ھمگام بلوچی
بلوچ راج ھم دگنیا ءِ دگریں راجانی وڑ ءَ یک جتائیں راج ءُ یک جتائیں ڈیھے ءِ واھند اِنت۔ انچوکہ میان اُستمانی دگریں راجانی وڑ ءَ بلوچ راج ءِ ھم جتائیں دود ءُ ربیدگ اَنت ءُ پیلوئیں زبانے ھست اِنت ئِے کہ آئی زبان ءِ ھمُک ٹَوک ءُ گال ابرمی وت زگر ءُ پلگار اَنت بزاں بلوچ راج ءِ بلوچی زبان ھچ دگریں زباناں گوں سْیادی یے نہ دار ایت۔ گیدی ءِ دگریں زبانانی وڑ ءَ بلوچی زبان ءِ ھم یک پیلوئیں نبشتہ ءِ رھبندے ھست چمیشکا بلوچ ناں کہ چہ ھندی ءُ سندھی ءُ نیکہ چہ انگریزی ءِ وانگ ءَ وازمند اِنت۔ بلے بژن اِنت کہ بلوچ راج مرچی یک زیردستیں راجے پمیشکا مرچاں بلوچ ناں کہ وتی شھگانیں استان ءِ واھند اِنت ءُ نیکہ آئی ءِ زھگ ءُ پدریچ ماتی زبان ءَ ماں وانگجاھاں ونت کُت کن اَنت بلکیں ڈیھ سد ھند ءَ ونڈ ءُ چُنڈ اِنت ئِے ءُ راج ءِ زھگ درآمدی زبان ءِ وانگ ءَ بے وس اَنت۔ انچوکہ یک گلامیں راجے ءَ گوں بیت ھمے وڑ ءَ بلوچ ءِ ھم ھمُک بنی آدمی بُنکی ھَک ءُ اُکبال لگتمال اَنت۔ اگاں ما دجالی(موڈرن) گلامیں راجانی نشانیاں زان ایں گُڑا ھما تیوگیں نشانی ترا ماں بلوچ راج ءِ تہ ءَ گِندگ بنت۔ بلے اَنّی ئیں وھد ءَ مئے بُنگپ دگرے پمیشکا من وتی نبشتانک ءَ دراج کنگ نہ لوٹ آں بلکیں بُنگپ ءَ من ماتی زبان ءِ سر ءَ دار آں۔
انچوکہ بلوچ راج ءِ پدریچ چہ وتی ماتی زبان ءِ وانگ ءَ زِبھر اَنت۔ اگاں تو وتی چاگِردی ءَ چمشانکے بہ دے گُڑا تو زان ئے کہ گلامیں راجانی تیوگیں نشانی بلوچ چاگردی ءِ تہ ءَ ھست اَنت ءُ مرچیگیں دیمروئی ءِ کرن ءَ ھم بلوچ راج ءِ ماتی زبان ءَ ھرچ وڑیں بُنکی آسراتی نیست اِنت بلکیں گیشتریں کَھر ءُ زورانسری ھمیش اِنت کہ بلوچ راج ءَ ماں مکتب ءُ وانگجاھاں درآمدی زبان وانینگ بیگ اِنت پمیشکا توری سلیمانی گالوار ءِ دَمگ کاھان ءُ کوھلو سبی تا نسیرآباد، جیکب آباد، ٹُل، کندکوٹ، کشمور راجن پور، تونسہ تا ڈیرہ گازی ھان بہ بنت توری مکران ءُ رکشان ءِ تیوگیں دَمگ ءُ آتراپ بہ بنت ھر جاہ بلوچ زھگ چہ ماتی زبان ءِ وانگ ءَ زبھر انت توری روتاک ءُ گِندگُشے بہ بیت توری وانگجاھے بہ بیت ھرجاہ بلوچ ءَ پہ ماتی زبان ءِ وانگ ءَ ھچ وڑیں آسراتی نیست اِنت۔ بژن اِنت کہ سلیمانی دَمگاں، ھاسکن پنجاب ءِ زیردستیں بلوچاں اے ھم سما نیست اِنت کہ ماتی زبان بلوچی ءِ یک پیلوئیں نبشتہ ءِ رھبندے ھم ھست چوناھیگا اے ھم یک زیر دستیں راجانی نشانی اَنت اگاں یک راجے وتی زبان ءَ ڈالچار کنت ءُ دگرے ءِ زبان ءَ وان ایت گُڑا چد ءُ گیشتریں مجگی گلام وَ نیست اِنت۔ ھیپ اِنت کہ ما مرشی بلوچ ورنائیں نودربراں گِند ایں کہ چہ آیانی ٹَوک ءُ تواراں ھم بلوچی ءِ زگری نیست کہ یک وھدے ءَ بیتگ اَت اَنت۔
مرچیگیں بلوچ ورنائیں پدریچ دژمن ءِ انچیں پوتاری ءِ منّوگر اَنت اگاں تو زان ئِے گُڑا تو گْوش ئے کہ بلوچ راج ءِ مرچیگیں ناتپاکی ءِ بلاھیں سوب ھمیش اِنت کہ مئے دژمن ءِ پوتاری ءِ منّوگر ءُ ماتی زبان ءَ بے کساس دِیر ءُ گستا اِنت۔ من شمارا وتی یک سرگْوستے درشان کنگ لوٹ آں کہ دوشمبے ءِ روچ ءَ من گوں وتی مرد ءَ شال ءِ بازار ءَ پہ سودایے ءِ گِرگ ءَ گلائیش ات ایں اناگاہ ماں بازار ءَ ما مزن شھدربر ءِ پنچ بلوچ نودربر گوں ڈِیکّ وارت، من چہ وتی مرد ءَ موکل گیپت ءُ آ نودربراں گوانگ جَت ءُ پہ ساھتے ءَ نندنیاد ءُ چاہ ورگ ءِ گْوشت اَنت بلے آ چہ من ءَ کمیں ھز گِرگ ءَ ات اَنت پد ءَ ما آیاں تسلہ دات ءُ آیانی پجّی ءَ کساس سی دمان ءَ نشت، چاہ کیک وارت ءُ ما گوں آیاں سی ئیں دمان ءِ دیوان ءَ ٹَوک ءُ توار ءَ گلائیش بیتگ ایں بلے گوں ارسیگیں چَمّاں من ھمے گْوشت کن آں کہ آیاں بلوچ راجے ءِ بابت ءَ ھچ سما وَ نیست اَت۔ وھدے من چہ آیاں بلوچی زبان ءُ نبشتہ ءِ بابت ءَ جُست کت گُڑا گْوشت اش
“مارا وانگجاھاں بلوچی کس ءَ نہ وانینتگ پمیشکا ما بلوچی نبیسّگ ءَ وَ نہ زان ایں بلے ما ھمنچوک زان ایں کہ بلوچی ھم گوں اردو آباں نبشتہ کنگ بیت یکے ءَ گْوشت کہ من ءَ چیزے روچ بیتگ کہ یک سنگتے ءَ پہ زبان ءِ وانگ ءُ نبشتہ ءِ ھیل کنگ ءَ بلوچی وٹس ایپ گَلے ءَ ھوار کتگ گُڑا من پوہ نہ بیتگ آں پمیشکا من چہ ھما گَل ءَ در آتکگ ءُ گَل یلہ کتگ۔۔۔۔۔”
گُڑا من ھما اولی نودربر ءَ گْوشت کہ تو اے آباں را اردو آب گْوشگ ءَ ئے ترا کَے ءَ گْوشت کہ اے آب اردو ئیگ اَنت ءُ تو وَ زان ئے کہ ھمُک زبان ءَ یک راجے بیت ءُ ھمُک راج ءَ یک زبان بیت انچوکہ روسیانی زبان روسی اِنت، اَربانی اَربی، سپین ءِ سپینیش، سندھیانی سندھی، پنجابیانی پنجابی، انگریزانی انگریزی، بلوچ ءِ بلوچی ءُ پرانس ءِ پرنچ گُڑا اردو کئیگ اِنت؟ دومی اگاں تو ھندی نہ وانتگ گُڑا تو ھندی تامُر ءُ ھندی گِندگُش ءَ چوں سرپد بہ ئے؟
