ھمگام بلوچی
پنچُمّی بَھر
بلوچی اکیڈمی کوئٹہ ءِ ایر دستی ءَ چاپ بوتگیں کتاب “بلوچ، ٹک ءُ کٹم ” پولکار واجہ بالاچ ھمید وتی کتاب ءِ تاکدیم 68 ءِ تہ ءَ نبشتہ کنت کہ (جعفر) بلوچ راج ءِ یک ٹکے ءِ نام چد ءُ ساری مُردنی من اے نام اش نہ کرتگ بلکیں انی ودی بوتگ دیمترا واجہ گش ایت کہ (جعفر) ءِ کُل 37 کٹم انت بزانکہ اے ٹک ءِ کل 37 کٹم انت لھتے پہ دَرور ایر کن آں چشکہ ڈوم، کیل (خیل) لوھار، سومٹ، موھارا، لیٹ، رتا، جینا، مرنا، لاکھڑی، ءُ دیگہ چشیں نام باز انت بلے بیا اِت واجہ بالاچ ھمید ءَ را ھمے جست کن ات کہ اے نام بلوچی گال انت یاکہ دگہ زبانی گال انت چشکہ جینا، مرنا، خیل، رتا، لاکھڑی، چاٹ، سومٹ، ڈابا، موھارا اے درست واجہ بالاچ یکجاہ کرتگ ءُ بلوچ راج ءِ کٹم کرتگ انت باید جست بہ بیت کہ اے گال تو پہ بلوچ راج ءِ کٹمانی واستہ زرتگ تو ھمے گالاں بہ گوش کہ اے بلوچی گال انت؟ دیمترا واجہ بالاچ نبشتہ کرتگ ” کھیری ” یاکہ ما گش ایں شے کھیری کہ رند ءُ لاشار ءِ زمانگ بہ گر تانکہ انی ھم ھست انت دشتیاری ءُ دشت ءُ پلیری ءِ دمگاں نشتگ انت کہ انی ئیں وھد ءَ آیانی سرکماش شے اُمر ولد شے موسہ ءُ شے اَلبدلکریم ولد شے چراگ انت۔ باید واجہ بالاچ ھمید جست ءُ پرس بہ کت ایں انچوش پہ دیم لھتے کٹم آرتگ ءُ وتی کتاب ءِ تاکدیم سیاہ کرتگ انت کٹمانی ناماں پہ دَرور ایر کن آں شما بلوچ راج ھم جست کن ات کہ اے کٹم کھیریانی کجا نشتگ ءُ آباد انت ۔ مرادانی، سمرزئی، بندلانی، جان بانی، مرزئی، مندھانی، سادیکانی، تاھرانی، اھمدانی، الہ بکش زئی، بدرانی، نورانی، وزیرانی، کلندرانی، ھماممانی ، ھزورانی، بولانی، بمبوانی، سندوانی، نھال زئی باید اے بابت ءَ راج وت پٹ پول بہ کن انت ئِے کہ کھیری کسانیں ٹکے نہ انت کہ کسے مہ زانت ئِے بلوچستان ءِ درستیں ٹک ءُ کٹم شَر زانت کھیریاں کہ چاکر ءُ گوھرام ءِ دَور بہ گر دانکہ انی بلوچانی ھر جنگ ءُ جنجال اڑانی تہ ءَ کھیریانی کردار پدر انت کہ آ مدام بلوچ ءِ وشی ءُ وشھالی ءَ ساجو انت ھر اڑ ئے ءُ جنجال ءِ توجیل ءَ ساجو انت.
