پسنی ـ مرچی ماتی زبانانی میان استمانی روچ ءَ پسنی ءَ یک مزنیں مراگشے بساک ءَ مبارک قاضی ءِ نامءَ برجم داشتگ ۔ مراگش ءِ بندات گوں راجی سوت ءَ کنگ بوت ءُ دیمتر ءَ مبارک قاضی ءِ یات ءَ دو دمان ءِ بے تواری ءَ پد دیوان ءِ ایدگہ بھر بندات بوتگ اَنت کہ آہانی تہ ءَ تران، پینل ڈسکشن، کسمانک، کتاب دیمدرائی، کتاب میڑہ، ڈاکومنٹری، آرٹ اگزیبیشن، شئیر ءُ شائری ءُ ساز ءُ زیملی ھوار بیتگ اَنت۔
دیوان ءِ مہمان بنجاہی مزن کارگشاد اظہر بلوچ، بنجاہی کمیٹی ءِ باسک فوزیہ بلوچ ءُ بالاچ بلوچ ءَ ھوار منیر مومن، اے آر داد، میر عمر میر، زبیر مختار، ڈولی بیگ، ندیم اکرم، امیر دوست، ھسام بلوچ، سپیہ بلوچ، الف میم داد ءُ کسان سالیں سُھراب بلوچ بیتگ اَنت۔
اولی بھر ءَ گشتانک بیتگ کہ آہی ءِ تہ ءَ گل ءِ مزن کارگشاد اظہر بلوچ، سپیہ بلوچ، الف میم داد ءُ ندیم اکرم ءَ بلوچ ءِ ماتی زبان ءُ مبارک قاضی ءِ زندءُ ازم ءِ سرہالانی سرءَ گشتانک داتگ۔ دومی بھر دیوانے گوں منیر مومن ءَ بیتگ کہ آہی ءِ مہمانجل ھسام بلوچ ءُ بلوچی زُبان ءُ لبزانک ءِ سرءَ گپ ءُ باوست کتگ ۔ سیمی بھر ءَ “ماتی زبان” ءِ سر ءَ کسمانکے پیش کنگ بیتگ۔ ہمے پیم دیوان ءَ دیم ءَ بران ءَ دیمی بھر ءَ “ماتی زبان” کتابک ءِ دیمدرائی کنگ بیتگ۔ چرائی ءَ رند شئیر ءُ شائری دیوان بوتگ کہ آہی ءِ مہماننجل اے آر داد بیتگ ءُ شائر منیر مومن، زبیر مختار، ندیم اکرم، امیردوست، میر عمر میر، ڈولی بیگ، بیتگ اَنت۔ دیوان ءَ دیمی بھر ءَ مبارک قاضی ءُ ماتی زبانانی میان استمانی روچ ءِ درگت ءَ ڈاکومنٹری ئے پیش دارگ بیتگ۔ اے بھراں ھوار مراگش ءَ کتاب میڑہ ءُ آرٹ اگزیبیشن ہم برجم دارگ بیتگ، کتاب میڑہ ءَ گل ءِ ماتی زبان ءِ سرءَ نوکیں کتابُک ءُ ایدگہ کتاب ایر کنگ بیتگ اَنت ءُ دومی نیمگ ءَ جتائیں ازمکاراں وتی آرٹ آورتگ ءُ اگزیبیشن ءَ پیش کُتگ اَنت۔ دیوان ءِ گُڈی بھر ساز ءُ زیملی بیتگ ءُ اود ءَ وش گُشیں گشندہ آسمی بلوچ ءُ نصیب مزار ءَ گوں وشیں توار ءَ سوت الہان کنگ ءَ پد دیوان سوبمندی ءَ گوں آسر کنگ بیتگ۔
