ھمگام بلوچی نبشتانک
ھیربیار متحدہ بلوچستان ءِ گپ ءَ پرچا کنت اے باھد ھیرانی ئے گپے مہ بیت اے گپ ءَ کُل زان انت بلوچستان سئے بھر کنگ بوتگ ءُ زورگیرانی دست ءَ لگتمال انت چندے سیاسی مپاد پرستاں بلوچ آجوئی سیاست چو گوست ءِ وڑ ءَ وتی چندے مپادانی ھاترا چند ھند ءُ دمگانی میان ءَ داشتگ زی کہ وھدے کلات ءِ سر ءَ پاکستان ءَ اُرش کت کلات پروش دات ھان ءِ پروش ورگ ءِ مستریں سبب چی ات، آئی مستریں نزوری بلوچ ءِ بھر ءُ بانگی ات ما ٹکانی ءُ ھندانی تہ ءَ بھر ءُ بانگ ات انت بیلہ ءِ سردار وت ءَ دور ءَ کش ات، ھاران ءِ سردار انچو ءُ مکران سرداراں ھم انچو وتا دور داشت پرچا کہ آیانی تہ ءَ بلوچستان ءِ دارگ ءِ ھچ وڑیں سنچ ءُ سما نیست ات ھرکس وتی سرداری ءِ کلات ءَ وش واب ات، وتی ھندانی پاسداری ءَ دلگوش اتاں داں پاکستان ءَ بلوچستان ءِ سرا بزاں کلات ءِ سرا اُرش کت آئی سرا زورگیپت بوت، ھمے رنگ ءَ آئی سرجمیں بلوچستان دستی کت مرچی اگاں ھیربیار یکجاھیں بلوچستان ءِ گپ ءَ کنت آئی گوستگیں ردی ءُ نزوری دیستگ ءُ ماراتگ انت آ زانت اگاں کُل بلوچانی اندر ءَ بلوچستان ءِ آجوئی سنچ ءُ سما مہ بیت بلوچستان ءِ آجوئی برجاہ نہ مان اِیت۔
پاکستان ءِ زورگیری ءَ رند ھرچی جنگ بنا بوتگ آ چندے مردمانی ٹولی ءُ ٹکانی بنیاد بندات بوتگ ءُ پد ءَ آسر بوتگ انت آگا ابدلکریم بہ بیت یا نواب نوروز ءِ جنگ ءِ بندات کنگ ءُ آسر بوھگ، آ جنگ زوت آسر بوتگ نوکیں اے جنگ دو ھزار ءَ”2000“ کہ بندات بوتگ ایشی ءِ سروک سنگت ھیربیار مری انت ءُ گوں وتی سنگتاں ھیربیار ءَ اے جنگ چہ کوھلو ءُ کاھان ءَ در کت ءُ مکران ءُ سرجمیں بلوچستان ءَ شنگ ءُ تالان کت مرچی سرجمیں بلوچستان ءَ اے آجوئی ءِ چراگ بلگ ءَ انت اے تاں ھیربیار مری دوری چاری ءُ ھمائی جھد ءُ جپاھانی منت انت مرچی اے جنگ چہ ھلک ءُ دمگاں دراتکگ سرجمیں بلوچستان ءَ شنگ ءُ تالان انت، کسے ایران ءِ زورگیپتیں بلوچستان ءَ نشتگ اے جھد ءِ بھر انت یا کہ کسے اوگان ءِ زیردستیں بلوچستان ءَ نشتگ آ اوں جھد ءِ آجوئی ءِ سپر ءَ ھوار انت ءُ جنزگ ءَ انت۔
