نیکلای نَوسُپ / کریم بلوچ
« میشوتکا » و « استاسک » باگ ءَ چارپادے ءِ سرا نشتت انت و گپ و هبر اتنت . بلے آهانی گپ و هبر ، ادیدگرانی داب ءَ ادنائیں نه اتنت . یک و دگر ءَ هنچیں نه بیتگیں گوشان اتنت . گوئش ئے یک و دگر ءِ هیال ءِ بورتاچی ءِ چکاس ءَ نشتگ اتنت
_ ترا چنت سال انت ؟ _ میشوتکا جُست کت .
_ منا نود و پنچ . ترا چنت سال انت ؟
_ منا یکسد و چل .
_ تو زان ئے ، من پیسر ءَ مزنینے اتوں ، سک مزنینے . هنچو که ناکو بوریا ، پدا من چکلکے بیت اوں . _ میشوتکا گوئشت .
_ من پیش ءَ کسانینے اتوں ، پدا رُست و مزن بوت اوں و پدا کسانینے بوت اوں و هنوں اپدا مزن بیان اوں . _ استاسک گوئشت .
_ من وهدے که مزنینے اتوں ، سرجمیں کئور ءَ من اوژناگ ءَ کت . _ میشوتکا در رائینت .
_ اُه ، من سرجمیں زر و دریای ءَ اوژناگ ءَ کت !
_ تو دریای ءَ گوئشے ! من سرجمیں اکیان ءَ اوژناگ کته !
_ من پیش ءَ بال ءَ کت !
_ هئو هنوں بال کن !
_ هنوں نه تواناں ، شموشتگ اوں .
میشوتکا در رائینت :
_یگبرے من زر ءَ اوژناگ کنان اتاں ، پاگاسے منی سرا بیڑ آرت ، من آئیا گوں مُشت و مُکیاں کُٹاں بیتاں ، بلے منی سری گٹ گِپت و سِست .
_ تئو دروگ ءَ بندئے !
_ نه من راست گوئشاں !
_ گڑاں پرچا تئو نه مُرت ئے ؟
_ من پرچا به مراں ؟ من تاں تیاب ءَ اوژناگ کت و تیاب ءَ درکپت و لوگ ءَ شت اوں !
_ بے سرگ ؟
_ هئو ، من سرگ ءَ چئے کناں ؟
_ تو بے سرگ چون راه رپت ئے ؟
_ هنچو شتاں ، زاناں ( دنا ) بے سرگ ءَ راه ءِ روگ گناه انت ؟
_ نه . بلے هنوں چون ترا سرگ هست ؟
_ دگرے رسته !
پکری کت « بے درور تو جوڑینت ! » . استاسک هیران ات و میشوتکای ءِ سرا ، کمے نه وش ات . لوٹتی که گهتر چه آئی وتی هیال ءِ کمیت ( اپس ) ءَ به تاچینیت .
_ نوں ، اے مزنیں گپے نه انت ! یگبرے من اپریکه ءَ شتگ اتوں ،هموداں منا گوجے ( گانڈوے ) وارت . _ چوشی گوئشت .
_ چو تئو دروگے بست ! _ میشوتکا آئی ءِ سرا کند ات .
_ نه راست گوئشاں .
_ گڑاں تو چون هنوں زندگ ئے ؟
_ هنچش ، پدا منا تُهی کت .
میشوتکه پگرے کت ، آئی لوٹت که استاسک ءَ به چکاسیت . پگری کت و پگری کت و آهر ءَ گوئشتی :
_ یگبرے من سڑک ءَ شت اوں ، منی چپ و چاگرد ءَ پر چه باری ، مساپری و داب دابیں ماشین و ٹراموا ( ریل ءِ سرا رَوُکیں شهری ماشین انت ) ات …
_ من زاناں ، من زاناں ! هنوں لوٹ ئے به گوئش ئے که چون ٹراموا ، ترا ڈلست ، تو ایشی ءَ دروگ بندگ ئے . _ استاسک کوکار کت .
_ نه ، من هچ چشیں چیزے نه گوئشاں .
_ هیر ، جوان انت ، وتی دروگ ءَ دیما بَر .
_ هئو ، من روان اتاں ، گوں کس ءَ منا کارے نیست ات . یگبرے که چه دیمپدیم بنزے یهت . من آئیا نه دیست ات ، منی پاد ءِ چیرا رپت ! و چش که نان من لَپَچ کُت .
_ ها ها ها ها ! چُشیں دروگ !
_ اے دروگے نه انت !
_ چون تو بنز ءَ لپاشت کن ئے ؟
_ هنچو ، آئی سک کسانکیں و لیبی بنزکے ات . آئیا بچلکے گوں بندیکے بستگ ات و بران ات .
