کوئٹہ (ہمگام نیوز) بلوچ اسٹوڈنٹس ایکشن کمیٹی ءِ بنجاھی جارکشءَ 21 فروریءَ ماتی زبانانی میان استمانی روچ ءِ درگت جار جت ءُ گشتگ ماتی زبانانی میان استمانی روچ ءَ”ماتی زبان راجی پجار اِنت”ءِ نام ءَ تیوگیں ھنکیناں مراگش اڈ دیگ بنت ءُ بلوچستانءِ جتائیں دمگاں مراگشانی اڈ دیگ ءِ جہد کنگ بیت۔
بنجاھی جارکش ءَ دیمتر تران کنان ءَ گشتگ بلوچ اسٹوڈنٹس ایکشن کمیٹی یک نودربر گلے ءِ بستارءَ مدام بلوچءِ ماتی زبانی پھازگ ءُ رکگ ءِ جھد کنگ ءَ اِنت ءُ ھمے درگت گل جتائیں سیاسی ءُ لبزانکی تاک کشگ ءَ اِنت۔ گل ءِ آفیشل زبان بلوچی ءُ براھوئی کنگ بوتگ اَنت ، پمیشکہ لبزانک، مراگش ، ھنکینی ءُ بنزھی دیواناں ھوار کسانیں ءُ مزنیں مراگش کُل ماتی زباناں کنگ بنت۔ گل ءِ ھنکین بلوچی ءُ براھوئی کلاس اڈ دیگ ءِ جھد کنگ ءَ اَنت ءُ گل ءِ کوشست اِنت کہ بلوچ مھلوک چہ درآمدی ءُ ڈنی زبانانی وامداری ءَ در بئیت ءُ وتی زباناں وت ماں وتی میان ءِ زبان جوڑ بکن اَنت۔
بنجاھی جارکش ءَ دیمترءَ تران کنان ءَ گشتگ کہ درآمدانی زبان بلوچ راج ءِ پجار گار کن انت ءُ بلوچءِ دودماناں ھوار بلوچ ءِ تب ھم بدل بیت۔ بلوچ راجی پجارءِ ھاترءَ ماتی زبانانی کرد پہ بلوچءَ استی ءُ نیستی ءِ ڈول ءَ اَنت۔ پمیشکہ اے جاورالانی تہءَ وھدے بلوچ ءِ زبانانی گار کنگءِ ھاترءَ پندل سازگ بوگءَ اَنت ءُ بلوچ راج بھر ءُ بانگ کنگءِ ھاترءَ زبانانی تضادے پیداک کنگ بوگءَ اِنت گُڑا بلوچ ورنا ءُ لس مھلوک ءِ کوپگ ءَ مزنیں ڈبہ وتی ماتی زبانانی پھازگ ءُ دیمروی اِنت۔ گوشگ بیت کہ زبان پاھازیں راج زندگیں راج زانگ بنت۔
بنجاھی جارکش ءَ گُڈسرءَ گشتگ گوستگیں سالءِ پیم ھمے سال ماتی زبانانی میان استمانی روچ ءَ تیوگیں ھنکین مراگش اڈ دینت ءُ بلوچستان ءِ جتائیں دمگاں کسانیں ءُ مزنیں مراگش اڈ دیگ ءِ جھد کنگ بیت۔
