نبشتہ کار: مہلب بلوچ خارانی
،ھمگام بلوچی
خاران ءَ بلوچ راجی جُھد ھما وھد ءَ درنگاز بوت کہ شھید نورالحق جان بارگ چہ میٹرک ءِ وانگ ءَ پد پَہ گیشیں وانگ ءِ ھاترءَ ماں شال شُتگ ات۔ شھید بارگ جان شال ءَ سائنس کالج ءِ نودربرے اَت، اودءَ گوں بلوچ اسٹوڈنٹس آرگنائزیشن آزاد ءِ سنگتاں نزدیک بوت ءُ چہ بی ایس او آزاد ءِ کِشک ءَ بلوچ راجی آجوئی ءِ پگری راہءُ راھبنداں وتی جُھد ئے بندات کُت، اے ھما وھد اَت کہ پرویز مشرف ءِ زوراکیانی آس بلوچستان ءِ چاریں آتراپاں جمبور اَت، بی ایس او آزاد ءِ سنگت گار ءُ بیگواہ ءَ ات انت ءُ باز سنگت شھید بوت اَنت، وانگ جاہ، دربرجاہ ءُ شادربرجاہ آرمی کالونی جوڑ اِت انت ءُ ھر روچ بلوچستان ءِ ھرکُنڈ ءُ دمگاں بلوچ ورناہ، پیر ءُ کماشانی لاش دراَتک انت، ھر روچ بلوچ نودربر ءُ پگری ئیں سنگت گار ءُ بیگواہ اِت اَنت، ھمے دھرءَ شھید بارگ جان وتی راج ءِ گم بڈا زرت انت ءُ خاران ءِ سرڈگار ءَ وتی پگری ءُ وانشتی جُھد بندات ئِے کُت۔ خاران ءَ یک پہ یک ءَ سنگتاں گوں گند ءُ نند ئِے کُت۔ سنگتان ءَ بلوچ راجی جُھد ءِ بابت ءَ سرپدی ئِے دات ءُ بلوچ راج ءِ سرءَ زلم ءُ زوراکیاں ، راج ءِ بزگیاں تران ئِے کُت ، شپ ءُ روچ گوں ھمے کاراں گلائیش اَت، آئی جُھد زوت سوب مندی ءِ نیمگءَ رھادگ بوت ءُ خاران ءَ یک آشوبی چراگے زندگ بوت، ایف ایس سی چکاس ءِ دربرگ ءَ پد شھید بارگ جان پَہ گیشیں وانگ ءِ ھاترءَ سندھ ٹنڈوجام ءَ شُت ءُ وتی وانگ شاہ دربرجاہ ءَ بندات ئِے کُت، بلے آ چہ وتی وانگ ءَ چے گیشں پَہ خاران ءِ بے وانندائیں سنگتاں پگر مند ات ءُ آئی ھوش ءُ ھیال بِہ خاران ءَ اِت اَت، گڑا شھید بارگ جان ءَ وتی وھد وانگ ءَ را دات نہ کت ءُ خاران ءِ سنگتاں راجی جُھد ءِ بابت ءَ سرپدی دئیگ ءُ وانینگ بندات کُت، شھید یک دور اندیش ءُ مزن پگریں بامردے ات، آئی چماں یک روژنائیں بانداتے ودی اَت، مدام آئی دستاں استمانی ءُ میاں استمانی کتاب است ات انت، یک یک سنگتاں ءَ را کتابے دات پہ وانگ ءَ ءُ پدا گوں سنگتاں ھما کتاب ءِ سرءَ گپ ءُ تران ئِے کُت، اگاں سنگتاں آئی داتگیں کتاب مہ ونتیں ءُ پدا کتاب ءِ سرءَ گپ ءُ تران مہ کتیں بزاں سنگتاں کتاب مہ ونت ایں گڑا شھید بارگ جان سک ملور بوتگ اَت ءُ سک زار گپتگ اَت بلے پدا گوں وتی مھروانیں بچکندگاں سنگتاں ءَ پنت ءُ نسیت ئِے کتگ اَت کہ بلوچ ءَ را وانگی انت، مارا وتی راج ءِ بزگی پھمگی انت۔ مئے دژمن سک چالاک ءُ مکار اِنت۔ دژمن ئِے داتگیں دروگیں کتابانی وانگ ءَ مئے وتی راجی راجدپتر سیائیں مجاں اندیم انت۔ وتی راجءَ بوان اِت ءُ سرپد بوئگ ئِے جُھد ءَ بِہ کن اِت، آئی ءَ مدام میر حمل کلمتی ءُ پرتگیزی ءِ جنگ ، شھید محراب خان ءُ انگریز ءِ جنگ ءُ بلوچ خان ءُ انگریز ءِ جنگ، نورا مینگل ءُ انگریز ءِ جنگانی کِسّہ ءُ شھید بابو نوروز خان ءُ پنجابی لشکر ءِ جنگانی گپ ءُ ھبر ئِے کت ءُ راج ءِ راجدپتر ءِ باروا تران ئِے کت، شھید بارگ جان ءَ گوں جنگ ءَ تپاک نہ کُت۔ آئی مدام مھر ءُ دوستی ءُ وشھالی ءِ درونت دات، آئی تب ءُ مئیل مھر ات۔ آ یک مھرانیں دوستے اَت، آئی ءَ را امینکس گوں شے مرید ءُ ھانی ءِ سرزمین ءَ مھر اَت، ھمینکس مھر پہ ھانی ءُ مرید ءَ است اَت، مست توکلی ءُ سمو ءِ گپ ءَ مہ کن۔ کہ سمو آئی ارواہ ءَ گوں ھور ات، شھید بارگ جان ءَ یک سمو ئے اَت کہ آئی ئِے مھراں مست توکلی جوڑ اَت ءُ سنگتاں آئی ءَ را مست ءِ نام ءَ ھم یات کتگ اَت ، آئی ءِ ناماں چہ یک نامے مست اَت۔ شھید بارگ ءِ سمو کئے اَت۔ ؟ سنگتاں مدام آئی ءَ را جُست کت گڑا آئی ءَ درائینت کہ سید زھور شاہ ھاشمی ءِ ھانی ءُ ھانل کئے بوتگ اَنت!!! انچو منی سمو منی گلزمین اِنت۔ اوں من مست توکلی آں ، گلزمین ءِ توکلی آں، انچو کہ آئی گشت کہ من توکلی آں ھمے وڑءَ پدا توکلی ءِ دروشم ءَ پہ وتی سمو ءَ ندّر بوت ءُ ابدمانیں اِشک ءَ سوبیں بوت، بزاں آ یک مھروانیں بامردے ات، کتاب ءُ وانگ ءِ دلدیدہ ات، وانگ ءُ زانگ ءِ پڑا یک شرّیں ءُ سرپدیں استادے ءِ نام ءَ زانگ بوت، بلے آئی ءَ پہ وتی گلزمین ءِ سانکلانی پروشگ ءِ ھاترءَ تُپنگ کوپگاں کُت ءُ بلوچستانءِ کوہ ءَ یاگی بوت۔ یک مھروانیں بامردمے اگاں تُپنگ بِہ زوریت ءُ سلاہ بند بہ بیت اے ھماں مھر انت کہ ایشی مز ءُ کیمت نیست، شھید بارگ جان ءَ پنجابی ریاست ءِ ادارگانی وانگ ءَ چہ زیات جُھد ءِ آجوئی شرتر لِیک اِت ءُ وتی راہ شہ پنجابی وانگ ءَ چے گست ءَ کُت جُھد آجوئی ءِ یک سنگتے جوڑ بوت، انچو کہ خاران ءِ تَہ ءَ یک شعوری ءُ پگری سوچے آؤرت ئِے ھمے رنگ ءَ کوہ ءَ ھم یک زمہ داریں سنگتے اَت، جُھد آجوئی ءِ ھاترءَ ھر وڑیں کُربانی ءَ چک ءُ پد ءَ نہ بوت۔ شھید بارگ جان سلا بندی ءِ اَھد ءَ بگر داں گُڈّی روچاں چہ یک پاد ءَ معذور اَت۔ یک کوپگ ءَ وتی پرشتگیں پادیں ھاترءَ لٹ بڈا اَت ءُ دومی کوپگءَ دژمن ءِ ھلاپ ءَ توپنگ ئِے کوچ ءَ اَت۔ کوہ ءِ زند پہ جان دُرا ءُ آسراتیں مردماں سک گِران انت۔ بلے شھید بارگ جان یک پادءَ بلوچستان ءِ درائیں کوھاں گشت ءُ دژمن ءِ ھلاپ ءَ جنگ ئِے کت ءُ سلاہ بند ات ھزار پریشانی ءُ جنجالاں چے پد شھید بارگ جان ءَ گوں دژمن ءَ ماتیں سرزمین ءِ سودائی نہ کت، کوہ ئِے سنگتانی ھاترءَ یک شرّیں استادے اَت، چہ وانگ ءِ باریگ ءَ بگر داں گُڈّی روچاں شھید ھزار مُسیبت ءُ پریشانی برداشت ئِے کت ءُ گُڈی وھدءَ ماں تراسانی خضدار ءِ کوھاں گوں شھید دل جان ءِ ھواری ءَ 19 فروری ءِ روچ ءَ گوں دژمن ءَ دیم پہ دیم ءَ جنگ ئِے دات ءُ مزنیں دژمن ئِے مردار ئِے کُت، گُڈی تیر وتی جندیں واستہ ءَ کامرز ئِے کُت ءُ ابدمان بوت بلے دژمن ءِ دیم ءَ وتی سر جھل ئِے نہ کت۔ مروچی ءِ روچ شھید بارگ جان ءُ شھید دلجان ءِ سیمی سالروچ انت، بلے من گنداں کہ آئی رتکگیں ھون ءِ برکتءَ مروچی خاران ءَ راجی جُھد ءِ چراگ سک رژنا انت، کہ گوستگیں روچاں پہ شھید بانک کریمہ ءِ ھاترءَ ھزارانی کساسءَ مئے خاران ءِ مات ءُ گُھار روانک ءِ ونڈ ات انت ءُ پنجابی ریاست ءِ ھلاپ ءَ روانک ءِ تہ ءَ زھرشانی ءُ تران اِشءَ کُت۔ بزاں 2006 ءُ2007 ءِ وھدءَ کہ شھید بارگ جان خاران ءِ تہ ءَ گوں چار سنگت ءَ راجی جھد ءِ شعوری وانشت ءُ پگری ھیال ءِ گپ ءُ ھبر ئِے کت، گڑا من ھمے سرپد بوت آں کہ خاران ءَ کدی چشیں مردم پیداک نہ بیت کہ راجی جھد ءِ بَھر بہ بیت۔ من مدام ھمے گپ ءَ گشت کہ نورالحق جان وتی وھد ءَ زوال کنگ ءَ انت، بلے مروچی شھید بارگ جان ءِ جُھد ءَ من ءَ رَد کرت۔ شھید ءِ جُھد ءُ کُربانی زوال نہ بوت انت۔ مروچی ایندگہ دمگانی وڑ ءَ خاران ھم سرجم ءَ جُھد ءِ آجوئی ءِ اولی سْرپ ءَ اوشتاتگ، خاران ءِ ھر لوگ ءِ تہ ءَ شھید بارگ جان ءِ پگر زندگ انت، بزاں شھید بارگ جان زندگ اِنت ءُ مزنیں نوجوان ئے ءَ شھید ءِ کپتگیں تُپنگ زُرتگ ءُ کوھاں سلاہ بند انت۔ مروچی شھید ءِ ارواہ آسودگ انت مروچی شھید گوں وتی ماتیں گلزمین ءُ گوں مھروانیں سمو ءَ گوْرمباز اِنت ءُ وتی سمو ءِ مھراں چکار انت۔۔
