من تھنا یک نیم تھاریں کوٹی یے ءَ ءُ کوٹی ءَ دروازگ نیست چو گش ئے کوھنیں ڈروتگیں کلاتے ءَ اِنت کوٹی ءِ اندر ءَ یک ءُ دو کتاب اَنت یک ڈائری یے یک جَگّے گوں گلاسے ءَ لھتیں بُونڈک اَنت نیمروچ کہ بیت وھدے گواتے سر کنت دنز ءُ آڈھور بیت ھاک ءُ دنز انچو مچ بنت چو گش ئے ریک ءِ ڈورے ءَ اِنت نا نشت کنت نا وپت کنت مردم کسّے بہ اِت بہ گندیت باور نہ کنت کہ اِد ءَ مردم زندگی کنگ ءَ انت پرچا کہ ادءَ تھنا منی کوٹی نہ اِنت بلکیں سرجمیں میتگ ھمے وڑ انت اے میتگ ءَ بے ھالاں “بجلی” نیست اے میتگ ءِ سرجمیں گِس ھاک ءِ کوٹی انت اگاں یک نوکیں مردمے اے میتگ ءِ گِسّاں بہ گندیت آ ھمے سما کنت اے یک کوھنیں جنگ جاھے بوتگ اے گس چو چیدگ ءِ پیم ءَ درا کن انت پرچا کہ اے میتگ ءِ گِس درست ھاک ءِ کوھنیں ڈروتگیں کوٹی اَنت بہ گندئے لھتیں الکاپیں بہ بنت گیشتر کوھن ءُ ڈروتگیں کوٹی انت میتگ ءَ چہ دور ءَ یکے اے میتگ ءَ بچاریت آ بلکیں ھمے سما کنت کہ کرنے ءَ پیش اد ءَ میتگے آباد بوتگ آ اے نہ زانت کہ اد ءَ انگت مردم ھست اد ءَ زندگی کنگ ءَ انت ءُ اے ڈروتگیں کوٹیانی تہ ءَ وتی زند ءِ چاریں روچاں گوازینگ ءَ انت۔۔۔
من چوناھا ڈن ءَ در نیا آں دکان ءَ کارے بیت گڑا رواں دگہ گیشیں تر ءُ گرد نہ کن آں چیزے زلورت بیت روان زوران ئے تچک ءَ پہ وتی کمپان ءَ واتر باں ۔ من ءَ اے میتگ دوست بیت پرچا کہ اے میتگ ءِ دمک ءُ در درست من ءَ وتی جند ءِ زمین ئے ترانگاں گیج انت۔ “بلے منی ھاک ءِ مٹ بوت نہ کنت”
روچ کہ بیگاہ بیت درست میتگ ءِ کماش وتی گسانی دپ ءَ پترے پچ کن اَنت چاھے جوڑ کن انت ننداں دیوان کن انت۔۔۔
میتگ ءِ دمکانی تہ ءَ مدام زھگاں گنداں ٹیری لیب کنگ ءَ وتی کسانی یات کیت تھلیں بچکندگے جناں سرگراں پہ ارمانیں دلے ، دل ءِ تہ ءَ گپ کناں دریگتیں اے بدیں نوبت مئے سرا مہ یتکیں ما چو در پہ در مہ بوتین اِنت مرچی بہ گندئے ما چو درامد ءَ پہ بے وسی اے دمکاں ویل نہ اِت اِنت۔
اے میتگ ءِ نزیک ءُ گوراں ھچ وڑیں کشت ءُ کشار نیست لھتیں کوھنیں گز انت پہ ھسابی انت میتگ ءِ دمکانی تہ ءَ ھست انت ءُ میتگ ءِ چپ ءُ چاگرد ءَ نزیک ءَ لھتیں کوہ انت کوھانی سرا اوں کوٹی ھست نہ زاناں اے چونین اَنت پرچا کہ من ءَ اد ءَ گیشیں سرپدی نیست ھرچی کہ دیستگ ھما گشگ ءَ آں میتگے ءِ تہ ءَ کسانیں شیپ ھم ھست ھور بیت آپ ھم کار انت ھور کہ بیت گڑا موسم وش بیت نا دنز ءُ آڈھور بیت نا ریک مچ بیت ءُ لھم لھمکیں گواتے کش ایت مردم ءَ تاھیر بکش ایت بلے دگہ گپے ھور کہ بیت میتگ ءِ دمکانی تہ ءَ پیدل ءَ ھچ گردگ نہ بیت سک لِچ ءُ مین بیت۔
میتگ ءِ زھگ کوکار کن انت گل بنت آپانی تہ ءَ گوازی کن انت من اوں وتی کوٹی ءَ ڈن ءَ درکایاں وتی کمپان ءِ تہ ءَ گڑا موسم ءَ ندارہ کن آں وتی دل ءَ وش کن آں گوں وت گپ کن آں وت ءَ وت جُست کن آں وتی جُستانی پسو ءَ وت دئے آں۔۔۔
بلے اے جاہ ءَ زمستان ءَ سک سرد بیت کمو کمو برپ ھم رچ اِیت برے برے دل ھب کنت گڑا کتابے دست ءَ کن آں وانگ ءَ بندات کن آں چوناھا گیشتر من گوں وتی گوانکو ءَ دست گٹ آں برے برے وتی ڈائری ءِ تہ ءَ چیزے نبشتہ کن آں ءُ برے برے نمیرانیں نورھان بزنجو ءِ سوتاں گوشداراں وتا مشکول کن آں ھمے وڑ ءَ روچ رؤت شپ بیت شپ روچ بیت۔۔۔
من شپاں سرجمیں پہ آگائی گوازیناں روچ ءَ سرجمیں واباں روچ من ءَ ھچ وش نہ بیت برے برے مھلہ پادکایاں گڑا چماں شوداں دپارے نان وراں پد ءَ چاھے اڈ کناں وراں وتی گس ءِ آتراپ ءَ تراں گرداں چو گش ئے منی چیزے گار انت وس کن آں روچ نہ روت برکت نہ بیت انچو سما بیت گش ئے روچ منی جان ءَ سوچِنُگ جنگ ءَ اِنت انچو کہ روچ روت کوھانی پشت ءَ اندر بیت شپ کہ ایر دنت گُش ھیگاں منی مکھیں مات اِنت من ءَ سھڑینگ ءَ انت منی ءُ شپ ءِ انچیں سیادی یے۔
چیزے وھد بیت من ءَ ھچ سما نہ انت اے روچ ءُ شپ اے ماہ ءُ سال چون گوزگ ءَ انت من و دیر انت اے سالانی ھساب ءَ دارگ ءَ نہ آں من وھدے وتی پیسبک ءَ پچ کن آں گڑا پوسٹاں گنداں کہ نبشتہ انت کہ نوکیں سال مبارک بات یا ائید مبارک بات۔۔۔
ھو چیزے وھد بیت من ھمے پیم زندگی کنگ ءَ آں ھو اے منی کسہ انت تو بہ گندئے ھیران بہ ئے یک انسانے اے وڑ چون زندگی کنت بلے دگہ گپے ترا گوْش آں اگاں انسان ءِ دل بہ لوٹ ایت چے کت نہ کنت۔۔۔
