پرشتیں لانچ ءُ کماشیں مستریءِ زانت!

پہ بلوچ زھگاں

رجانک: آرچن بلوچ

یک بلاہیں لانچےءِ انجن ھراب بوت، اشی انجن سک مزن ات، لانچءِ واجہ کوہ کپتنت، سجہیں شھرءِ مستری آؤرتنت، بلے اشاں انجنءِ ھرابی درگیتک نہ کرت۔ پدا اشاں یک کماشیں مستری ئے آؤرت کہ چہ کسانیءَ  ہمے لانچانی سرا کاری کتگ ات، گوں کسانیں بگلجولیءَ اتک ، رسگءِ شرتءَ لانچءِ انجنءِ چارگی بندات کرت۔ لانچءِ انجن سر تاں پاد کماشءَ ہورتیءَ پٹ ءُ پول کت ءُ چاریت۔

اے لانچءِ دو واھند اتنت، کماشیں مستریءَ چارگا اتنت، ہمے امید کشگا اتنت کہ اے لانچءِ ھرابیءَ کش ایت۔

لانچءِ پولگا کمو ادارءَ پد کماشیں مستریءَ وتی پٹ ءِ کار ھلاس کت ءُ آرام آرامءَ دیم پہ وتی بگلجولءِ  نیمگا شت، چہ اشیءَ یک کسانیں کدینگے کش ات ئے۔ لانچءِ انجنءِ یک حاصیں جاہیءَ نرم نرمءَ دو رندءَ کدینگ جت ئے۔ لانچءِ انجن ہما دمانءَ چالو بوت۔ لانچءِ واھند چہ گلءَ بال بوتنت۔ شادانی ئے کت کہ گڈسرا لانچ انجن پہ کارءَ جوان بوت۔

دومی روچءَ لانچءِ واجہءَ چہ کماشیں مستریءِ نیمگا یک رسیدے رس ات۔۔ اشی تہا 10000 ڈالر نبشتہ ات۔ لانچءِ واجہ چہ زھر گپتنت۔  زھرئے گشت ئے، ’’اشیءَ وا ھچ  کار نہ کتگ، تھنا دو رندءَ انجن سرا کدینگ جت ئے ءُ  نو دہ ہزار ڈالر لوٹیت۔  لانچ واجہءَ  ہمے رسید سرا نبشتہ کت کہ ’’ تو تفصیل سرا وتی کرتگیں کارانی مزءَ نبشتہ بکن۔‘‘

دومی روچءَ کماشیں مستریءَ وتی کارءِ مزدءِ ھساب چو نبشتہ کرتگ ات۔۔

کدینگ جنگءِ مزد ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ 1. 000 &

کدینگ جنگءِ جاہءِ زانگ ءِ مزد ۔۔۔۔۔۔۔۔۔۔۔۔۔۔۔     9999.00 &

 کسہ ءِ درونت۔۔۔۔۔۔

پہ زندءِ جنجالانی  دربرد مان  بردا تجربہ‘ ءُ ’زانت‘ کار دنت، ایوکیں ’جھد‘ درد نہ وارت۔

جھدءِ وتی ارزشت ئے، بلے اے زانگ  ہم سک المی انت کہ جھدءِ کنگءِ ھکیں جاہ کجام انت!؟