ھمگام بلوچی
چراگ رژن
من زندگی ءِ بابت ءَ انچو نہ زاناں کہ زندگی ءِ سرا گپ بہ کناں یا بلکیں تو بگش کہ ھچ نہ زاناں زندگی ءِ باروا بلے من امنچو زاناں زندگی درد ءُ گمانی دیار انت اد ءَ ھمک گام ءَ نوکیں گمے باتن ءَ جاہ جنت چو کوہ ءَ مک بیت ھزاراں جیڑہ تئی دیم ءَ چو دیوال ءَ مک بنت بلے ترا دلپروش بوھگی نہ انت زندگی داتگیں ٹپاں وھد وت درمان کنت، ترا ھمے درد ءُ گم ءُ جیڑھانی میان ءَ پہ وت راھے شوھازگی انت وت ءَ را زندگ دارگ ئے ھاتر ءَ ترا یک کدمے دیم ءَ ترا جنزگی انت
بلکیں اے ترا جیڑگی نہ انت منی مرچی چون گوزگ ءَ انت یا باندات منی چون گوز ایت بلکیں ترا پہ وت یک راھے گچین کنگی انت انچیں راھے گچین کنگی انت کہ آ تئی سرجمیں زندمان ءِ مول ءُ مراد بہ بیت تو ھما وھد ءَ داں دلپروش نہ بہ ئے تو پہ وت یک انچیں راھے گچین کن ئے کہ آ تئی زندمان ءِ مستریں مکسد بہ بیت
برے برے مردم ءِ سرا انچیں کزا کپ انت مردم آ ساھت ءَ پہ وت چاریں نیمگ آں ھچ نہ گند ایت بے وس ءُ لاچار بیت آ ھمے سما کنت منی زندگ بوھگ ءِ ھاجت ھلاس بوتگ انت بلے وھدے ترا مکسدے بیت وھدے ترا کہ مکسدے دیم ءَ ایر بیت گڑا تو ھچبر اے نہ جیڑئے من ءَ پہ زندگ بوھگ ءَ ھچ پش نہ کپتگ یا من ءَ زندگ بوھگی نہ انت بلکیں تو ھمے ھیال کن ئے من یک راھے گچین کتگ آ راہ منی زندمان ءِ مستریں مکسد انت تئی مکسد مسالے بزور بلوچستان ءِ آجوئی انت یا دگہ دروشمے ءَ انت تو ھمے مکسد ءَ دیم ایر کن ئے جنزئے، داں ھما وھد ءَ تو دلپروش نہ بہ ئے دان کہ ھما مکسد ءَ ھاسل نہ کن ئے ھمے مکسد ترا دیم ءَ جنزگ ءِ سکین ءَ دنت
ما یک انچیں چاگردے ءَ زندگیں ھود ءَ بزگی،نزوری، درتہ پچی لاپ ءِ ھاترا در پہ دری انت، دومی مستریں جنجال گلامی انت کہ چو پاھو ءِ ساد ءَ مئے گٹ ءَ لوپ انت مئے چاگرد ءِ اندر ءَ ما مدام گندگ ءَ انت کسانیں ورنا وتکشی کنگ ءَ انت منی ھیال ءَ اے وتکشی ءِ مستریں سبب گلامی انت بلے دگہ مستریں سببے ایش انت وھدے کہ ھمے ورنا کہ رُدیت مزن بیت ھمے بزگی ءُ گژنگی ءِ تہ ءَ لاپ ءِ شوھاز ءَ در پہ در بیت یا ھمے جنجالانی گرانیں بار ءَ سگ ات نہ کنت وتکشی کنت پرچا کہ آ پہ وت مکسدے شوھاز ات کت نہ کن انت آ داں زندگ انت ھمے یک ءُ دو ءِ تہ ءَ انت نہ زان انت ما چے بہ کناں یا تو گشت کن ئے نا وانندگی ءُ زانت ءُ زانگ ءِ کمی ھم ھست انت پمشکہ لھتیں ورنا وتکشی ءَ پہ وت جوانیں راھے سرپد بنت منی جند ئے ھیال انت کس ئے تپاک کنت یا نہ کنت
