لندن (ھمگام نیوز) فری بلوچستان موومنٹ ءِ جارکش ءَ وتی شنگ کتگیں درشانے ءِ تہ ءَ گشتگ کہ ایردستیں بلوچستان ءِ گار ءُ بیگواھیں بلوچانی آجوئی ءِ واستا برجم داشتگیں مراگشانی سر ءَ ، کراچی ءِ تہ ءَ بے گناھیں بلوچ زھگ ءُ زالبول پاکستانی پلیس ءُ آ دگہ لشکری ادراھانی زلم ءُ زوراکی ، مئیگ ءُ آیانی (پاکستانی ریاست) نیام ءَ ھستیں سیادی ءُ سیمسر ءِ تچک ءَ تچک پیشدارگ ءُ گیشتر پدّر کنگ انت کہ کبزہ گیریں ریاست مجتی وتی ایردسیں راجانی سر ءَ زلم ءُ زوراکی ءِ کوھاں پروشان بنت تاں کہ ایردستیں راجانی ھستیں راجی پجّار ءُ سیاسی زانت ءُ زانگ ءَ را گوں زلم ءُ زوراکی ءِ سوب ءَ ھلاس کنگ ءِ جھد ءَ کنگ ءَ اِنت ءُ آیاناں چہ وتی راجی آسراتیاں چہ جدا ءُ پروشت ءُ پروش ءِ آماچ بہ کنت۔
جارکش ءَ دیمتر ءَ گیش کنان کتگ ءُ گشتگ کہ : دنیا ءِ درھیں آجوئی جھد ءُ زرمبشتانی سر ءَ زلم ءُ زوراکیانی نشانگ کنگ ءِ اے رنگیں کسہ گواہ انت کہ اُوداں کالونئیل زورآوراں وتی ایردست ءُ گلامیں دمگاناں ھستیں مھلوک ءُ مردماناں ناں تھنا چہ وت بزگ ءُ کمتری ءِ تبکہ اش داتگ ءُ زانتگ کہ بلکین ءَ ھم آیاناں چہ ھر رنگیں ملکی ، سیاسی ، چاگردی ءُ بنداتی آسراتیاں چہ زبھر کتگ اَنت تاں کہ نوک آبادیں دمگاناں ریاست وتی برجم داشتگین ءُ بیوکیں زلم ءُ زوراکیانی بنیاد ءَ ترس ءِ چاگردے جوڑ کنت ءُ مھلوک ءَ چہ سیاسی ءُ چاگردی چست ءُ ایر ءُ مراگشاں چہ دور کت بہ کنت۔
جارکش ءَ دیمتر ءَ گیش کنان ءَ اے گشتگ کہ: بلوچ زھگ ءُ زالبولانی سر ءَ پنجابی ریاست ءِ لشکر ءِ اے رنگیں زوراکی ءِ کچّ ءُ کساس سِربین لشکر ءِ بے ننگیں زوراکیانی درور ءُ شبینگ ءَ جنگ ءُ پدّرائی ءَ کنگ ءَ اِنت ءُ پنجابی لشکر ، اے وھدی رودرآتکی پاکستان بزاں ماں بنگلادیش ءَ آئی ءِ کتگیں بدیں کردارانی اَسر ھم ، اے وھدی بلوچستان ءَ گندگ بیگ ءَ اَنت ءُ ھمود ءَ کہ بلوچ زالبول ءُ زھگاناں چہ آیانی پہ ھک ءُ کانودی ئیں لوٹانی واستا ھم سیاسی جھد ھم پچگرگ بیگ ءَ انت آیانی سر ءَ بے در ءُ بے پناھیں زوراکی ءِ دشمنی یے ءِ سر ءَ کار ءَ اِنت۔
ایف بی ایم ءِ جارکش ءَ گیش کنان ءَ گشتگ کہ : نی پہ بلوچ ءَ آ وھد اتکگ ءُ سر بیتگ کہ بلوچ سیاسی کارکن بندرابّاس ءَ چہ بگر داں کراچی ءَ ، بلوچ ءِ سرزمین ءُ ھاک ءِ ھر بچیل ءُ بُوگے ءَ پہ ، بلوچ راج ءِ بگیری ءَ برجم داروکیں زلم ءُ زوراکی ءُ نشانگ کنگ ءِ ، پنجابی ءُ پارسی ءِ اے رنگیں کتگینان ءُ ننگی بیوکیں زوراکیاناں دنیا ءِ دیم ءَ پیش بہ دار ایت ءُ بریتانیا ءِ گلامی ءِ نوک آبادیانی ءُ درآبرمی سیمسرانی دوئین نیمگانی نندوکیں بلوچ راج وتی درد ءُ دورانی ویلاں سرپد بہ بیت ءُ یک دومی ءِ درد ءُ دور ءُ تکلیپیاں سرپد بہ بنت ءُ یک دومی ءِ درد ءُ تکلیپاں وتی بہ زان اَنت ءُ سرپد بہ بنت ءُ آیاناں دنیا ءِ دیم ءَ پیشدارگ ءِ جھد ءُ کوشست ءَ بہ کن انت۔
