ہمگام، نبشتانک
زندگی یک کَسّہ ئے تئی دست ءَ نبشتہ بیت یا منی، اِے شئے ھچ پرک ءُ دَرک نہ داریت، بس کارستاں زندگ بوؤگی اِنت ۔ شاکر، کہ ویران ایں ھَندّے کہ اودا تہنا یک اسکول ئے اَست یک کسان ئے میتگ ئے، ھمودا ودّی بیت۔ ھمودا تہنا پَنچّ کلاس ءَ داں وانینگ بیت، گیشیں وانگ ءُ زانگ ءَ شہر ءَ رؤگ کپیت شہر ءِ تہا پدا وتی گِسّ ءَ چہ دُور بوؤگ لوٹیت۔ شاکر پنچّ کلاس ھمدا پاس کنت دیما نزیکیں شہر پسنی انت کہ اِے شہر ءَ چوناھ ءَ زانتکار ءُ ادیب سک باز اِنت۔ چوناھ ءَ اِے شہر ءَ اگاں لبزانکی گِسّ گُشگ بہ بیت ھم منی نِزّآں ردّ نہ بیت ۔ سنگت شاکر عیدو ھمودا پہ گیشیں وانگ ءُ زانگ ءَ رؤت داں ھمودا وتی دھ ئیں جماعت آں سرجم کنت۔ ھمے وھدا کہ وانگ ءِ ھاترا پسنی ءَ سر بیت، گُڑا ھمودا شہید ھنّیپ کہ ھما وھدا بی ایس او پسنی یونٹ ءِ سرکماش بیت، ھنّیپ وت کارست ئے ءِ نام اِنت، ھنیپ ءِ گْورّا نندگ ءُ پاداھگ ءَ پد سنگت بی ایس او ءِ یک باسک ئے جوڑ بیت۔ چوناھ ءَ شہید شاکر یک قوم دوستے ءَ اَبید یک جوان ایں سنگتے ءَ ھم ۔ سنگت شہید ھَنیپ بلوچ ءِ نگیگیں جاوراں چہ درکپئگ ءَ رند شہید شاکر عیدو پہ بی ایس او آذاد ءِ سرکماشی ءِ ھاترا درچِنگ بوت ۔ کسان ایں مُدّتے ءَ سنگت ءَ دیم ءَ آھگ ءَ پدا یک یونٹ ئے دارگ ،سنگتانی گچین، پارٹی سمبھالگ سنگت شاکر ءَ پہ جوانی داشتگ اتاں۔ وھد ءِ روانی ءَ پَد جاور انچو نگیگ بوان بوتاں نُو ھرچ ھالت ءَ گراؤنڈ ءَ چہ درکپئگی اَت۔ بازیں سنگتے شہید بوتگ اَت، بازینے چِست بوتگ اَت، بازیں سنگت چیر اَت۔ شاکرا ھم وتا چیر دات۔ نو سر زاھری کار بوؤگ ءِ ھچ وڑ ءُ پیم نیست اَت داں مُدّتے ءَ سنگت ءَ وتا گوں بی ایس او ءِ باسکاں ھمگرنچ کُتگ اَت ۔ وھد ءِ روانی، ھالتانی انچوش بوؤگ سنگت ءَ گلزمین ءِ گلامی ءِ درداں انچو نگیگ کُتگ اَت کہ سنگت ءَ الّم نُو سلاھ بندیں گَلّ ئے ءِ باسک بوؤگ کپت۔ کِسہ انگت کُجا ھلاس بیت ! کِسّہ ھمیش اِنت دیم ءَ اِنت ۔ سنگت 2011 ءَ سلاھ بندیں گَلّ بی ایل ایف ءِ باسکے جوڑ بیت سنگت ھمودا اوتاکی چُلّوپگ بہ بنت یا جنگ ءِ پِڑّ سنگت وتی زمہ واریاں ھرچ جاگاھ ءُ ھرچ ھساب ءَ پیلّہ کنت ھما وھدا شہید سنگت شاکر ءِ سیاسی اختلاف بنت گوں بی ایل ایف ءَ، بگندئے سنگت ءَ ھمے جیڑ اِتگ سبر ءِ بُن شیرین اِنت داں مُدّتے ءَ جیڑھ ھَلّ بوؤگ ءِ نام ءَ نہ زانگ ءَ تاں 2015 ءَ سنگت آودا چے درکپیت ءُ بی ایل اے ءَ کئیت اِدا ھم وتی ھرچ زم واریے کہ سنگتاں داتگ، وتی زمہ واریانی سرا بوتگ ۔ شہید یک درویش تَبّیں سنگتے اَت، مُدام وتی دل ءِ گپ شاعری ءِ زبان ءَ گوان سنگتاں پَدّر کُتگ اتاں۔ جوانیں شاعری وتی راج ءِ ستاھ ، سیاسی اختلاف ، بَدّانی زُلّم ءُ زوراکی ، برات دُروشم ایں دژمنانی کارست شہید ءَ مُدام کلم بند کُتگ اتاں بزاں کہ شاعری زبان ءَ درشان کُتگ اتاں ۔ وھدئے ھمے برات ءِ جامگ ءَ دژمن کہ کسے بوت بزاں مار آستونک ءَ اِنت کُجام ھم وھدا ھمے سیاہ مار مردم ءَ ڈنگ جنت گُڈ سرا شیر وارینتگیں مار ءَ وتا پیش داشت، سنگت مجبور کُت بیا اِیردست بُو، شہید ءِ گِسّ مردم باز مجبور کنئگ بوتاں، بگندے بیہار دئیگ بوتگاں۔ چوناھ ءَ ھم پیسرا باز رندا شہید ءِ لوگ ءِ سرا لشکر کَشّی بوتگ، لوگ ماندارگ بوتگاں ۔ وھدئے پِگّر زورگ بوتیں کہ گُڑا دنیا ءَ سائنسدانانی یا آرٹسٹانی پِگّر بہا زُرتگ اَت ۔ اِے پِگّر چہ انسان ءَ بُنّ اَزّلی گون بیت یا چاگرد ءَ چے اِبزّ اِش کنت ۔ شاکر ءَ وتی راج ، زمین ءُ زبان ءِ پِگّر اَت اِے انچیں کارست ئے کہ مردم لکھ آں وتی زمین ءَ پہ ھون ریچ اَنت اِے زمین ءِ ھساب اِنت اِشئی ءَ گُڈ سر نیست آجوئی جنئگ ءَ زمین ءِ پہازگ بہ بیت یا آجو گپتیں سرزمین ءِ سرا دگرانی لشکر کشی یا راجی تاوان باری ءِ جنگ ۔ زمین پہازگ ءِ جنگ انچیں جنگے کہ اِے پِڑّا ڈاکٹر ، ماسٹر ، ادیب ءُ زانتکار ، سائنسدان ، آرٹسٹ زید ءُ بکر کُلاں اِدا قربانی دئیگ کپیت۔ زمین ترا تئی پجّار ءَ دنت زمین ترا پہازیت انچوش کہ مات وتی چُکّ آں پہازیت پدا چُکّانی ھم زمہ واری بیت وتی مات ءِ پہازگ ءَ کساس نیم زمہ واری پِیلّہ بہ کن اَنت ۔ پہ زمین پہازوکیں انسان ھچبر گار ءُ گمراھ نہ بنت دُرست گار بنت کارست زندگ مان اَنت ھمے کارستانی نبشتہ کار بزاں اسل نبشتہ کنوک زندگی کن اَنت بِلّ کہ اِے مردمی ھساب ءَ مئے دیم ءَ نہ اَنت بَلے آھانی سوچ آھانی ھرچ ھما کار کہ گوں آھانی کارستاں بندوک اِنت آ مئے دیم ءَ اَنت مارا چے رند مئے پُشپدانی دیما بنت ھمئے ھساب ءَ پُشپد داں پُشپد زندگ مان اَنت ھمے وڑا گُشنت ماتیں زمین ءِ پہازوک ھچبر گار نہ بنت ۔ من دو دانک نبشتہ کُتگ پہ آجوئی ءِ سرمتاب آں دو دانک پہ وتی ماتیں زمین ءِ شہیدانی نام ءَ ۔ اِے بس دو لبز اَنت چاناھ ءَ من آھانی کارستانی سرا ھچبر نبشتہ کُت نہ کناں پرچہ کہ اِے ھما اَستی اَنت اِشانی کارست وت زندگی کنگ ءَ اَنت ۔