_ نوں ، اے هیرانی هبرے نه ات . _ استاسک گوئشت و وتی گپ ءَ دیما براں بوت .
_ من یگبرے ماه ءِ سرا شتاں .
_ اه ، تو کجا بال کت ! _ میشوتکا کند ات .
_ چون ترا باور نه بیت ؟ من راست گوئشاں !
_ گوں چے تئو بال کت و شت ئے ؟
_ راکٹ ءَ سوار بوت و شتاں ، گوں دگه چیزے وا روگ نه بیت ! چون تو ایشی ءَ نه زان ئے ؟
_ تو اوداں ماه ءِ سرا چے دیست ؟
_ نوں ، چے … ( استاسک پَس ات ) اوداں من چے دیست / هچ چیز اوں نه دیست .
_ ها_ها_ها_ها !_ میشوتکا کند ات و گوئشتی : هنگت گوئشیت که ماه ءِ سرا شته !
_ دلجم بئے ، شتگ اوں .
_ گڑاں ، پر چا هچ چیز ات نه دیست ؟
_ تهار ات . شپ ات که من شتاں . واب ءِ تها . راکٹ ءِ تها نشت و بال اوں کت و شتاں در زمین ءَ ( در زمین : فضا ) ، اوووووو ! و پدا وهدے که ارگشت اوں ، بال اوں کت و بال اوں کت … پدا تُرمز ءَ من داشت ۔ زمین ءَ سر بوتگ اتاں … و پدا آگاه بیتاں …
_ هااااااں . _ میشوتکه گاس ات و جانکشی دات . _ تو اول ءَ هنچو به گوشتیں . من وا نه زانت که تو واب ءَ شتگ ئے .
همدان ات که آهانی همساهگ « اِیگُر » آتک و آهانی کَش ءَ پارپادگ ءِ سرا نشت ( نِست ) . آئی دوئیناں گوش داشت انت و گوش داشت انت و پدا آهانی گوشت ( گُوپت ) :
_ اُه ، چشیں دروگبند ، چون ، شما را شرم ءَ نه کنت ؟
_ پر چا شرم بکنت ؟ ما وا کسے ءَ بازی نه دیگ ایں و نه ریپینیں . _ استاسک پسو دات . _ ما وا تهنا وتی هیال ءِ کمیت ءَ تاچینگ ایں . تو بگوش ما کسه و ازمانک گوشگ ایں .
_ کسه و آزمانک ! جوانیں کارے شما ودی کته ! _ ایگر آهاں ملنڈ کناں گوئشت .
_ تئی هیال ءَ سسا ساچی ، باز ارزانیں کارے ؟
_ آسان تر بیت نه کنت !
_ جوان ، تو یکے تهیں !
_ هنوں … شما را پیش داراں . _ ایگر گوشت .
میشوتکا و استاسک گل بیت انت و په اشکنگ ءَ وتش تیار کت .
_ هنوں ، اِن – اِن – اِن ن … گِ … م اِن – اِن – اِن – ن …
_ نوں . چون تو تهنا « اِن – اِن » بلدئے ؟
_ هنوں ! بلّیت که من کمے پگر بکناں .
_ جوان ، پگر کن . جوان پگر کن !
_ اِن – اِن – اِاِاِاِ _ ایگر اپدا همشاں چه دپی درآتک انت و آزمان ءَ چاراں بوت .
_ هنوں ، هنوں … اِن – اِن -اِن . اِن …
_ نوں . تئی سساساچی و هیال تاچی چون بوت ؟ تو گوشت ایشی ءَ چه آسان تریں کارے نیست !
_ هنوں … . دل ءَ بدار . همیش انت ! یگبرے من کچکے ءَ هِژمی کت . منی پادی گَست و دپ جت . ایش انت ٹپی تاں هنوں جاه ءَ کیت .
_ نوں . اداں تئی هیال و سسا ساچی کجنت ؟ _ استاسک جست کت .
_ هچ هیال و سسا چی یے اداں نیست . هما داب که بیته تو گوشت .
_ تو گوشت : تو سسا ساچی و هیال تاچی ءِ شهزانتے ئے !
_ من شمئے دابیں دروگبندے نیاں . شما دروگ ءَ بُرّ ایت ، هنچو که کس شک مه کنت . من زی ( زکی ) دروگے بست که پر من پائدگی هست ات ، شمئے بیکاریں دروگ انت .
