باسنی ژان لاپونتینا / کریم بلوچ – تهل
نیلیں آزمان ءِ پراهی ءَ کپوتے بال کنان ات . آئی ءِ دوئیں مزنیں پَچیں بانزل ، چو دو نگرهی گواتگیچن ، گوات ءَ لیب کنان اتنت .
موریک آزمان ءَ چارست و کپوت ءِ بے دروریں بال شانگی دیست و هنچو هیرانی آئی ءِ پر نماهیں بانزلانی لیب ءَ چاراں بوت تاں که سری چهر کت و شترت و تچوکیں آپ ءَ کپت . آپ رُمبان و تچان ات و ترستگیں موریک ءَ هم گوں وت بران ات .
کپوت موریک ءَ دیست که آپ ءَ بُـڈوران ات . کپوت دَلهار و هما دمان وتا تاں آپ ءَ سرکـُت ، کاهی سِست و موریک ءِ نیمگ ءَ دراج کناں بیت و آئی یے چه آپکــَـش ــ آپگرد ــ رکینت .
آپتاپ زوت لیهڑ و تــَـریں موریک ءَ هُشک کت و وژبهتیں موریک جهد کت که کپوت ءِ نیکی ءِ بدل ءَ پرآئیا کارے بکنت . « چون من تئی نیکی ءِ بدل ءَ ادا کت کناں ؟» – موریک پگر کناں گوئشت .
بلے اناگت پیش چه آئیا که آئی پگرے کت بکنت ، پرآئیا چشیں جاورے تیار بوت .
کپوت نیمروچ و پیشیم ءَ آتک و درچک ءِ ٹالے ــ شاهڑے ــ ءَ نشت تاں که کمے آرام بکنت . کپوت ءِ آرام کنگ ءِ وهد ءَ چـُکــَـلــُکے آئیا دیست . آئیا وتی تیرکمان چه کیسگ ءَ کــَشـّـِـت ، ڈوکی چت و تیر کمان ءِ پوست ءَ مان کت وتیار ، آرام ، آرام درچک ءِ نیمگ ءَ روان بوت .
پوره تیرکمان ءِ جنگ ءِ دمان ات که موریک بَچَلــُـک ءِ پاد ءَ گـَست ــ گــَـٹ گپت ــ.
بچلک کوکارے کش اِت و تیرکمان چه دستی کپت .
کپوت چه واب جهسرت ، وتی بالی راست کرت انت و بالی کت تاں برز برز ، په روچ ءِ گندک ءَ !
٭٭٭٭٭٭
