لیوٹالسٹای / کریم بلوچ
یک جنکوے ، چه لوگ ءَ جنگل ءَ شت . جنگل ءَ راه ئی گار کت و راه ءِ
شوهاز ءَ ، سرجناں بیت ، راه ئی ودی نه کت ، بلے جنگل ءَ ، لوگگ ئی ودی
کت .
دروازگ نیم پاچ ات ، آ چه دروازگ ءِ شم ءَ ، لوگ ءَ چار ات ، دبست
ئی که __ لوگک ءَ هچ کس نیست ات ، مان بیت .
اے سے مم ءِ لوگک ات .یکے
پتین ات ، آئی اش میکاییل ایوانوویچ توار کت . آ ، مزنیں ، بونژا بونژیں
، و پر پٹینے ات . دومی مات این ات . چه پت ءَ کستر ات و ” ناستاسیا
پترونا ” اش توار کرت. سومی کسانیں مملکے ات که ” میشوتکا ” اش توار کت .
مماں لوگ ءَ نه اتنت. آ په تر و گرد و گولگ ءَ ، جنگل ءَ درکپتگ اتنت .
لوگ ءَ دو کوٹی اتنت : یکے ورگ جاه و کن ورجاه ، دومی وابجاه ات
. جنکو شت ورگ جاه ءَ ، و دیست ئی که میز و ٹیبل ءَ ، سے هیران ، چه موش ءَ
پُرّ ایر اتنت . اولی هیران ، سک مزن ات ، و میکاییل ایوانوویچ ءِ هیران
ات . دومی هیران ، کمے کستر ات و ” ناستاسیا پترونا ” ءِ هیران ات . سیمئ
سبزیں هیران ، مملک ءِ هیران ات . هر هیران ءِ کش ءَ ، چمچه اے ایر ات:
مزنینے ، درمیانی اے ، کسانینے .
جنکو اول ءَ مستریں چمچه ءَ زرت و چه مستریں هیران ءِ موشان ئی
وارت ؛ پدا درمیانی چمچه ئی زرت و چه درمیانی هیرانی وارت . پدا کستریں
چمچه ئی زرت و چه سبزیں هیران ئی وارت. مملک ءِ موش و ورگ ، آیرا دوست تر
بیت انت.
جنکو ژند بیتگ ات ، لوٹت ئی که جاهے به نند ایت ؛ چارات ئی و دیست
ئی که سے چارپادگ ، میز و ٹیبل ءِ کش ءَ ایر انت: یکے مزنینے ات ؛ اے پت
ءِ چارپادگ ات، دومی کستر ات و ماتین ءِ چارپادگ و سیمی کسانکینے ات که
سبزیں بالشتک ئی پر ات و مملک ءِ چارپادگ ات .
آ ، اول ءَ مستریں چارپادگ ءَ نشت ، کـَپت . پدا درمیانی چارپادگ ءَ
نشت ، آرام نه ات و وشی نه بیت . گڑاں کسانکیں چارپادگ ءَ نشت ، وشی بیت
و کندت ئی _ پرچا که آرام ات. آ ، سبزیں هیران ءَ زرت و وتی زاناں ایر کت
و ورگ ءَ گلائیش بیت . پهک ڈلگ ءِ موش ئی وارت انت و چارپادگ ءِ چنڈینگ
ئی بنگیج کت .
چارپادگ پرشت و ڈگار ءَ کپت. آ چه جاه ءَ پاد آتک ، چارپادگ ءِ چنڈ
و بهران ئی زرت یک نیمگ کت انت و شت وابجاه ءِ کوٹی ءَ . اوداں سے تهت
ایر اتنت: سری مزنینے ات و میکاییل ایوانوویچ ءِ وابجاه ات ، دومی
درمیانی اے ات _ ناستاسیا پترونا ءِ وابجاه و سیمی : کسانیں و مملک ءِ
وابجاه ات. جنکو مزنیں تهت ءَ وپت ، سک پراه و سک مزن ات ؛ درمیانی تهت
ءَ وپت ، سک برز ات؛ کسانیں تهت ءَ وپت _ تهت همائی ءِ برابر ات و وپت و
، واب ئی کت.
وهدے که مماں چه ڈن ءَ ، لوگ ءَ آتک انت ، شدیگ اتنت و لوٹت اش که
وتی سبارگ و چاشت ءَ به ورانت .
مزنیں مم وتی هیران زرت ، چارت ئی ممی
گرّگی جت :
_ کے منی هیران ءِ موش وارتگ انت ؟
” ناستاسیا پترونا” هم وتی هیران و گلاس ءَ چارات و گرّ ات :
_ کے چه منی هیران ءَ وارتگ ؟
و مملک هم وتی هالیگیں هیران ءَ چار ات و نازرکیں آواز ءَ گوں
کواراں و گـُرّاں بیت :
_ کے منی گلاس ءِ دورو ، و پهک ورگ وارتگ انت ؟
میکاییل ایوانوویچ وتی چارپادگ چار ات و چه هژم ءَ گرات :
– کے منی چارپادگ ءَ نشتگ و چه وتی جاه ئی سرینتگ ؟
ناستاسیا پترونا هم وتی چارپادگ ءَ چار ات و گرنڈاں بیت :
_ کے منی جاه ءَ نشتگ و جاه ئی مٹ کتگ؟
مملک “میشوتکا هم وتی پرشتگیں چارپادگ دیست ، گراں و کواراں بیت :
_ کے منی چارپادگ ءَ نشتگ و پروشتگ ئی ؟
مماں گراں و نرنڈاں ، دومی کت و کوٹی ، بزان وابجاه ءَ شت انت و مان بیت انت.
_کے منی تهت و نپاد ءَ وپتگ ، و نپاد ئی گرنچ کتگ انت ؟
میکاییل ایوانوویچ گوں گرّگ ءَ در رائینت.
_ کے منی تهت و نپاد ءَ وپتگ بیتگ و نپادئی راست نه کتگ ؟ ماتیں مم ءَ گوئشت .
“میشوتکا ” چارپادگے پادان ءِ چیرا کت و وتی نپاد و گندل ءَ سر کپت
و وتی نازرکیں آواز ءِ گون ءَ کوار ات :
_ کے منی نپاد ءَ وپتگ بیتگ ؟
اناگت ءَ آ ، جنکو ءَ دیست . هنچیں کوکارئی کـَش ات که گوئش ئے آئیا
تْروسَگ و بُرّ بُرّ کنگ انت :
_ ایش انت آ ! آئیا بگر ات ، بگر ات ئی ! ایش انت آ ! ایش انت آ !
هَو ، هو ! بگر ات ئی !
آ ، لوٹت که جنکو ءَ به گـَس ایت و گـَـٹ به گیپت . جنکو چه کوارگاں
، گڑ ات و چه واب ءَ جه سرّ ات . چمانی پچ کت انت . دیست ئی که مم انت و
تاگ پچ انت ؛ چه تاگ ءَ ڈن ئی ، سِـٹ و جپ کت و هنوں مه تچ ایت
کدیں به
تچ ایت و تتک . و مماں آیرا نه رسینت .