_ چون تئی دروگ ترا کار دات ؟
_ چُش . زی بیگاهی ( دیگر ) مئی پس و ماس شتگ اتنت . من و منی گهار « ایرا » لوگ اتیں . ایرا وپتگ و واب ات . من کنورجاه ءَ شتاں و گرستگیں بینگیں سوپانی نیم شیشگ ءَ وارت و پر شی که زانگ مه بئیں ، شت و ایرای ءِ لنٹان ءَ ، کمے چه گرستگیں سوپاں لگاشت انت .
مئی مات آتک و سوجی کت که سوپ ءِ « جم » ءَ کے وارتگ انت ؟ من گوشت : ایرا . مات ایرای ءَ چار ات و دیستی که ائی ءِ لنٹاں ، لِپچَکیں گرستگیں سوپانی نشان هست انت .
مرچی سُهب ، منی مات آیرا په اے کار ءَ ڈوبار ات و ایر جت و منا منی مات هنگت دگه گرستگیں سوپ دات . ایش ات کار دئیں دروگ .
_ بزاں چه تئی کار و دروگ ءَ ، دگرے ایرجنگ و بد گوشگ بوته و تو گل ئے ؟ _ میشوتکه گوشت .
_ نوں ، ترا چے کار انت ؟
_ منا کارے نیست . بلے تو پیشداشت که تو چونینے ئے . چے گوشنتی : دروگبندے ئے ! همیش انت !
_ شما وت دروگ بُرّ ایت .
_ به رو ، چه اداں دور بئے ، نه لوٹیں تئی گون ءَ یکیں چارپادگ هم به نندیں .
_ منی جند هم نه لوٹیت که گوں شما یکجاه به نندیں .
ایگر پاد آتک و شت . میشوتکه و استاسک هم پاد آتک و دیم په لوگ روان بوت انت . راه ءِ تها آئس کریم ( بستنی ) ءِ بها کنوکے اش دیست . اوشتات انت و وتی کیسگ ( کیتو ) اش پیشکرت و گشت هساب اش کت که چینچو زر آهان هست انت . گوں دوئینانی زر ، یک آئس کریمے آهاں گپت کت .
_ جوان انت یکے گر ایں و دو بهری کنیں . _ استاسک گوشت .
زر اش دات و سوداگر آهان ءَ ائس کریمے که لٹکے مانجتگ ات دات .
_ رئیں لوگ ءَ و هموداں گوں کارچی بُرّ ایں که دو برابریں بهر به بیت . ( میشوتکا در رائینت .
_ به رواں .
پدانک ( پدکانک ) ءِ سرا ، ایرا اش دیست . چمی ارسین اتنت .
_ تو چیا گریتگ ؟ _ میشوتکا سوج کت .
_ منی مات منا در کپگ ءَ نئشتگ .
_ پرچا ؟
_گرستگیں سوپانی هاترا و من آهاں دپ هم پر نه کتگ . ایگر منا تهمت جت که من وارتگ انت . بیت که ائی ءِ جند وارتگ انت و مئیاری منی سرا لڈ ات .
_ هئو ، هنچش انت . ایگر ءِ جند ما را گوں ناز و نکره گوشت که آئی وارتگ انت . تو مه گریب ( گریو ) . بیا رئیں ، من وتی آئس کریم ءِ نیم بهر ءَ ترا دیاں . _ میشوتکا گوشت .
_ من هم وتی نیم بهر ءَ ترا دیاں . من تهنا تامی ءَ چشاں و بس . _ استاسک هم آئیا تسلاه دات .
_ چون شما وت نه لوٹیت آئیا ور ایت ؟
_ نه . نه لوٹیں . ما مرچی هر کجام ده _ ده آئس کریم وارته . _ استاسک گوشت .
_ بیائیت گهتر انت که اے آئیس کریم ءَ ، ما سئے بهر ءَ بهر کنیں . _ ایرا گوشت انت .
_ گهتر همیش انت ! اگں نه تو سرجماں ورئے بیت که تئی گٹ درد بکنت . _ استاسک وتی تپاکی پیشداشت .
آواں شت انت لوگ ءَ و اوداں ائس کریم اش سئے جاه بهر کرت .
_ باز وشتامیں ائس کریمے ! منا آئس کریم باز پسند ءَ بیت . یگبرے من پُریں ڈولے آئس کریم وارت . _ میشوتکه گوشت .
_ نوں تو هر دابیں گوش ئے به گوش ! کے تئی هبر ءَ باور کنت که تو تهنا یک ڈولے آئس کریم وارته ! _ ایرا کند ات و گوشتی .
_ هنچش انت ، بلے باز کسانکینے ات . کسانکیں ڈولکے ! کاگدی اینے . کوپے ءِ کساس ات …
