برلن (ھمگام نیوز) ایرانی ایردستیں بلوچستان ءَ کبزہ گیریں ایرانی پُلوس ءِ اپسرے ءِ دست ءَ یک کسان سالیں جنکوے ءِ سر ءَ جنسی زوراکی ءَ چہ پد جاور نہ گیگ اَنت ءُ زاھدان یک جنگجاھے جْوڑ بوتگ۔ اِے ویل ءَ را یک سالے ءِ سرجم بوگ ءَ پد آجوئی بلوچستان جُنز (ایف بی ایم) ءَ یورپ ءَ ھوار برتانیہ، امریکہ ءِ تہ ءَ جُتائیں دروشم ءَ مراگش ءِ جار جتگ، اِے درگت ءَ گنجی ءِ روچ ءَ بزاں 23 تومشان ءَ جرمنی ءِ شھر ھیمبرگ ءَ ایرانی سپارتھانہ ءِ دیم ءَ زھرشانی کنگ بوتگ، اِے زھرشانی ءِ تہ ءَ الاھواز ءِ آجوئی دوستیں رھشوناں ھوار کرد آجوئی دوستاں ھم بھر زرتگ۔
زھرشانی نیمروچ ءِ ساھت 2 ءَ بندات بوتگ تاں بیگہ ءِ ساھت 4 ءَ برجاہ بوتگ۔ زھرشانی کنوکاناں جُتائیں بینر ءُ پلے کارڈ دست ءَ بوتگ اَنت کہ آیانی سر ءَ زاھدان ءِ شھمیرانی اکساں چہ ابید جُتا جُتائیں اوگام نبشتہ بوتگ۔
زھرشانی ءَ آجوئی بلوچستان جُنز (ایف بی ایم) ءِ باسکاں چہ ابید کُرد ءُ الاھواز ءِ رھشونانی مزنیں کساسے ءَ بھر زرتگ، زھرشانی ءِ وھداں زھرشانی کنوکاں ایرانی استان، ملا رجیم ءُ ناشرکاریں لشکر ءِ بگیری ءَ گْوں تُرندی ءَ اوگام جتگ۔ تران کنوکاں تران کنان ءَ گْوشت کہ ایران ءِ ایردستیں بلوچستان ءِ تہ ءَ ایرانی لشکر ءَ بے میاریں بلوچانی سر ءَ تاگت کارمرز کنان ءَ سد ءَ چہ گیش بلوچ کُشتگ ءُ دگہ سدانی کساس ءَ زدگ کرتگ، بازیں بلوچے دزگیر کرتگ ءُ گْوں وت برتگ اَنت، اِے ھما روچ اَت کہ وھدے ایران ءِ ایردستیں بلوچستان ءِ تہ ءَ ایرانی لشکر ءِ کارندھے ءِ دستاں یک کسان سالیں بلوچ جنکوے ءِ سر ءَ جنسی زوراکی ءِ بگیری ءَ زھرشانی کنگ بوتگ اَت، زھرشانی ءِ بے سوب کنگ ءُ ھلاس کنگ ءِ ھاتر ءَ ایرانی لشکر ءَ لٹ ءُ کٹ ءُ تاگت کارمرز کرتگ اَت ءُ بے میاریں بلوچانی سر ءَ تیواری گواری کرتگ اَت، ایران ءِ ایردستیں بلوچستان ءِ شَھر زاھدان ءَ چہ بندات بوتگیں زھرشانی ءِ سان ءَ اِے ھَند ءِ تہ ءَ لس مھلوک ءَ را پاد کرت، ایرانی لشکر ءَ ایشانی ایرموش کنگ ءِ ھاتر ءَ شیلنگ کرت ءُ درزنانی کساس ءَ مردماناں کُشت ءُ سدانی کساس ءَ زدگ ئِے کرت اَنت، اِے درچ انگت ءَ برجاہ اِنت۔ لس مھلوک ءَ را اِے پیم ءَ تیرانی آماچ کنگ ءُ شیلنگ کنگ ایوک ءَ بنی آدمی اگبالانی لپاشگ نہ انت بلکیں بلوچ راج ءِ بلاھیں چکچینی یے۔
