لیو ٹالسٹای / کریم بلوچ
پنچمی در :
پگاه ( سُهب ) وهدے که سمیون چه واب پاد آتک ، زهگاں واب اتنت . لوگی ئی شتگ ات تاں چه همساهگاں نانے وام بکنت . زیکیں درآمد دراجیں چارپادگ ءِ سرا تهنا نشتگ ات . شلواری پاد ات و جامگی گوئر ات . بُرزگ ءَ سئیل کنان ات . دیمی چه زیکیں روچ ءَ روشنتر ات . سمیون آئی ءَ گوئشت : _ چون ئے منی جوانیں سنگت ! زان ئے که لاپ ، نان ءَ لوٹیت و لوچیں جان ، گُد و دریس . پیکه چیزے به وریں . باریں تئو کارے بلد ئے ؟ _ نه ، من هچ کارئ ءَ بلد نیاں و نزاناں . سمیون هیران بوت و گوئشتی : _ اگاں واهگے ببیت ، مردماں سرجمیں کاراں در بر انت و هیل کن انت . _ مردماں کار کن انت ، من هم کار ءَ کناں . _ تئی نام کے انت ؟ _ منی نام میکاییل انت . _ نون میکاییل ، تئو وتی باره ءَ چیزے نه گوئش ئے مه گوئش ، اے تئی کار انت . بلے ما را وردے پکار انت . اگں کارے که من ترا پیش ءَ داراں تو کت به کن ئے ، من ترا ورد دات کناں و وتی لوگ ءَ جَلّاں . _ هدا ترا به رکینات و سبز کنات ! من کار ءَ در براں و کار ءَ کناں . تئو تهنا من ءَ کار ءَ پیشدار که من چے بکناں . _ کار سَکّیں کارے نه انت ، ایش انت بچار … میکاییل کار ءَ چاراں بوت و چمّی آئی ءِ لنکک و دست ءِ سُرگانی سرا ، سَکّ اتنت . سمیون بندیکے ( دسگے ) زرت و وتی شست ءِ لنکک ءِ سرا پتات و آئی ءَ تاب دیاں بوت و میکاییل هم بندیکے زرت و همے کاری کرت و بندیکی تاب دات . پدا سیمون آئی ءَ پیش داشت که چون بندیک ءَ گوں موم چرپ کن انت تاں تاباں داشت بکنت و میکاییل ایشی ءَ هم دربرت . سمیون میکاییل ءَ چار ات و دیستی که جوانی ءَ چاراں و گوں کار ءَ دلگوش انت . پدا تُرندیں بندیکی زرت آئی ءِ تاب دیگی پیش داشت و رند ءَ سوچن ءِ زورگ و چون دوچگ ءِ کاری پیش داشت و اے کاراں باز په جوانی ءَ میکاییل چاراں و کنان ات و دری برت انت . هر کارے که سمیون آئی ءَ پیش داشت ، هما دمان ءَ ، دری بُرت انت و چه سئیمی روچ ءَ کاری بنگیج کرت . هنچو گوں زانتکاری و استایی کار ءَ گلائیش ات که گوئش ئے سد سالی دوچوکیں استایے . مدام کاری کت . کمّی وارت . کارءَ لچتگ ات . هبری نه کرت . بیکاری ءِ وهد ءَ بُرزگ ءَ چاران ات . درا په تَرّ و گردے نه شُت . بیکاریں هبری نه کت . گپ شپ و وش گپی مردمے هم نه ات . آرامیں مردے ات و کندگ ءَ هم نزانتی که چے یے . تهنا هر وهد که پکار به بوتیں هبری کت . تهنا هما یکیں گَشت ات که دیست اش که بچکندت . هما اولی شام ءِ شپ که بوٹ دوچ ءِ لوگی ، آئی ءَ شام دات .
