هست ات بچلکے. نامی پلیپ ات
یگبرے سرجمیں زهگاں وانگجاه ءَ شت انت . پلیپ هم وتی کلاه ءَ زرت و لوٹتی که وانگجاه ءَ به روت . بلے مات گوئشت :
_ پلیپُک تئو کجا سر گپتگ ئے ؟
_ وانگجاه ءَ .
_ تئو هنگت کسان ئے. مه رو . _ و مات آئیا لوگ ءَ داشت .
آئی ءِ پت سُهب مُهلّا جنگل ءَ شتت . مات هم په کارے چه لوگ ءَ درکپت . لوگ ءَ پلیپک گوں وتی پیریں بَلّـُک پَشت کپت انت که ناجوڑ ات و وتی نپاد ءَ وپتت . پلیپک یک و ایوک ات . چه تهنایی ءَ بور بوتگ ات . گشت تاں وتی کلاه ءَ وی بکنت ، وتی کلاهی نه دیست ، بلے پت ءِ کوهنیں کلاهی ودی کرت و سری کرت و په وانگجاه ءِ روگ ءَ درکپت .
وانگجاه ، آباتی ءِ دومی نیمگ ات . چرچ ( ایسائیانی مسیت )ءِ کش ءَ . وهدے که پلیپک وتی میتگ ءَ روان ات ، کچکاں آئیا کار نه داشت ، پر چا که آئی اش زانت . بلے وهدےکه درآمدیں میتگ ءَ مان بوت گڑاں گپ گپ کناں اول « ژوچکا » نامیں کچککے و رند ترا مستریں « گرکک » نامیں کچکے آئی ءِ رند ءَ کپت انت . پلیپک تتک ، کچکاں آئی ءِ رند اتنت ، آئی تچاں و گوانک جنان ات پادی بند گپت و جاهے کپت .
مردے چه لوگ ءَ درگپت ، کچکانی گلینت و گوئشتی :
_ کُجا تو ٹِک تیر ، یک و تهنا تچگ ئے ؟
پلیپُک چیزے نه گوئشت . چه ڈگار چست بوت و سرجمیں راه ءَ تچاں بوت . تتک تاں که وانگجاه ءَ رَست . ڈن ءَ کسے نیست ات ، بلے کلاس ءَ وانوکانی توار و هبران اشکنگ بوتنت . پلیپُک هنوں ترست . اگں وانینوک و استا آئیا چه اودا به گَلّینیت ؟… اوشتات و پگر کناں بیت . چے بکنت . ارگردیت … اپدا کچکاں آئی ءِ رند کپ انت ، وانگجاه ءَ مان به بیت ، استای ءَ چه ترسیت . ماں همے وهد ءَ زالے ءَ بالٹی یے گون ات و چه هموداں گوئزان ات ، گوئشتی :
_ سرجماں وانگ انت و تو ادان چے کن ئے که اوشتاتگ ئے ؟
پلیپک شت و کلاس ءَ مان بیت . وتی کلاهی چه سر دور کرت . دروازگی پیش کرت و بست . کلاس چه وانوکاں پُرّ ات . پهک گپ و هبر اتنت . استای ءِ گردن ءَ سُهریں دزمالے پتاتگ ات و وانندهانی نیام ءَ اے نیمگ و آ نیمگ روگ ات . پلیپ ئی که دیست کوکاری کت :
_ تو کے ئے ؟_ پلیپک وتی کلاه ءَ مُهر داشت و چیزی نه گوئشت . _ هئو تو کے ئے ؟ _ پلیپک چیزے نه گوئشت . _ بلکیں تو گنگے یے ؟ _ پلیپک هنچو ترستگ ات که زبانی بند بیتگ ات . _ اگں چوش انت و نه لوٹ ئے هبر کن ئے وتی لوگ ءَ برو .
پلیپک ءِ دل لوٹت و پایستی که هبر بکنت ، بلےگٹی چه ترس ءَ هُشک و بند بوتگ ات . کلاس ءِ استائی چارت و گریت ئی . گڑاں استای ءِ دل سُهت و ازابی بیت . وتی دستی آئی ءِ سر ءَ مرز ات و لباسی کت و چه چکاں سوجی کت که اے بچلک کے انت .
_ اے پلیپُک انت . « کاستیوشکین » ءِ برات . دیر انت که لوٹیت په وانگ ءَ به ییت ، بلے ماتی آئیا نیلیت که کسان انت . په وانگ ءَ باز هُبی هست .
_ جوان . هنوں به نند چارپاد ءِ سرا و وتی برات ءِ کش ءَ . من چه تئی مات دزبندی کناں که ترا په وانگ ءَ ، اجازت به دنت .
. استا پلیپک ءَ آباں پیشداراں بوت بلے پلیپک آبان ءَ هنوں کم کم ونت کت .
_ نوں ، باریں وتی نام ءَ بنبیس .
_ خ وی _ ی _ خ وی ، لِ _ ی ل ی _ پِ اُک _ پُک . _ پلیپُک گوئشت .
پهک کند اتنت .
_ شاباش ، _ استا گوئشت . _ کے ترا وانگ پیشداشته ؟
پلیپُک کند ات و گوئشتی :
_ کاستیوشکا ! منا شانس نیست . من پهک چیزاں زانت ، من لوٹاں و جهد ءَ کناں .
_ تو وتی ستای ءَ بل . در برگ ءِ جهد ءَ بکن . _ استا گوں کندگے پلیپک ءَ گوئشت .
چه هما روچیں تاں هنوں پلیپک، ایدگه وانندهانی همراه ( پَجّی ) ءَ وانگجاه ءَ روان انت .
(Илл. Г.Спирина)
 |
ReplyForward
|
