ھمگام بلوچی
سنگت ھیر بیار ءِ بیان ءِ سرا تاج بلوچ ءَ اِیراد گپتگ ءُ گُشتگ کہ ’’دنیا ءَ را پہ دُنیا ءِ نکشہ ءِ پروشگ ءَ رازی کنگ سِپارتکاری لوٹیت، کہ نیست۔ مُلک پہ بیان پروشگ نہ بنت۔ آ ھم بیان وتی ویبسائیٹان اَنت‘‘۔ تاج بلوچ ءِ دومی اِتراز ھمیش اِنت کہ سنگت ھیربیار ءِ اِے ’’رنگیں بیان بازی مُلکءَ (دنیگہ) پَشکپتگیں مردمانی اَزاباں گیشتر کن اَنت ءُ بَسّ‘‘۔
پہ مُسبتیں نگدکاری ءَ باید مردُم ریا ءُ رو مہ کنت، تاج بلوچ ءِ گپ ءِ تہ ءَ شرتریں ٹک ھمیش اِنت کہ سِپارت کاری نیست۔ بزاں سجھیں جیڑہ ءِ بُن سِپارتکاری نہ بووگ اِنت۔۔۔ من زاناں تاج ءَ ایشی سوْبانی بابت ءَ جیڑاِتگ، وت یک conclusion یا سوّڑگی ءَ ھم سر بوتگ سوْب چی اِنت کہ سِپارتکاری نہ بوتگ ؟؟ ادا اولی گپ ایش اِنت کہ تاج بلوچ ءَ اے گپ مَنّ اِتگ کہ سِپارت کاری دنیا ءِ نکشہ ءَ بدل کنگا جھان ءَ رازی کنت بَلے بکول آئی یے نیست اِنت۔
تاج بلوچءَ اے گپ چارگی اِنت کہ آئی ءَ وتا ادارھے بزاں پارٹی یے ھست ، سیکریٹری کارجھے ھست، تنزیمّے ھست، آ گُڑا پرچہ سوبین نہ بوتگ اَنت پہ سِپارت کاری ؟ منا یاد اِنت ڈاکٹر اللہ نزر ءَ ھم یک رندے گُشتگ اَت کہ سِپارت کاری نیست۔
نو گپ ایش اِنت اِیشانی ادارہ ءَ ھیربیار مری ءَ نمائندگی ءُ زمہ واری نہ داتگ کہ آ ھمایانی گپت سرا سِپارت کاری بہ کنت۔۔۔ ھیربیار وتی وس ءَ سِپارتکاری کنگا اِنت ۔۔۔ من ءَ یات اِنت۔
منی ھیالءَ ۲۰۱۱ بی این ایم ءَ ھمّل ھیدر ءَ را زمہ واری دات کہ آ بروت لندنءَ سِپارت کاری بہ کنت، بلے مرچی بازیں مُدتّے گوْستگ ، ھچ نہ کرتگ اِش آئی سنگت گوں آئی ءَ رازی نہ اَنت۔ برھال چو گندگ ءُ زاھر ءَ ھچ نیست۔۔۔ گوکہ بکول ایشانی، ایشانی گورا ادارہ ھَست، بلے انگت سِپارت کاری ءِ نیستی ءَ نوکی مارگّ ءَ اَنت۔۔
راستی ھمیش اِنت کہ ایشانی ڈنّی لشکر ءِ سِپارت کاری وتی جاگہ ءَ ، مرچاں ڈاکٹر ساب ءَ جنگ ءِ سرا ھم مُناپہ کُوری ءِ بابت ءَ گلگ داریں ٹویٹ کُتگ۔۔۔ ڈاکٹر ءَ نام وا نہ گپتگ بَلے زانوک زان اَنت کہ ڈاکٹر کئے ءَ گُشگا اِنت۔۔۔۔
پدا بُن گپ ءَ کایاں سِپارت کاری ھوالہ ءَ منی ھیال گُشّیت کہ سِپارتکاری چُکّی لئیبے یا ھلو ھالوے نہ اِنت کہ ھرکس کُرت اِش کنت، یا یک پارٹی یے تھنا کرت اِش کنت۔۔۔ انچو کہ تاج بلوچ ایشی اھمیت ءَ وت سرپد اِنت۔ ھمے وڑا پہ سِپارت کاری کنگا ترا آزاتیں مُلکانی سربراھاں سرپد کنگ ءُ رازی کنگ کَپّ اِیت کہ آ تئی ھمایت ءَ بہ کن اَنت ، گُڑا آ الم ءَ وتی آزاتیں راجانی نمائندگ بنت، آھاں راجی منڈیٹ گون ، آ اِے چار اَنت کہ ترا گُڑا راجی منڈیٹے گون یا ناں؟
من گُشاں نہ سنگت ھیربیارمری گورا راجی اجتمائی منڈیتے ھست ءُ نہ کہ نواب براھمدگ بگٹی گورا ھست، ھمے وڑا نہ بی این ایم ءِ درملکی جاھگیراں راجی منڈیٹے گون۔۔