نوں کسے کہ وتی گوست ءِ ردیاں نہ ماریت آیانی سرا کار نہ کنت ھچ رنگ ءَ دیمروئی نہ کنت وتی ڈیھ ءَ گیپت نہ کنت، زی ما ٹکانی تہ ءَ بھر بوتگیں مرچی ھم بھر ءُ بانگ انت ھند ءُ دمگانی تہ ءَ بھر انت چندے مردم انگت ھما کوھنییں پگر ءَ در نہ کپتگ، مرچی سنگت ھیربیار مری ءِ جھد ھمیش انت اے بھر ءُ بانگی ءِ تپاوت ءَ ھلاس بہ کنت مرچی کسے چھباری یے دگہ زاھدانی کسے گوادری ءُ دگہ کوھلو کاھانی یے مارا اے تپاوت ھلاس کنگی انت چوناھا اے تپاوت سنگت ھیربیار مری ءِ بازیں جھد ءُ جپاھاں ھلاس بوتگ، بلے چندے کس ھست اے بھر ءُ بانگیاں گیش کنگ ءَ انت نوں باھد کسے نمروز ءُ ھلمند ءَ نشتگ آ اوں باھد بئیت بولان ءِ کوھاں سلاھبند بہ بیت پہ بلوچستان ءِ آجوئی ءَ جھد بہ کنت کسے کہ زاھدان ءَ نشتگ آئی ھم پرز انت بئیت سیاھجی ءِ کوھاں پہ بلوچستان ءَ سلاھبند بہ بیت مارا اے دوری ءُ تپاوت چہ بن ءَ ولگوج کنگی انت، اے وتساچیں سیمسر کہ انگریزاں جوڑ کتگ ءُ کجا نا کجا لا شعوری رد ءَ اے ما ایشی ءِ پلہ مرزی ءَ کنگ ءَ انت ایشی ءِ مستریں دلیل اِش انت کہ مئے باز مردم گش انت مارا ایران ءِ زورگیپتیں بھر ءَ کار نیست پرچا کہ ما نزوریں تو کجام دلیلاں گوں گش ئے گڑا من پہ بلوچستان ءِ آجوئی ءَ پہ کار ءَ آں؟
من اے سرپد نہ باں تو پہ بلوچستان ءَ کار ءَ ئے البت تو بس پہ ھندے ءَ جھد کنگ ءَ ئے پہ بلوچستان ءَ انا، آیانی دلیل اِش انت ما نزور انت دو ریاست ءَ گوں جنگ کت نہ کنیں گلامیں راج کجا زاناں توان مند بوتگ جنگ ءِ کتگ پاکستان ءِ ھلاپ ءَ کہ تو جنگ ءَ ئے کجام ترا تاگت ھست انت منی ھیال ءَ اے مئے ایمان ءِ نزوری انت ما گش انت ما نزور انت، دومی نیمگ ءَ ھمے مردم گش انت ما چہ دری دنیا ءَ امیت نہ کش انت مئے تاگت مئے راج انت تو گڑا راج ءِ سرا کہ باور دار ئے گُڑا ترا سرجمیں راج یکجاہ ءُ یکمشت کنگی انت گڑا تو چیا وتا نزور گش ئے کہ ما دو زورگیر ءَ گوں جنگ کت نہ کنیں، ما نزور نہ انت ما اسل ءَ بھر ءُ بانگ انت کول ءِ سنگت ھیربیار مری ءَ ”بلوچ نزور نہ انت بلوچ ءَ وتی یکجاھیں تاگت پجا آرگی انت ءُ آئی ءَ را جوانیں رنگے ءَ کامرز کنگی انت“ منی جند ءِ زاتی ھیال انت ما ھما وھد ءَ سوبین بیں ما سرجم ءَ ءُ شعوری بنیاد ءَ اے گپ بہ منیں ما نا چھباری ءُ گوادری یا تربتی انت بلکیں ما بلوچ انت ءُ بلوچستانی انت گڑا ھما وھد ءَ مئے سوبینی ءِ نیمگ ءَ اولی کدم ایر بیت سنگت ھیربیار مری ءِ جھد ھمیش انت بلوچ ءَ شہ پنجابی ءُ گجر ءِ داتگیں