سیمی اگاں” میں پانی پی رھا ھوں، میں رات کو سوتا ھوں” اے اردو اِنت گُڑا ایشی ءِ ھندی رجانک چون بیت؟
آ ساھتے ءَ بے توار بیتگ اَنت پد ءَ یکے ءَ گْوشت “ما اردو گوں ھمے آباں ونتگ دومی ما وَ نہ زان ایں کہ اے آب کئیگ اَنت ءُ اردو کجام راج ءِ زبان اِنت” گُڑا من آیاں درائینت کہ شما نی وَ کسان نہ اِت۔ شما مزن شھدربر ءِ گڈی سال ءِ نودربر ات اگاں شما چوشیں جُستانی پسّو دات نہ کن اِت گُڑا شمارا سد رَند ءَ پِٹ اِت۔ شمئے کِر ءَ دامگ ھم ھست گڑا شما چہ گُوگل ءَ چے ءَ پٹ ءُ شوھاز نہ کن اِت۔ دومی اگاں شما زان اِت کہ بلوچ برات ءُ گْوھار مرچاں وتی دست ھورکی ءَ ماں وٹس ایپ ءُ پیسبُک ءِ چاگردی رسانکدر ءَ پہ ماتی زبان ءِ دیمروئی ءَ جُنزان اَنت گُڑا شما چی اود ءَ ھوار نہ بہ اِت۔ باید اِنت ما ھم وتی دست ھورکی ءِ ساھتے پہ ماتی زبان ءِ دیمروئی ءَ بہ دے ایں گُڑا ما نادْراہ نہ بہ ایں۔ پد ءَ آ ھم اے بابت ءَ راست کتگ اَنت کہ اے آب وَ اردو ءِ نہ اَنت بلکیں اَربی ئیگ اَنت۔ اردو وت ھندی زبان اِنت کہ اَربی آباں گوں نبشتہ بیگ اِنت۔ اردو ءِ نودَہ ءُ پنچ در سد ھندی انت ایدگہ پنچ در سد پارسی، اَربی ءُ بلوچی ءِ گال اَنت کہ دُزّ اتگ اَنت ئِے۔ دومی دلجم بہ بہ ات کہ گوں ھمے آباں ھندی ءَ چہ پیش ءَ پارسی، داری، پشتو، کُرد، ترکی کشمری ، سندھی آرمانیاں ءُ بازیں راجانی زبان نبشتہ بیگ ءَ انت۔
یوروپین استانانی تیوگیں زبان توری، پرنچ، سپینیش ءُ پورتگالی بہ بیت توری روسی ءُ سویڈاش ءُ دگہ زبانے بہ بیت ھمے کُل انگریزی آباں گوں نبشتہ بیگ اَنت۔ پمیشکا ھرچ زبان ءَ وتی کارمردی ءِ ھساب ءَ آب کش اتگ اَنت۔ کشمری زبان ءِ نشتہ ءِ تہ ءَ ” ص” نیست انت، اَربی ءَ چے نیست اِنت ءُ بلوچی ءِ وتی آب ءُ نبشتہ ءِ رھبند اِنت کہ آئی ءِ لاپ ءَ “ث ح خ ع غ ذ ف ق ص ض ط ءُ ط” ھوار نہ اَنت بزاں اے بے دوازدھیں آباں مئے بلوچی نبشتہ ءِ رھبند پیلو اِنت اگاں کسے مارا ءَ اے شگان جنت کہ بلوچی گوں اردو آباں گوں نبشتہ بیگ اِنت گُڑا بزان اِت کہ آ بینگ ڈول ءَ بِلاں وکگ ءَ بنت مارا آئی ءَ ھچ کار نیست اِنت۔ بلکیں آ زان ایت اے اردو نہ اِنت بلکیں ھندی ءِ وتگڑ اِنت کہ اَربی آباں گوں نبشتہ بیگ اِنت۔ گوں ھمے آباں گیدی ءِ کساس پانزدہ ءَ زبان نبشتہ بیگ اِنت
