانی گُٹ ءُ. گلوانی توارینک جتا جتا انت ھرچ یک راجے ءَ وتی توارینکانی ساب ءَ وتی سیاھگ ءِ آب زرتگ ءُ وتی رھبند اش رد ءُ بند داتگ ءُ آ وتی ھِساب ءَ وتی سیاھگی آباں وتی توارینکانی آباں پہ وتی گالاں کارمرز کن انت ھمے آباں آ یکجاہ کن انت ءُ گالاں نبشتہ کن انت ءُ ھمے گال. یکجاہ بنت ءُ زبان ءِ دروشم ءَ کاینت ءُ ھمک راج وتی زبان ءَ پلگار اَنت باید ما ھم وتی آباں کارمرز بہ کنیں ءُ وتی زبان ءَ ھم بہ پلگار ایں بلے وھدیکہ درآمدیں آب ءُ درآمدیں گال مئے زبان ءَ جاہ کن انت ءُ مئے زبان روچ پہ روچ نزور بوان بیت ھمنچک درآمدیں گال مئے زبان ءَ ھوار بوان بیت مئے بلوچی ءِ جند ءِ زگریں گال گار ءُ بیگواہ بوان بنت درآمدیں گالانی آیگ سوب مئے ایرجیگی انت کہ ما درامدیں راجانی زبانانی وانگجاھاں وانگ ءَ ایں ھمایانی بازیں گالے ما پہ زانت یا نہ زانتی وتی زبان ءَ ھوار کنیں کہ کم کم ءَ آ مئے زبان ءِ تہ ءَ رواج گر انت کہ اے پہ مئے زبان ءَ سک تاوان انت باید انت کہ پہ زانت ما وتی زبان ءَ درآمدیں گال ھوار مہ کنیں ءُ وتی زبان ءَ وت تاوان مہ دئیں,
مئے بلوچی زبان ءِ وتی توارینکانی آب 25 آب انت کہ آ ایش انت,,
ا ب پ ت ٹ ج چ د ڈ ر ڑ ز ژ س ش ک گ ل م ن و ھ ء ی ے
چہ ایشاں ابید بلوچی ءِ تہ ءَ ھرچ آبے نبشتہ کنگ بیت آ دری آب انت ءُ آیانی توارینکاں ما بلوچ چہ وتی گُٹ ءُ گلواں کش ات نہ کنیں پمے ھاترا ما وتی جند ءِ توارینکانی آباں پہ وتی زبان ءِ گالاں کارمرز بہ کنیں کہ مئے زبان ءِ گالوار ساپ ءُ پلگار ءُ. شیرکن بیت ,
ھنچو کہ مئے سیاھگ ءُ رھبند ءِ آب انت ھمے پیم ءَ درآمدیں گال انت کہ مئے زبان ءِ تہ ءَ آیگ ءَ انت درآمدیں گالانی ھور کنگ ءَ مئے زبان ءِ شیرکنی روت ءُ مئے زبان گاجیل بیت چوشکہ باز مردم
بلے ،،جاہ ءَ اردو ءِ ،،اچھا ،،، ءَ کارمرز کنت
لوگ ءُ گس ءِ جاہ ءَ پارسی ءِ ھونہ یا اردو ءِ گھر ءَ گوش انت ءُ کارمرز کن انت ،،
ھیک جاہ ءَ انڈا
میتگ ءِ جاہ ءَ پارسیءِ روستا ءَ
یا اردو ءِ گاوں ءَ کارمرز کن انت
کارکرد ءِ جاہ ءَ اعمال ءَ نبشتہ کن انت
کارے بہ کن ءِ جاہ ءَ کام بہ کن گوْش اَنت.