مائینڈ سیٹ ءَ در بہ کنت ھندی بھر ءُ بانگیانی تہ ءَ در بہ کنت آیاناں بلوچ بوھگ ءِ سنچ ءَ بہ دنت گڑا بہ گند ئے اگاں بلوچستان آجو بوت گڑا الم ما وتی ڈیھ ءَ داشت کنیں اگاں نا چو زیکیں وڑ ءَ ھند ءُ دمگ، ٹکانی تہ ءَ بھر بہ بیں گڑا بلوچستان ءِ آجوئی وابے بیت بلکیں آجو بہ بیت آ بلوچستان ءِ واب ءَ ما گندگ ءَ انت آ بلوچستان ءِ دیستگیں واب سرجم نہ بیت ایشی ءَ چہ رند دگہ مستریں تاگتے کیت مئے سرا زورگیر بیت بلوچ آجوئی لوٹوکاں دور چاری کنگی انت ءُ سما کنگی انت مارا سئیں بھرانی بلوچانی سرا کار کنگی انت ءُ آیاناں تیار کنگی انت الم نہ انت یکیں ایران ءِ ھلاپ جنگ بندات بہ کنیں آیانی سیاسی ءُ شعوری تربیت دیگ چیروکائی بندات بہ کنیں ایپ بی ایم یا ھیربیار مری ایران ءِ ھلاپ ءَ سلاھبند نہ انت آ سرجمیں بلوچستان ءِ پسگاں اوگان ءِ زیردستیں بلوچستان ءَ گر دانکہ ایران ءُ پاکستان ءِ زیردستیں بلوچستان ءِ بلوچاں سیاسی ءُ شعوری بنیاد ءَ تیار کنگ ءَ انت لھتیں ھست گش انت شما کدی گجر ءِ جنگ بندات کن ات پرچا کہ اے ھما مردم انت ھرچ جیڑہ ءِ توجیل ءَ جنگ سرپد بنت وتی راج ءَ شعور دیگ ءُ پہ آؤکیں بلوچستان ءَ پہ کار کنگ مستریں سلاہ انت چدو مستریں جنگ چے بوت کنت نوں چشیں سیاسی گوگاھانی سرا مردم ءَ بزگ بیت ءُ کندگ ھم کیت گش انت شما کدی گجر ءَ جن اِت ایشانی دور چاری ءِ نگاہ سک نزور انت ھستیں وھد ءِ دو جزباتی اوگامانی پشت ءَ گل انت، ایشاں آؤکیں آجوئیں بلوچستان ءُ بلوچ ءِ بابدات ئے تُشے سنچ ءُ سما نیست تو اگاں ڈیھہ یے گپ ءَ کن ئے دو تیر ءِ آس دیگ ءُ چار پوجی ءِ مرگ ءَ گل بوھگی نہ انت ترا وتی سیاسی تربیت گیش کنگی انت ھمک بلوچ چکاناں چہ پنجابی ءُ گجر ءِ داتگیں مائینڈ سیٹ ءَ چہ در کنگ ءُ نوکیں راھے ءَ راھی کنگی انت، ایا بلوچستان آزاد بیت چونیں بلوچستانے بیت مارا پہ آوکیں بلوچستان ءَ چے کنگی انت؟
تنیگا مئے گیشتر مردم بس آجوئی ءِ نام ءَ گیپت بلے تنیگا آئی ءَ سما نیست بلوچستان ءِ سیمسر کجا انت اے درستیں گپانی مکسد اِش انت تو دانکہ وتا آجوئیں بلوچستان ءَ پہ وتی مھلوک ءَ تچکیں راھے نہ گیشین ئے ءُ نہ دے تئی ھرچ کار ءُ کربانی بے مانا بنت اے جنگ ھمے پیم روان کنت زورگیر مٹ بوان کن انت گلامی ءِ توک بلوچ ءِ گورا ھلاس نہ بیت۔