*بُرّے یَلءُ بُرّے بلوچ*
*بُرّے دو راجیں کلمتی*
واجہ بالاچ ھمید نور ءِ کتاب “بلوچ ٹک ءُ کٹم ” ءِ تہ ءَ 52 ٹک پہ بلوچ راج ءِ نام آرگ بوتگ بلے من ھیران ءُ اجکہ آں کہ کلمتی ٹک ایشانی لڑ ءَ ھوار نہ انت۔ ھوت ٹک ءِ پنچ کٹم ھوار کہ گوستگیں بھرانی تہ ءَ آرتگ اِتاں یک برے پدا دیم ءَ پدر اش کن آں ھوت، ھنانی، ھوتکانی، نوھکانی، چزانی اے پنچینانی تہ ءَ بس من ھوت اش کرتگ آ دگہ منی دیم ءَ مُردنی نہ گوستگ انت ھوت ٹک ءِ مستریں کٹم کلمتی جاسک ءُ بندر اباس ءِ سیمسراں بہ گر تانکہ سندھ ءُ ھندوستان ءِ سیمسراں بہ روت اے سرجمیں دمگاں کلمتی نشتگ ءُ آباد انت بلوچستان ئے ءُ سندھ ھر دمگ ءَ کلمتیانی چیدگ ءُ نشان ھست ءُ ابدمان انت چوکنڈی ءِ کوھنیں مانشانی سر ءَ پدر انت سندھ ءِ گوستگیں کلچرل ءُ دود ءُ ربیدگی سر کماش ڈاکٹر کلیم الله لاشاری ءِ کتاب آیانی سرشونی ءَ کنت۔ راجدپتر ءِ ھر تاکدیم ءَ بچار کلمتیانی کرد پدر ءُ زاھر انت بلے بالاچ ھمید ءَ ھچ چشیں چیز زاھر ءَ نیاتکگ بالاچ ھمید ءَ بس ھوتانی سرجمیں کٹم چار کرتگ انت باید بالاچ بہ گوش ایت گوں سرشوناں کہ اے چاریں کٹم کج ءَ ھست ءُ آباد انت بلے یک بژنی گپے کہ اے واجہ ءَ پٹ پولی کتابے نبشتہ کرتگ ءُ کلمتیانی ھچ چشیں نامے ٹکے دیم ءَ نیارتگ بلوچی ادب ءُ لبزانک ءِ پڑا کلمتی چش روچ ءَ پدر اَنت ۔ اولی لبزانکی ردانکی کتاب کہ 1763 چاپ بوتگ آ برٹش کتاب جاہ ءَ ایر انت ھوتمان کلمتی ءَ شہ پد ادب ءُ لبزانک ءِ پڑا ملا ابابگر کلمتی شھزانتیں شائر ئِے بوتگ دگہ نامداریں شائر ءُ کواس چشکہ لال بکش کلمتی، ملا مھمد کلمتی، داد رھمان کلمتی، ملا ملک مھمد کلمتی، گلام رسول کلمتی، مولوی یوسپ انیس کلمتی، میر امر میر، ملاپکیر مھمدکلمتی، ملا رودین کلمتی، بلوچی زبان ءِ جوانیں پولکار اسھاک رھیم کلمتی اے درست ساھب ءِ کتاب انت ۔ ایشاں ابید ملا گوھرام کلمتی، ملا مراد کلمتی، ملا ھیدر کلمتی کہ بلوچی کلاسیکل شائرانی براہ انت ءُ دگہ بازیں کس ھست کہ بندر ءَ چہ بہ گر دانکہ انی بلوچی ءُ سندھی لبزانک ءِ پڑا چشکہ واجہ گل ھسن کلمتی سندھ ءِ راجدپتر ءِ شاھزانتیں پولکارے کلمتی ٹک ءِ بامرد چشکہ میر ھمل جیھند کلمتی ءِ جوھر مردی پدر انت پہ وتی نیلیں زِر ءِ رکینگ ءَ راجدپتر ھر تاک پہ ھمل ءِ نام ءَ تامدار انت بلے من وت ھیراناں کہ بالاچ ھمید ءَ را چشیں ھچ چیز گندگ نیاتکگ اَت چاکر کولواھی ءُ ھمل ءِ کسہ ھمل ئے ءُ پرنگیانی جنگ دگہ بازیں کسہ ءُ داستان ھست انت کیا ءُ سدو، للہ ءُ گراناز، سسی ءُ پنو، دگہ ھم داستان ءُ کسہ چشکہ کلمتیانی ءُ بُلپتیانی جنگ ءِ شئیر کہ نواب اکبر دپدگال کرتگ انت ءُ دگہ بازیں کسہ ءُ داستان ھست کہ ھوت ءُ کلمتیانی ملاکمالان ھوت شھداد ءُ شھداد ءِ چوٹا ءُ ھوت گل مھمد ءِ جنگ ءُ میر ھالی کوھیں کلات کہ کیچ ءِ دلبند ءَ مِکّ انت اے درست راجدپتر ءِ ھر تاکانی براہ انت لبزانک ءُ ادب ءَ ابید سیاسی گَلانی تہ ءَ ھم کلمتیانی نام پدر انت۔ منی ھیالاں بالاچ ھمید زاناں اے ملک ءِ مردمے نہ انت یا کہ پہ کست ءُ کینگ یا کہ بے پٹ ءُ پول ءَ انچوش پہ دیم وتگڑیں کتابے جوڑ ئے کرتگ پہ وتی نام ءِ ھاتر ءَ پدا بلوچی اکیڈمی ءَ ھم اے کتاب چاپ کرتگ بے پولکاری، بے جست ءُ پرس ءَ درستاں چہ مستریں ردی بلوچی اکیڈمی ئیگ انت نباید چشیں وتگڑیں کتاب چاپ ءُ شنگ بہ کنت.
روان انت۔۔
