نبشتہ کار: ھبیب الرھمان
ھمگام بلوچی
بلوچ راج ءِ راجی پجار ءُ ماتی انامت، بزاں آئی ماتی زبان بلوچی، بلوچ پدریچ ءَ ماں وانگجاھاں وانینگ نہ بیتگ ءُ نہ بیگ اِنت پمیشکا بلوچ راج وتی ماتی زبان ءِ نبیسّگ ءَ ھیل نہ اِنت بزاں آ انچیں گلامے کہ ماتی زبان ءِ بستار ءُ ارزشت ءَ بے ھال ءُ بے سُد اِنت چمیشکا مرشی ئیں وھد ءَ ورنائیں نودربرانی گپتران ءِ لاپ ءَ ماتی زبان ءَ را ھما زگری ءُ پلگاری نیست۔ بلوچ راج ءَ را یک انچیں اڑ ءُ پندلے ءَ درامدی زبان ھندی وانینگ بیگ اِنت کہ آ دیمی آیوکیں دھَکاں چہ ماتی زبان ءَ پیلوئی ءَ زَبھر بیت گُڑا اے درگت ءَ باید اِنت بلوچ راج ھم وتی راجی پجار ءِ رکینگ ءِ ھاتر ءَ آگاہ بہ بیت ءُ آ بَدّیں پندلے توجیلے در بہ گیج اِیت۔
انچوشکہ کرآن شریپ ءَ را درشان انت کہ اگاں بنی آدم پہ وتی امروز ءِ جنجالانی ھلاسی ءَ تچ تاگ بِہ کنت گُڑا ھُدا مدام آئی ءِ کُمک ءُ واھر ساڑی بیت ءُ اے پنت ھم نبشتہ ئِے اِنت کہ بنی آدم بُرز ءُ پْراھگ/کائنات ءِ بلدیں مھلوک اِنت کہ مَجگے ھست اِنت چمیشکا امروز ئِے ھمک جنجال ءُ آڑ ءَ توجیل وَ ھست اگاں بنی آدم وتی مَجگ ءَ شَر کارمرد بِہ کنت۔
باید انت بلوچ وتی ماتی زبان ءِ وانگ ءُ نبیسّگ ءَ ھیل بِہ کنت۔ وتی گوانکوانی لاپ ءَ بلوچی کلیتاک ءُ بزانت بلد ءَ درپ ءُ کارمرد اش بہ کن انَت۔ پد ءَ توری چاگردی رسانکدر بِہ بیت یا وٹس ایپی گَل(گروپ) بِہ بنت بلوچ راج گپ رپ ( Chatting) ءَ گوں ماتی زبان بلوچی ءَ ھیل کن انت اگاں نبیسّگ ءَ ردی یے بیگ انت گُڑا مارا مڑا ءِ آماچ نہ بیگی اِنت بس دیم ءَ جُنزان کنگی اِنت گُڑا ما نبیسگ ءَ ھیل کن ایں۔
مرچاں بلوچی تندتاک ءُ چاگردی رسانکدر ءِ توک ءَ بے کساس بلوچی نبشتانک ءُ نکان شِنگ بنت باید انت ما ھمانی وانگ ءَ ھیل ءُ رِد بِہ بَہ ایں کہ مئے بلوچی سْیاھگ زَبر بِہ بیت۔ مرشی ئیں وھد ءَ بلوچ رزاکاراں بے کساس بلوچی وٹس ایپی وانگجاہ اڈ کتگ اَنت کہ اود ءَ بلوچ ورناھاں ءَ را بلوچی وانینگ بوگ اِنت باید انت ما ھم اود ءَ وت باسک بِہ بَہ ایں، سْیاد ءُ وارساں آگاھی بِہ دے ایں کہ اود ءَ وٹس ایپی وانگجاھاں باسکی بِہ زور اَنت ءُ چہ اود ءَ زیت ماتی زبان ءِ دربرگ ءَ رند راج ءَ بلوچی ءَ وانین ایں۔ ھمے پیم ءَ باید انت بلوچ گْھار ھم بلوچی وانگ ءُ نبیسگ ءَ ھیل بِہ کن انت ءُ وتی جتائیں وٹس ایپی گَلاں اڈ بِہ کن اَنت کہ اود ءَ وتی ھساب ءَ پہ ماتی زبان ءِ دیمروئی جُنزان بِہ کن اَنت۔ چوناھیگا پہ بلوچ ءَ بلوچی زبان ءِ دربرگ ءَ یک ھپتگے لوٹ اِیت چی ءَ کہ بلوچی آئی ءِ ابرمی ءُ ماتی زبان انت۔
اول بلوچ ءَ را وتی برادری ءُ دَمک ءِ وٹس ایپی گَلانی لاپ بلوچی نبیسّگ ءِ سوگند کنگی انت کہ بلوچی ءَ ابید دگریں زباناں ھجبر نبیسّگی نہ اَنت بزاں تیوگیں ھال ءُ اھوال ءُ گپرپ ماں زگریں بلوچی ءَ بنت ءُ ھاسکن ھیالداری ءَ بِہ کن انت کہ بلوچی گالرِدانی تہ ءَ ھندی ءِ لبز مان مہ اِت۔ اے وَ ھژدری اِنت کہ بلوچی درونتاں برے برے ھما دَمک ءُ براداری وٹس ایپی گَلاں شِنگ کن ایں کہ بلوچی سْیاھگ راست بِہ بیت۔
درستاں چہ گیشتر ڈبہ ءُ زمہ واری بلوچ شائر ءُ نبشتہ کارانی اِنت کہ آ وتی دانک ءُ نکانانی سْیاھگ ءِ ھیالداری ءَ بِہ کن اَنت کہ اگاں نبشتانکانی یا شئر ءُ شائری ءِ سْیاھگ رَد اَنت گُڑا آ پہ نوک وانوکاں یک دائمی جنجالے ودّی کن اَنت اگاں سْیاھگ اِش راست اِنت گُڑا ھما نبشتانک ءُ شئر شائری پہ نوک وانوکاں ھُدائی دادے بیت کنت۔
نّی من وتی پنت ءَ ھلاس کنگ لوٹ آں بلے من راج ءَ دزبندی کن آں کہ منی اے پنت ءَ ھر نیمگ ءَ شِنگ ءُ شانْگ بہ کن اِت کہ اے وشیں کلوہ ھمک بلوچ پُسّگ ءَ آگاہ بِہ کنت۔
بلوچی ھست بات ءُ بلوچ مَیزر ءُ آباد بات اَنت
