ھمگام بلوچی آزمانک
نبشتہ کار: گپور درملکی
آئی ءِ پت ءِ کبر ءِ ھاک ھشک نہ اَت اَنت کہ مات ءَ یک گوھرونکی تپےءَ گپت نہ زمین ءَ پیم بوت نہ جاڈات ئے تپ ھچ سِدگ ءِ وڑ ءَ نہ اَت. جان ءِ گوش ئیگ ءَ اِشکر درنزگ ءَ اَت آئیءَ سھب ءِ تربت ءِ روکیں لوکل موٹل ءِ ھلائینوک ءَ گوشت کہ برات باندات مارا تربت ءَ بر گوں کہ مات ءِ تبیت شر شر نہ انت . موٹل ھلائینوک ءَ سر سُرینت ءُ ھوئے کت , سھب آ لوکل ءَ سوار بوت انت ءُ تربت ءِ چونگیءَ رس اِت اَنت آئیءَ موٹلءِ ھلائینوگءَ نرم نرم ءَ گوشت کہ لالا مارا سیول ءَ بر ءُ ایر کن. موٹل ءِ ھلائینوک ءَ آ سیول ءَ ایر کت انت ءُ آئی ءَ وتی مات داکترءَ پیش کت داکترءَ ِ گوشت گوھار تئی ماتَ اِدءَ دراہ نہ بیت ءُ وتی ماتءَ کراچی ءِ جلگھیں شھر ءَ بہ بر کہ تئی مات ءِ اے تپ مئے واکءَ در انت ءُ تئی کرءَ سے یا چار روچ پشت کپتگ ھمنچو زوت تر بیت مات ءَ وتی ءَ پہ مزن شھر ءَ بہ بر کہ تئی مات جَلگ ءِ وڑ ءَ نہ انت آ ھشک ھیراں بوت دل ءَ گوشت ئے کہ من ءَ وَ بس ءِ کراہ گون نہ انت سھبیگیں لوکل ءِ کرایہ من انگت نہ داتگ انت من مزنیں شھر ءَ چوں برواں مزنیں شھر ءِ واست ءَ نول باڑہ لوٹ ایت پد ءَ اے داکتر زر لوٹ انت ءُ ایشانی چم پہ پندول ءُ کیسگ ءَ سک اَنت اگاں یکے پہ ردی دست ءَ پندولے یا کیسگ ءَ بہ بارت داکتر گوش اِیت نوٹے من ءَ دنت , آ ھیران ءُ ششدر بوت چے بہ کناں کمک پگرءَلگ اِتَ ءُ ھیالءِ کُت پدءَ ھیالے آتک ئے ءُ وتی دل ءِ تہ ءَ گوشت ئے کہ ھو پہ وتی راج ءَ کلوھے راہ دیاں بلکیں منی مدت ءُ کمک بہ بیت مات چہ اے بلاھیں تپءِنادرواھی ءَ بہ چٹ ایت. پہ دلءِ گاری ءَ یک کلوہ ءُ جارے شنگ کت ءُ کلوہ من رسانکدراں شنگ بوت بیسبک ءَ ءُ واٹساپانی گروپاں درستاں گوشت شر بائید مدت بہ بیت بازیناں گوشت بابا اے دروگ بند ایت ھچ کس بیمار نہ انت ھچ کس مجبور ءُ لاچار نہ انت. اے بس پہ مھلوک ءِ رد دیگ ءَ چوش کن اَنت آ نادرواہ جاہ ءِ کوٹی یے دپءَ پرشتگیں کرسی ئے سرءَ نشتگ ات چمے من گوانکوءَ ات انت. بلے نہ کولوھی ءُ نہ یک تواری اتک دوروچ گوست بلے ھرامبءَ گوانکوءَ تواری نہ کت نہ کہ ھال پرسیءَ نہ کہ پہ مدت ءُ کمک ءُ آ باز تکانسر ات پرشتگیں کرسی سرءَ دستءِ سروشی جتگ ات اَنت ءُ دست ےءِ سرءَ سَک ات انت چمانی ارسی شتور گران ات انت اچانگ نرسءَ توار کت گوھار گوھار بلے آ وتی ھیالانی تہءَ گار ءُ بیگواہ اَت کہ نرسءِ توارءَ آ جاہ سِر اِت ءُ آئی ءَ نرس ءَ گوشت کہ چے بوتگ ءُ نرس ءَ پہ ملوریں چماں آ یک برے چاراِت پد ءَ گوشت ئے گوھار تئی مات ءَ اِے دنیا یل ءَ کت. ءُ ھرچ کسی راہ ھمیش اِنت کہ آ توست کپت. کمکے پد یک کلوھے شنگ بوت کہ یک ماتے ءَ بیران کتگ یک بزگیں جنین چکے گون ئے ءُ ماں تربت ءَ سیول اسپتال ءَ بلے اے بزگیں گوھار ءَ ارداچ ءُ موٹل کراہ ءِ زر نیست اَنت کہ وتی مات ءِ کنٹءَ پہ وتی ھنکینءَ سر بہ کنت بلوچ راجءَ دزبندی اِنت کہ مدت ءُ کمک بہ کن انت تاکہ اے بانکیں گوھار وتی ماتءِ کنٹءَ وتی ھنکینءَ سر بہ کنت ءُ آئیءَ وتی دست سرءَ اَت اَنت ءُ پہ بیوسی وتی مکھیں مات ءِ کُنٹ ءَ چارگ ءُ ودار ءَ اَت,