پد ءَ ما آیاں را پنت دات کہ چوناھیگا شما بلوچ ات اگاں شما بلوچی پیسبُک ءُ وٹس ایپی وانگجاھاں ھوار بہ بہ ات ءُ بلوچی درونتاں بہ وان اِت منی ھیال ءَ شما یک ھپتگے ءِ تہ ءَ بلوچی وانگ ءُ نبشتہ کنگ ءَ بلد بہ ات۔ باید انت شما بلوچی کلیتاک ءَ ماں وتی گوانکو ءَ ایرگیج کن اِت ءُ بلوچی وت بہ وان اِت وتی مزن شھدربر ءِ ھمتبک ءُ ایدگہ بلوچ نودربراں ھم ماتی زبان ءِ بستار ءُ ارزشت ءِ بارو ءَ سرپدی بہ دے اِت پد ءَ وت وٹس ایپی گَلے جوڑ کن ات کہ شما مزن شھدربرجاہ ءِ بلوچ وت بلوچی بہ وان اِت چد ءُ پد دربرجاہ ءُ شھدربرجاھاں ھمے ھیل کن اِت کہ بلوچ ورنائیں نودربر بلوچی وانگ ءُ نبشتہ ئِے کنگ ءَ ھم بلد بنت چمیشکا مئے ماتی زبان ءِ زگریں گال گار ءُ بیگواہ نہ بنت۔
چہ منی چرے ھبراں آ سَک پشل بیتگ اَنت ءُ سوگند ھم کت اش ما وتی بلوچ نودربراں گوں ھبر کن ایں ءُ وٹس ایپی گَل ءَ بلوچی وت وان ایں ءُ وتی سْیاد ءُ وارساں ھم وانین ایں۔ دومی من بلوچ راج ءَ ھمے گْوشگ لوٹ آں کہ زبان ھست گُڑا ما ھست اگاں ما زبان ءِ ارزشت ءُ بستار ءَ مہ زان ایں ءُ زبان ءَ ڈالچار کن ایں گُڑا ما دلجم بہ بہ ایں ما پد ءَ گار ایں ءُ چہ سرکار ءِ نیمگ ءَ گلامیں راج ءَ را زبان ءِ دیمروئی ءَ ھچبر آسراتی ءُ دلبڈی نہ رس ایت بلکیں گاسگ چٹّ ھر دمان ءَ ترا دلپروش ءُ بیھار دے اَنت۔ مرچیگیں وھد ءَ بلوچ چاگردی رسانکدر بلوچی درونت ءُ بلوچی وانینوک سَک باز اَنت اگاں یک بلوچے ماتی زبان ءِ وانگ ءَ بُنگیج بہ کنت گُڑا آ زیت ماتی زبان ءِ نبشتہ کنگ ءَ بلد ءُ زبر بیت باید انت ما وتی لوگ ءِ زھگاں بلوچی وانین ایں ءُ آیاں بلوچی نبشتہ کنگ ءِ سکین بہ دے ایں۔ اگاں ما بلوچی نبشتہ کنگ ءَ پیسر ءَ بلد ایں گُڑا اے تئی راجی ڈبہ ءُ زمہ واری اِنت کہ تو نی ئیں ساھت ءَ یک بلوچی وٹس ایپی گَلے ٹھین ءُ وتی دَمگ ءِ مردماں بلوچی وانینگ ءَ بنا کن ءُ گوں وتی کاروان ءَ دیم جُنزان کن۔
شالا سوبین بات ئے، بلوچستان ھست بات ءُ بلوچ مَیزران بات اَنت
