ہمگام بلوچی نبشتانک: شھید ماسٹر نور مھمد ءَ 7 اپریل 1975 ءَ ماں بلیدہ، گردانگ ءَ وتی بنکی ھنکین ءَ واجہ ھسن ءِ لوگ ءَ وتی چم پچ کت انت. آ 8 جنوری 1989 ءَ سندھ ءَ شت ھمود ءَ وتی وانگے بندات کت. پد ءَ 1 فروری 1998 ءَ دہ ءِ چکاس یے پاس کت، دہ ءِ چکاس ءَ پد واتر وتی ھند ءَ اتک، وتی ھند ءِ شاھدربرجاہ ءَ داکلہ زرت ءُ ایپ ـ اے پرائیوٹ چکاس دات ءُ چیزے سال ءِ گوزگ ءَ رند 2005 ءَ ماں کیچ ءَ ایپ ـ سی بھرتی بندات بیت انت آ گوں چیزے سنگتاں ایپ ـ سی ءَ بھرتی بوت انت . شھید ءَ را کلرک ءِ یے اگدہ دیگ بیت، چیزے سال ءِ گوزگ ءَ رند وھدے کہ 2006 ءَ واجہ نواب اکبر ھان شھید کنگ بیت بلوچ راج زھرشانی کنت آ چہ ھما روچ پھمیت بلوچ گلام انت، بلوچ بزگ انت، بلوچستان پہ زور پاکستان ءَ گپتگ، بلوچ زور گلام کتگ وتی بزگیں راج ءِ بزگی ءَ مارایت، آ ھمے وھداں ایپ سی ءِ نوکری ءَ یل کنت ءُ (NRSP) ءَ ماں ماسٹری ءَ لگ ایت. ھمے واھگ ءَ دل داریت من وتی راج ءَ چہ گلامی ءِ زندان ءَ در کناں، ھمک ورنا ءَ من ھمے سبک ءَ دیاں تو گلام ءِ پادا وتی راج ءِ باندات ءَ پہ جھد بہ کن، وھدے کہ (NRSP) ءِ ماسٹری ءِ ٹریننگ 2007 ءَ بندات بوت انت آ ھمے سال ءَ ماں کیچ ءَ شاپور ھوٹل ءَ بی آر پی ءِ جنرل سیکیٹری بشیر ازیم ءَ گوں گند ءُ نند کنت. آ گوں واجہ بشیر ازیم ءَ گپ ءُ رپ کنت وتی ھند ءَ بزاں بلیدہ گردانگ ءَ بی آر پی ءِ زون یے جوڑ کنگ ءِ لوٹ ءَ کنت. چیزے روچ ءِ گوزگ ءَ رند واجہ بشیر ازیم کیت بلیدہ گردانک ءَ بی آر پی ءِ زون یے جوڑ کنت. شھید وتی ھند ءِ بزاں گردانک زون ءِ کارمستر جوڑ بیت. ءُ سرجمیں زمہ واری آں ماں وتی کوپگاں زوریت، پہ وتی وابیں راج ءِ پاد کنگ ءِ ھاتر ءَ باز جھد کنت لوگ پہ لوگ ھرکس ءَ را پہ ڈیھہ ءِ آجوئی ءَ درس دنت. وھدے آ وتی وانگجاہ ءَ روت ، آئی ءِ اولی سرھال بلوچ ءُ بلوچ بزگی، گلامی ءِ بابت ءَ بیت، چشیں روچ یے نہ بوتگ کہ آئی ءَ زھگاناں راج ءِ آجوئی ءِ درس نہ داتگ. دو سئے سال گوزگ ءَ رند آئی ءِ ھال ءُ ھوال گوں بی آر پی ءِ رھشوناں گوں نہ بیت، گڈا آ 2010 ءَ بی این ایم ءِ چیزے سنگتاں گوں بلیدہ زامران ءَ دُچار کپ ایت، شھید ءِ گند ءُ نند گوں بی این ایم ءِ سنگتاں بیت، گند ءُ نند ءَ پد بی این ایم ءِ سنگت شھید ءَ بی این ایم ءِ آیگ ءِ داوت دینت، چیزیے وھدا ودار کنت بی آر پی ءِ سنگت بلکیں ھال کن انت، بی آر پی ءِ سنگتانی ھال نہ بیگ ءِ سبب ءَ بی این ایم ءِ بھر یے جوڑ بیت ءُ پد ءَ بلیدہ گردانگ زون ءِ کارمستر جوڑ بیت، وتی ھند ءِ جھد ءِ آجوئی ءِ گرانیں بار ءَ پد ءَ ماں وتی کوپگاں زوریت، آ گوں جھد ءَ امنچو ایماندار بیت نہ روچ چاریت نا کہ شپ مدام گوں راجی کاراں دزگٹ بیت مدام وتی مھلوک ءَ پیر ءُ ورنا ءُ کماشاں یکجاہ کنت آھاں آجوئی ءِ سکین ءَ دنت. بلیدہ گردانک ءِ مردماں پہ یک درپشوکیں استال یے زانگ بیت، یک رھشون یے لیکگ بیت.
ماسٹر ءِ لوگ ءَ مدام دیوان برجم بوتگ ڈاکٹر منان، بی ایل ایپ ءِ کماندار واھد کمبر، ءُ بی این ایم ءِ مرکزی رھشون ابدلنبی مدام ماسٹر کر ءَ شتگ ءُ اتکگ انت. چیزے سال ءِ گوزگ ءَ رند شھید لھتیں جیڑھانی سر ءَ گوں بی این ایم ءَ اختلاف داریت آ گشیت اگاں اے جیڑہ ھل نہ بنت، من دست کش باں، گڑا ماسٹر ءِ گپ گوشدار نہ بنت، چیزے سال ءِ گوزگ ءَ رند بلوچ راجی لشکر بی ایل اے ءَ بھر زوریت ءُ کس سئی ءُ سرپد نہ بیت، ماسٹر ھم یاگی بیت، نگیگیں جاور شھید ءِ دست ءِ ند ءَ پچ گیپت ءُ توپک دست ءَ دنت.
شہید یک روچ یے روت ماں کیچ ءَ پہ سنگتاں سامان گرگ ءَ پہ واپس آیگ ءَ راھ ءِ نیم ءَ گاڑی ءِ بیٹری ھراب بیت، گاڑی ءَ ھمود ءَ یل کنت ءُ شپ ءَ کیت وتی لوگ ءَ بیگاہ ءَ در کپیت روت دگہ مردمے ءِ گاڑی ءِ بیٹری ءَ کش ایت ءُ شپ ءِ پنچ ءِ ساھت ءَ واپس پہ وتی گس ءَ آیگ ءَ بیت، مردمانی چم دیست ءِ گپ انت، راہ ءِ دیم ءَ دو سلاھ بندیں مردم دیم ءِ در کیت، گر انت ءُ شورما ءِ کوھانی نیمگ ءَ بر انت ئے، پد ءَ 28 مئی 2016 اناگتہ کس سرپد نہ انت ءُ شھید ماسٹر ءِ نمبر ءَ پون کیت ءُ گش ایت ما پولیس والا ایں، شھید ماسٹر ءِ میت بلیدہ بٹ ءِ نادراہ جاہ ءَ ایر انت بیا ات بر ات ئے. اے دگہ روچ ءَ بلید ءَ گردانگ ءَ میت وتی گڈی جاہ ءَ آرگ بیت ماتیں گلزمین ءِ دلبند ءِ بھوٹ کنگ بیت.