شنگ بیتگیں درشان ءِ تہ ءَ گشگ بیتگ کہ: انچش کہ گَلّ ءُ ٹولیانی سیت ءُ نپاناں بنیاد ایر کنگ ءُ ، متھدہ بلوچستان ءِ نام ءِ گرگ ءَ چہ بلوچ راج ءَ را بیوکیں آسرھالاں ءَ چہ ترسینگ ءَ اَنت کہ اگاں متھدہ بلوچستان ءِ لوٹ ءَ تیزی زرت تہ ، بلوچ راج ءِ چکچینی ءُ زلم ءُ زوراکی ءِ تہ ءَ الّم گیشی کیت ۔ کسھانی دنیا ءِ تہ ءَ نندوکیں نام نھادیں مھلوک ءَ را مجتی اے آدت اش بیت کہ آ راستی ءَ چہ چماناں بند بہ کن اَنت ۔ ءُ اگاں ناں راستی ایش انت کہ مرچی ایران ءُ پاکستان ءِ دوئینانی تہ ءَ بلوچ ءِ چکچینی ءِ پہ تیزی ءِ کچ ءُ کساس یک کدّ ءَ انت ۔ ایپ بی ایم ءِ جارکش ءَ گیش کنان ءَ گشتگ کہ : کراچی بلوچانی پت ءُ پیرکی پُشت در پشت ءُ راجدپتری ھرچ رنگیں ھساب ءَ بلوچ راج ءِ نندگی دوارجاگہ یے بیتگ ۔ ایردستی ءُ راجدپتر ءِ کوھن بیگ ، اے گپ ءِ سوب نہ انت کہ دراجیں وھدے ءِ بھر ءُ بانگ ءُ ایردست بیگ ءَ رند ھم ، بلوچ ءَ وتی ھاک ءُ سرزمین ءِ لوٹگ ءَ چہ دستکش بیتگ ۔ پاکستان ءِ آ دگہ ایردست ءُ گلامیں راجانی ازت ءُ شرپ وتی جاگہ ءَ ، بلے ! بلوچ ناں وتی ھاک ءُ سرزمین ءَ چہ ھچبر دستکش بیتگ ءُ نہ بیت انت ھم ۔ اگاں بلوچ ءُ پشتون ءِ سرزمین ءِ سر ءَ بیوکیں بھر ءُ بانگ چارگ بہ بیت تہ زانگ بیت کہ بلوچ راج ءَ مدام واترینگ ءِ گپ ءِ لوٹ ئِے کتگ کہ آ پشتونانی راجدپتری سرزمین ءِ بھراں پہ ھچبر ھم وتی ھک ءُ بھر اش نہ زانت ءُ بلکیں بگندئے ھم بلوچ راج ءَ را ھر وھدے کہ پیسلہ ءِ ھکّ ئِے رس ات تہ بلوچ راج پشتوناں گوں ھوار انگریزانی گلامی ءِ جوڑ کتگیں ایردستی ءِ سیمسرانی ھلاسی ءَ پہ دل ءِ جھلانکی ءَ چہ جھد ءُ کوشست ءَ کنت ۔بلوچانی نیک نیتی ءِ درونت ءِ دربرگ ءَ گوں ، پاکستانی ایردستیں آ دگہ راجاناں ھم بلوچانی راجدپتری ھاک ءُ سرزمین ءَ پہ ھمتوار ءُ بلوچانی بُن پیرکی پہ ھکیں توار ءِ لوٹ ءَ ، آواز چست کنگی انت ۔ راجدپتری ءُ گوستانکی رد ءَ بلوچ ھچبر چہ مائی کلاچی (کراچی) ءِ ھاک ءَ چہ دستکش بیت نہ کنت ۔ اگاں کہ ھمے کسہ بُن بہ جنت تہ ءَ آ روچ ھم دیر نہ انت کہ پاکستان ایردستی ءِ ھمے بنیاد ءَ چہ دستکش بیت ءُ پاکستانی ایردستی ءِ گپ راجدپتر ءِ تاکانی تہ ءَ کوھن بیت ءُ چیرتر ایت۔
درشان ءِ تہ ءَ گیش کنگ ءُ گشگ بیتگ کہ: بلوچ راج مرچی اگاں چش کہ پنجابی ءُ پارسی نوک آبادین زورآوریں زلم ءُ زوراکیانی سایگ ءَ زندگ ءُ ساہ کشّگ ءَ بہ بیت ءُ راجی چکچینی ءَ ھوار ، گار ءُ بیگواھیں ازیزانی تکلیپیاں بہ سگگ ءَ انت آ درھیں درد ءُ دورانی دوا ءُ درمان ءُ آسر ، متھدہ بلوچستان ءِ آجوئی ءِ رنگ ءَ بیت کنت ءُ ھمود ءَ کہ بریتانیا ءِ گلامی ءِ کشّ اتگیں درآبرمی ئیں سیمسرانی کِشک ءِ کروجگ ءَ گوں ءُ سرجمیں بلوچستان ءِ سرزمین ءَ را یک ، یک ءُ تھنائین ءُ آجوئیں ریاستے ءِ بستار ءَ ماں دنیا ءِ دیم ءَ پجار کنگ انت ئِے۔
