ھمگام رپورٹ
بلوچستان ءَ سال 1970 ءَ پد اولی رند ءَ بلوچ لس مھلوک ءَ 8 اُستپان 2024 ءَ دوزادھمی وتگڑیں گچینکاریانی شریں رنگے ءَ بائیکاٹ کتگ ءُ دنیا ءَ ھال داتگ کہ بلوچستان ءِ سرا پاکستان کوزہ نارواہ ءُ گیر کانودی یے-
یک اندازگے ءِ رد ءَ بلوچستان ءِ آزادی لوٹوکاں اولی رنداں سال 2008 ءَ پاکستان ءِ گچینکاریانی بائیکاٹ کنگ ءِ جار جنگ بوتگ، چش کہ آ وھد ءَ آجوئی جنز ءِ بنداتی دور بوتگ آ وھد ءَ تب ءِ ھساب ءَ آسر در نیاتکگ-
پد ءَ دو ھزار سیزدہ ءُ دوھزار ھژدہ ءَ اوں گچینکاری بائیکاٹ کنگ بوت انت- بلے ریاست ءُ دروگیں واب پیش داشتگ کہ سرکاری نوکری، دگہ آسراتی دیگ ئے کولاں کتگ ھمے سوب ءَ چہ نیزگار ءُ بے وسیں مردماں مزنیں کچے ءَ اوٹ داتگ-
اے گپ درست شر رنگے ءَ پوہ انت کہ بلوچستان (no go area) جوڑ بوتگ چش کہ پاکستانی لشکر ءِ دست ءَ انت ھود ءَ ساپ ءُ سلھیں گچینکاری ءِ گمان کنگ نہ بیت، بلے دوھزار سیزدہ ءُ دو ھزار ھژدہ ءَ لس مھلوک ءَ مزنیں کچے ءَ گچینکاریاں بھر زرت بلے امُیدوار گچین کنگ بوت اسمبلی ءَ شت انت،
اے زمانگ ءَ باپ پارٹی ءِ باسک کدوس بزنجو ءَ چہ آواران ءَ چار سد اوٹ گیپتگ ءُ اسمبلی ءَ شتگ، اے گپ پہ سرجمیں دنیا ءَ ھیرانی ءِ گپے ات، بلے پاکستان ءَ کسے ءِ واستا اوں اے جیڑھے نہ ات پرچا کہ پاکستان ھما ملک انت فوجی سرکار ھرچی کت کنت، ایشی ءَ داروک دنیا ءِ تہ ءَ کس نیست چش کہ انسانی ھکانی ھلاپ ورزی ءَ کنت ءُ میان استمانی کانوداں لگتمال کنت، مردماں روچ رھمی سی سی ٹی وی کیمرھانی دیم ءَ آوار جنت ءُ بیگواہ کنت، پد ءَ آمیدگس ءَ پیش نہ کنت ءُ شھید کنت ءُ دور دنت پسہ نہ دنت-
بلے انوں 8 استپان 2024 ءِ گچینکاریاں بلوچاں شریں رنگے ءَ بائیکاٹ کنگ ءُ بلوچستان ءِ پاکستان ءِ زورگیری ءِ ھلاپ ءَ یک رنگے ءَ لس مھلوک ءِ “ریفرنڈمے” اَت چش کہ پاکستان ءِ بے لگامیں لشکر ءُ آئی ھاکماں پہ سوچوکیں لیوارے ءِ برابر ءَ انت- پرچا کہ انوھیں گچینکاریاں لس مھلوک ءِ بھر نہ زورگ ءِ مستریں سبب پاکستانی لشکر ءِ زلم ءُ زوراکی، زورانسریں آوارجنی ءُ آمیدگس ءَ پیش نہ کنگ ایدگہ انچیں ایدگہ انچیں انسانی ھکانی ھلاپ ورزی ءُ انسانانی میتگاں تبا کنگ، مردماں لڑ ءُ بار ءَ لاچار کنگ، بے روزگاری ودی کنگ ءُ اے ملک مردمانی زندمان ءِ تباہ کنگ ءَ پہ جوڑ بوتگ-
گچینکاریاں اے وڑ ءَ مکران ءَ لس مھلوک ءِ بائیکاٹ کنگ یک درورے ءِ رنگے ءَ دیم ءَ اتکگ کہ مند، زامران ءُ ھیرونک چک ءُ زالبولاں توپکانی دیم ءَ پولنگ اسٹیشنانی سامان پروشتگ انت ھمے دروشم ءَ دگہ بازیں ھنداں مردم گچینکاری ءَ پہ شتگ انت وتن دوستی ءِ سبوت داتگ ءُ پہ پاکستان ءَ نپرت ءِ درشان کتگ، بلے اے درستاں چہ ابید یک جتائیں ھندے ھست انت ھود ءَ نہ اوٹے نہ بوتگ- چش بنکی پیرکی راجدپتر زندگ داشتگ-
مرچیگیں گچینکاریاں مارا ھال رَستگ کہ کوھلو ءِ ھند کاھان ءَ ھود ءَ کسے اوں اوٹ نہ داتگ، اوٹ نہ دیگ ھود ءِ لس مھلوک ءِ ھیال انت بلے ھود ءَ سرمچاراں انچیں رپک کارمرز کتگ کہ دژمن گچینکاری کنگ ءَ سرجم ءَ بے سوب بوتگ بلوچ سرمچاراں ریاست ءِ لشکر ءَ را باور کنائینتگ کہ آ ءُ آئی ودی کنوک برتانیہ اوں اد ءَ لٹ ءُ پل بے سوبی ءَ گوں واتر بوتگ-
گش انت کہ برتانیہ ھما وھد ءَ کہ انگریزانی واجھی بوتگ ھما زمانگ ءَ چہ گر داں روچ مرچی اے سرڈگار ءِ مال ءُ مڈیانی پھریزگ ءَ سرمچاراں وتی سر داتگ ءُ پھریز اتگ داں روچی ھمے رد یکشلا برجاہ انت-
