ھب (ھمگام ھال) 16 جون 2023 بلوچ اسٹوڈنٹس پرنٹ ءِ نیمگ ءَ گَل ءِ باسک سکی ساوڑ بلوچ ءِ بیگواھی ءِ بگیری ءَ زھرشانی روانکے بلوچستان ءِ شھر ھب چوکی ءِ بازار ءَ روانک کشّتگ لسبیلہ پریس کلب ءِ دیم ءَ زھرشانی کرتگ۔ یات بہ بیت کہ سکی ساوڑ بلوچ 5 جون 2023 ءَ ماں کیچ ءِ شھر تربت ءَ گار ءُ بیگواہ کنگ بوتگ مرچی آئی بیگواھی ءَ را 11 روچ سرجم بوتگ بلے ھچ وڑیں ھال نیست۔
زھرشانی ءَ چیئرمین واحد رحیم ، چیئرمین عمران، ایڈوکیٹ غلام رسول انگاریہ ءُ بلوچ اسٹوڈنٹس فرنٹ ءِ بُنجاھی پتر ءِ باسک پزل بلوچ ءَ تراں کناں ءَ گْوشت کہ سکی ساوڑ ءِ وڑیں کتاب دوستیں ورنا، نبشتہ کارانی گار ءُ بیگواھی بلوچ ورنایان ءَ چہ وانگ ءُ راجکاری ءِ پڑا دور دارگ ءِ یک پندلے ما اے اَمل گوں تُرندیں دانکاں ایر جنیں ءُ سکی ساوڑ بلوچ ءِ آجوئی ءِ واست ءَ اپیل کناں ، ترانکاراں دیمتر ءَ تراں کنان ءَ گْوشت کہ کرنے بیت بلوچ راج ءِ ورناھانی گار ءُ بیگواھی ءُ آیانی ژانگولیں کنٹّانی دور دیگ یکشل ءَ برجاہ اِنت ، نوں مارا ھم ھمے ترس اِنت کہ بیگواھیں سکی ساوڑ ءَ گیشین نُکس ءُ تاوانے دیگ مہ بیت ۔ بلوچستان ءِ تہ ءَ چوشیں ھزاراں درور ھست کہ مردم بیگواہ کنگ بوتگ اَنت آوانی واستا ھچ توار چست کنگ نہ بوتگ پدا ھمے مردم سی ٹی ڈی ءُ دگہ ادارھانی نام ءَ جنگ ءُ آوانی کُنٹ ماں جنگل ءُ ویراناں چگل دیگ بوتگ اَنت۔
زھرشانی ءَ ساڑی ئیں ترانکاراں تران کناں ءَ گْوشت کہ سکی ساوڑ ءِ وڑیں زبان دوست ءُ بلوچی ءِ استادے ءَ بیگواھی بلوچ ءِ تہ ءَ گیش تکانسروی پیدا کنگ اِنت ۔ بلوچ ورنایانی گار ءُ بیگواھی یک شلہ برجہ اِنت ھر روچ ورنا گار ءُ بیگواہ کنگ بوگ ءَ اَنت ۔ پدا وڑ وڑیں پندلانی نام دیگ آوان ءَ شھید کنگ ءَ اَنت. پاکستان ءِ ادارہ وت وتی رھبندانی ھلاپ ورزی ءَ کنگ ءَ اَنت ۔ پاکستان ءِ وتی رھبند ءِ تہ ءَ نبشتہ اِنت یک مردمے ملک ءُ آئی ادارھانی بگیر ءَ روت آئی ارزی دیگی اِنت پدا آمیدگس ءَ پیش کنگی اِنت۔ اگاں مردمے دستگیر کنگ بوت آ 24 ساھت ءِ تہ ءَ آمیدگس ءَ آرگی اِنت بلے بلوچستان ءَ 24 سال ءَ مردم آمیدگساں آرگ نہ بنت ۔
ترانکاراں دیمتر ءَ تران کرت ءُ گْوشت سکی ساوڑ ءَ مرچی 11 روچ سرجم بوتگ آئی ھچ وڑیں ھال نیست باریں چوں اِنت آئی ھال چے اِنت سکی ءِ کھول اِے وھداں سک پریشان اِنت ۔ آواں تربت ءَ پولیس ءِ کرا ارزی نبشتہ کُتگ تنی وھدی ھچ وڑیں گامگیج زورگ نہ بوتگ ۔ ما گوں ملکی ادارھاں ھمے لوٹ ءَ کنیں کہ اگاں سکی ساوڑ ھرچ در کانودی کار کرتگ آئی ءَ آمیدگس ءَ بیار ءُ پیش بہ کن اِت ءُ کانودی لوٹاں سرجم بہ کن اِت۔