بہ نند ءِ جاہ ءَ بیشین
کارمرز ءِ جاہ ءَ استعمال ،
درور ءِ جاہ ءَ ،،مثال،،
ءُ دگہ سدانی ھِساب ءَ درآمدیں گال اَنت کہ ما اِش گوْش این ءُ نبشتہ ئے کنیں کہ اِے درآمدیں گالانی جاہ ءَ مارا وت ءَ گال ھست انت بلے ما اے درآمدیں گالاں کارمرز کنگ ءَ ایں اگاں جاھے مارا وتی بلوچی زگریں گال دست نہ کپت ءُ نہ رس ات ءُ ناکام ءُ لاچاری ءَ درآمدیں گالے ٹٹ ءِ تہ ءَ کت ءُ نبشتہ کُت آ جتا گپے بلے مئے وتی گال ھَست انت ما اچھا ءُ ھونہ ءُ گھر ءُ بیگم ءُ ھانم ءُ مادر بگوش ایں یا نبشتہ بہ کنیں اے گال مئے زبان ءَ ھوادگ کن انت مئے زبان ءِ شیرکنی گار ءُ بیگواہ بیت مئے زبان درآمدیں زبانانی تہ ءَ چیر تَر اِیت اد ءَ باید انت پہ تپاکی ما واجہ سید ھاشمی ءِ رھبند ءَ وتی بہ کنیں ءُ ھمائی راست ءُ تچکیں رھبند ءَ وتیگ بہ کنیں کہ اے رھبند مارا, چہ درآمدیں آب ءُ درآمدیں گالان رکین اِیت مئے زبان ساپ ءُ پلگار بیت مارا ءُ شمارا سیاھگی رھبندے نام ءَ بیت مارا درآمدے بے سیاھگی بے رھبندی ءِ شیگان ءَ نہ جن اَنت کہ شما تنیگہ وتی سیاھگی رھبند ءِ سر ءَ تپاک نہ کتگ اے بارو ءَ مارا ءُ شمارا جُھد کنگی اِنت ھمے رھبند ءِ سر ءَ تپاک کنگ لوٹ اِیت کہ مئے زبان ءِ لوٹ ھمیش اِنت اگاں نہ مئے زبان ءَ باز تاوان رس ایت چے ءَ کہ یکے درآمدیں آبانی کارمرزی انت کہ مئے زبان گاجیل ءُ ھوادگ بیت ءُ دومی درآمدیں گال اَنت, مئے بازیں ادیب ءُ زانتکار ھمے گوش اَنت کہ اے سیاھگ ءِ تہ ءَ نزوری ھست اگاں نزوری ھست نزوریان شون بہ دے اِت بلے نزوریاں شون دات ھم نہ کن انت ءُ سید رھبند ءَ جوانی ءَ نہ وان انت بس گوش انت کہ اے رھبند نزور اِنت اگاں دومی بر ءَ بگوش اِت کہ واجہ نزوریاں شون بدئے گُڑا اوپارے سر ءَ روت سید ھاشمی مریدی نام ءَ پربند ایت منی واجہ مریدی گپ نہ اِنت پیسر ءَ رھبند ءَ جوانی بوان ءُ بلوچی زبان ءَ سرپد بہ بو اِنا واجہ سیاھگ ءِ رھبند ءَ نہ وانیت ءُ وت ھم چیزے شون دات نہ کنت بلے وتی ایراد ءَ گیپت ما اے ھبر ءَ سرپد ءُ زان اِیں کہ
ھچ زبان ءُ لبزانکے نیست کہ آئی ءَ دری گال ءُ لبز مان مہ بیت.ھمک زباناں چہ وتی ھمساھیگیں زباناں لھتیں گال سوگات رس اِتگ بلے راجے لوٹ اِیت کہ وتی زبان ءَ ساپ ءُ پلگار بہ کنت گُڑا دری گالاں کارمرز مہ کنت ءُ جھد بہ کنت کہ وتی زبان ءِ گار ءُ بیگواھیں گالاں شوھاز بہ کنت ءُ وتی زبان ءَ رواج بہ دنت. بلوچ راج مدام گوں وتی زبان ءُ دود ءُ ربیدگاں ایماندار بوتگ اَنت اگاں ناں گُڑا دژمناں دیری مئے زبان گاری ءِ سیمسراں بُرتگ اَت بلے مئے راج ءِ زبان دوستی اِنت کہ مئے لبزانک روچ پہ روچ دیم ءَ روان اِنت ءُ مئے کماش ءُ زانتکار زبانءِ پاھازگ ءِ جھد ءَ اَنت ءُ مئے کاروان دیم پہ منزل ءَ گام جنان اِنت ءُ زبان وتی راہ ءَ وت گیش ءُ گیوار کنت ءُ دری گالاں وت درکنت اگاں کس ئے وت دری گال کار اِیت بلوچی زبان ءَ ھوار کنت گُڑا بزاں اسپیتیں گد ءِ سر ءَ سھریں پُچّے جوڑ دیگ بیت ءُ لبگے جنگ بیت کہ آ اسپیتیں گد بڈول بیت ءُ دری گالانی ھوار کنگ پہ بلوچی زبان ءَ تاوان اِنت.
ھنوگیں وھد ءَ مئے زبان ءِ آزمانکی نوکیں دروشم باز دیم ءَ روگ ءَ اِنت ءُ باز جوانیں وڑے ءَ نبشتہ کار ءُ ندکار تکنیکی رھبنداں گیش ءُ گیوار کنان اَنت ءُ مئے بلوچی آزمانک باز وشیں وڑے دیمروی کنان انت.
ھنوگیں وھد ءَ بلوچی زبان ھرچ میدان ءَ دیمروی کنان اِنت آ لچہ کاری بہ بیت یا رم نویسی بہ بیت یا تامر ساچی بہ بیت بلے ھرچ یکے وتی وڑ ءَ نبشتہ کنگ ءَ ایں رھبند ءِ ھیالداری کس نہ کنگ ءَ اِنت اگاں نہ بلوچی زبان ءِ باندات باز رژناہ اِنت امیت کناں کہ بلوچ راج ءِ ھمک مردم ءُ ادیب ءُ زانت کار وتی وتی زمہ واریاںَ سرپد بنت وتی بھر ءِ کار ءَ بہ کن انت بلے جھد بہ کن انت دری آب ءُ درآمدیں گال کارمرز مہ کن انت چے ءَ کہ بلوچی مئے وتی شھدیں زبان اِنت ءُ مئے پجار اِنت.