راجی جُنز ءِ مستریں اسٹاک اولڈر پِرّی بلوچستان موومنٹ ، بی آر پی ءُ بی این ایم اَنت۔۔۔ تاں اے سئیں آزاتیں سیاسی پارٹی وتی وتی منڈیٹاں یک ھند نہ کن اَنت یک سِنگل راجی منڈیٹے نہ ٹھین اَنت، یک اجتمائی ھورّیں مشترکہ سیاسی کیادتے دیم ءَ نیار اَنت۔ ھچ وڑیں موسریں سِپارتکاری بوت نہ کنت،۔۔ بچار! دنیا تھنا ھما راجی نمائندگاں گوں ٹوک کنت، آھان ءَ راجی منڈیٹے گون بہ بیت، دئے ءُ زیرے کرت بہ کنت، الگ پارٹی یا تنزیمّی مردمانی رزلٹ ھمیش اِنت کہ مئے دیما اِنت۔، کمو جیڑگی گپّے کہ تو روئے دکان ءَ پودنیے زورے ترا پہ ایشی ءَ کلدارے دیگ کپیت یا انا؟ پہ مُپت کس ترا سِپارتی سپورٹ نہ دنت، داں تو دگرانی گپّاں مہ مَنّ ئے ! نوں اراں تاج بلوچ اے بابت ءَ تپاک کنت کہ سِپارت کاری ابید چہ راجی اجتمائی سیاسی کیادت ءَ بوت نہ کنت؟
سنگت ھیربیارمری ءَ باز جُھد کتگ کہ یک اجتمائی سیاسی کیادتے دیما بئیت، بلے بدکسمتی اِنت کہ رکاوٹ باز دیم اِش اتکگ، او انگت ھم آئی پارٹی پالیسی ھمیش اِنت کہ راجی ھورکاری بہ بیت، اِے بابت ءَ تاج بلوچ سرپد اِنت کہ چے کنگ لوٹیت۔۔۔
دومی نیمگا تاج ءِ اے گپ کہ سنگت ءِ بیان بازی مُلک ءَ (دنیگہ) پَشکپتگیں مردمانی اَزاباں گیشتر کن اَنت ءُ بس‘‘۔ من تپاک نہ کناں پرچہ کہ دژمن ءِ زوراکیانی دیم داروک راجی اجتمائی کُوّت اِنت۔ اے بابت ءَ ھمے اَنّوگاں ڈاکٹر اللہ نزر ءَ بیان داتگ اَت کہ دژمن ءِ زوراکیانی دیمپانی ھاترا بلوچ راجی تاکت یک ھند بہ بیت۔۔ گُڑا دژمن ءِ دست دارگ نہ بنت۔۔ ادا بوت کنت تاج دگہ نیمگا اشارہ کنت۔
بلے ادا تاج بلوچ ءَ ھم اِے زانگی اِنت کہ آیا مُلک ءَ مردُمانی سرا بے سودیں وتکُشّیانی سَوَب ءَ ازیت گیشتر نہ بنت، سرمچارانی اُرشانی سَوَب ءَ گیشتر نہ بنت بس سنگت اگاں بیانے دنت یاں ٹویٹے کنت گُڑا مُلک ءَ مردُم ازیت بنت؟ یاں گُڑا اے کبول کنَگ ءَ اَنت کہ آیانی “ھملّی کاراں” اینکس ارزشت نیست کہ سنگت ءِ بیانے ءَ ھست۔
نو پہ تاج بلوچ ءَ ارز ایش اِنت کہ یک نیمگے ما راجی کُوّت ءَ یک ھند کنگا تیار نیاں، بلے دومی نیمگا دنیا ءِ سِپارتی کچ ءُ کیل ھمیش اِنت کہ تاں مئے تہ ءَ یک راجی سیاسی کَیادتے دیما مہ اِت ءُ راجی منڈیٹے گون بہ بیت دنیا مارا گوش نہ داریت۔ سیمی نیمگا ما اتراز ھم کن اِیں کہ سیاسی بیان چیا دئیگ بوتگ کہ چہ ایشی ءَ راج ءَ تاوان رسیت؟
گُڈ سرا من یک گپے ادا گیشینگ لوٹ آں کہ مئے راج ءَ لٹ بے ھِساب ءَ وارتگ ءُ انگت کَمّی نہ انت ھم۔۔ بلے یک روچے الّم کئیت مارا ارو برو یک راھشونے ءَ راجی منڈیٹ دئیگ کَپّ اِیت تانکہ دنیا ءِ دیما راجی نمائندگی ءَ بہ کنت۔۔۔ آ راھشون تُرْی سنگت ھیربیارمری بہ بیت، ڈاکٹر اللہ نزر بہ بیت یا نواب براھمدگ بگٹی۔۔۔۔
منت وار۔