تران کنوکاں دیمتر ءَ گْوشت کہ ایران ءُ پاکستان دویں بلوچ سرڈگار ءِ سر ءَ زوراک ءِ دروشم ءَ اَنت ءُ بلوچ راجی مڈیاناں لُٹگ ءَ برگ ءَ اَنت، وتی کبزہ گیری ءَ را برجاہ دارگ ءِ ھاتر ءَ ھر وڑیں زوراکی ءُ ترسناکیں سرشونیانی کارمرز کنگ ءَ پہ چک ءُ پد نہ بنت۔ چُشکہ پاکستان تبکی، رنگ ءُ نسلی، مزنی ءُ کسانی ءِ تپاوت ءَ چہ ابید بلوچ راج ءِ چکچینی ءَ کنگ ءَ اِنت، ایران ھم یک زوراکے ءِ بستار ءَ ھمے سرشونیانی سر ءَ گامزن اِنت، ایشی ءَ چہ پیسر ھم ایران ءِ سرکار ءَ سدانی کساس ءَ بلوچ ورنایاناں پاھو ءِ ساد ءَ گْوں دِرتکگ ءُ چار راہ ءِ سر ءَ آیاناں پاھو داتگ ءُ کُشتگ۔ گْوستگیں سال ءَ ھونین زاھدان ءَ برجاھیں کُشت ءُ کوش ءُ زوراکی ءِ درچ چہ دِھکاں برجاھیں زلم ءُ زوراکی ءِ درچ ءِ شانک اِنت۔ زھرشانی ءِ تہ ءَ الاھواز ءُ کردانی رھشون گلارے ءُ کمیار ءَ وتی ھیال درشان کنان ءَ گْوشت کہ ایرانی زلم ءُ زوراکی، چکچینی ءِ دِرچ بلوچانی یک مزنیں دردے، آئی ءَ گْوشت کہ ما کُل ھمے درد ءَ یک پیم ءَ سَگّگ ءُ زند گْوازینگ ءَ اَنت، مئے یکجاہ بوگ ءُ جُھد کنگ، زوراک ءِ لاش ءِ پْیتی (تابوت) ءِ گُڈسری مْیھ بیت۔
آیاں اِے اَھد کنان ءَ وتی ھیال درشان کرت ءُ گْوشت اِش کہ ما ھر وھد ءَ گْوں
آجوئی بلوچستان جُنز (ایف بی ایم) ءِ سنگتانی ھمکوپگی جُھد کن اَنت۔
گُڈسر ءَ آجوئی بلوچستان جُنز (ایف بی ایم) ءِ باسکاں تران کنان ءَ گْوشت کہ ما اکوام متھدہ ءَ ھوار آدگہ مردمی اگبالانی تیوگیں کارگساں چہ دستبندی کن اَیں کہ آ گولڈ سمت لکیر ءِ دویں نیمگاں بلوچانی سر ءَ بویوکیں زلم ءُ زوراکی ءِ سر ءَ وتی ھاموشی ءُ بے تواری ءَ بہ پروش اَنت زوراکانی بگیری ءِ اَملی گامگیج بہ زور اَنت ءُ جنگی جرمانی بنیات ءَ دویں سامراجی تاگتانی سر ءَ بندش بہ جن اَنت۔ اگاں ھاموشی ءُ بے تواری ءِ اِے درچ برجاہ بوت ءُ بلوچستان ءِ تہ ءَ بویوکیں زلم ءُ زوراکی ءِ سر ءَ ایشاناں جُست کِرگ نہ بوت گُڑا اِے ھَند ءَ انسانی اگبالانی لپاشگ بہ اَنت۔
زھرشانی ءِ تہ ءَ ساڈی ئیں تران کنوک، مھمد بکش راجی، بیبگر بلوچ، بانک سما بلوچ، نوید بلوچ، بھزاد کریم زادی ءُ امیر ارسلان اربابی ءَ تران کرتگ۔
