لندن (ھمگام نیوز) فری بلوچستان موومنٹ نا کالخواہ تینا تروکا بیان اٹ پارے کہ مقبوضہ بلوچستان اٹ گُم و گار ئِنگا بندغ آتے کے مروکا کاریم تا وخت آ کراچی ٹی بے گناہ ئنگا چنا وُ زالبول آتا زِی آ قوضہ کروکا پاکستانی پولیس و نیم فوجی ٹولہ نا ظلم و ستم، ننا و اُونا نیام ئنا لِکیر ء پین پاش کننگ ءِ ارا کہ قوضہ کروکا ریاست مدام قوضہ مروکا قوم آ ظلم ئنا مَش تے مُخ آتا پرغک۔ تاکہ اوفتا تہہ ٹی اَرا جتا اِنگا قومی پہچان و سیاسی شعور ارے امودے ظلم اٹ اِیسر کے و اوفتے تینا قومی بنیات تے آن بیگانہ کے۔
کالخواہ مونا پارے کہ دنیا جہان نا آزاتی نا تحریک آک دا وڑ وڑ ئِنگا ظلم و ستم تا قصہ آتے آن پُرّ او ، اراڑے کالونیل طاغت آک بیرہ قوضہ مروکا مخلوک ء کم تر پو مَتنو ، بلکہ اوفتے ہر وڑ ئنا شہری، سیاسی و سماجی بنیاتی حق آتے آن ام محروم تخانو تہ، تاکہ امو قوضہ مروکا علاقہ تے ٹی قوضہ گیر تینا کروکا ظلم آتے ٹی خُلیس ئنا چاگڑد ئس ودی کے او عوام ء سیاسی و سماجی کاریم تے آن مُر کے۔
او پارے کہ پنجابی قوضہ کروکا فوج ئنا وڑ و ڈول، و بلوچ زالبول او چنا تا زی آ مروکا ظلم و ستم سربین فوج ئنا لوچ ئنگا جبر ئنا یات ترفک، او تینٹ پنجابی فوج ئنا امو وخت ئنا مشرقی پاکستان یعنی بنگلادیش اٹ اوفتا خراب ئنگا کڑد ئنا اثر آک داسا بلوچستان اٹ خننگنگ او۔ اراڑے بلوچ زالبول و چنا تے آن اوفتا جائز و قانونی حق آتے کن ام ہچو سیاسی جاغہ اس اِلّے تن او۔ اور اوفتے آ اسُل بھاز ، او وڑ وڑ ئنا ظلم و ستم آزمائفنگو۔
ایف بی ایم نا کالخواہ مونا پارے کہ داسا امو وخت بسون ء کہ بلوچ سیاسی بندغ آک بلوچ ڈغار آ ، بندر عباس آن الیس کراچی ئسکا ، ہر اسے اِنچ آ بلوچ قوم ئنا خلاف مروکا ظلم و ستم ، پنجابی و فارس قوم ئنا وڑ و ڈول آتے و اونا لوچ ئنگا فوجی جبر ء دنیا جہان نا مونا پاش کے۔ او برطانوی قوضہ گیر ئنا کشوکا لکیرتے و جوڑوکا سرحد آتا اڑتوما پارہ غا تے آ رہنگوکا بلوچ آک تینا ڈکھ و ویل ء اسٹ پو مریسا دنیا جہان نا مونا پاش کننگ نا کوشست کیر۔
بیان اٹ دا پاننگا کہ ارا وڑ اٹ ٹولی یا پارٹی تا مفاداتے کن متحدہ بلوچستان نا پن النگ آن مخلوک ء مروکا نتیجہ آتے آن خلیفنگ او ، کہ اگہ متحدہ بلوچستان نا ہیت زور الک تو بلوچ قوم ئنا نسل کشی ٹی و اوڑا مروکا ظلم و ستم پین ترند مریک۔ خیالی جہان اٹ مروکا بندغاتا ساندہ اندا عادت مسون ء کہ او راستوکی آن تینا خن تر کیر۔ ولے راستوکی اندادے کہ ایران و پاکستان اڑتوما پارہ غا آ بلوچ نسل کشی نا ترندی اسے وڑ ء۔
ایف بی ایم نا کالخواہ مونا پارے کہ کراچی باوہ پیرئی آن و تاریخی لحاظ آم بلوچ قوم ئنا ہنکین مسون ء۔ قوضہ مننگ و دیہاڑ نا متکن منننگ دا گڑا نا دلیل اف کہ بھاز اورے آن تقسیم و قوضہ مروکا بندغ تینا لُمّئی آ ڈغار آن دو ارفے اک۔ پاکستان اٹ قوضہ مروکا قوم تا عِزّت تینا جاغہ آ ولے بلوچ تینا تاریخی ڈغار آن نہ دو ارفینے او نہ وخت اسے ٹی ارفک۔
اگہ بلوچ و پشتون نا تین پہ تین ٹکر مروکا ڈغار ء اورن گڑا بلوچ قوم مدام دا ہیت ء کرینے کہ او پشتون ڈغار آ تینا حق ء جمائفپک ، بلکہ دانا چَپّ اگہ بلوچ ء دا اختیار و حق مِلّا گڑا بوچ و پشتون اوار، دا انگریز سامراج نا جوڑ کروکا بارڈر تے ایسر کرور۔ بلوچ آتا نیک نیتی آن سبخ ہیل کیر ، ایلو قوم آک ام بائدے بلوچ آتا تاریخی و لمئی ڈغار آ اوفتا مالک مننگ نا حق ء مننر۔ دیہاڑ ئنا متکن مننگ دا گڑا پاپک کہ بلوچ قوم مائی کلاچی (کراچی) نا مالک مننگ آن دو ارفر ۔ اگہ اندا روایت آک جاغہ کریر ننے ٹی گڑا امو دے ام مر اف کہ پاکستانی قوضہ مننگ ء ام تسلیم کننگ شروع کیر انتے کہ ولدہ گُڑا دا پاکستانی قوضہ والا ہیت ام تاریخ نا پنہ غا تے ٹی متکن مرو اک۔
بیان اٹ پین ہیت و گپ مس کہ بلوچ قوم اینو اَرا وڑ اٹ پنجابی و فارس قوضہ گیر طاغت آتا ظلم و ستم نا سیخا ٹی رہینگنگ ء او قومی نسل کشی و تینا زیبا ئنگا چنا تا گم و گار مننگ ء سہنگ ء ، دا کل ڈکھ و دڑد آ تا پوروی ء متحدہ بلوچستان نا آزاتی ٹی ممکن اریر۔ اراڑے برطانوی راج ئنا جوڑوکا سرحد آتے ایسر کریسا پورہ بلوچستان نا ڈغار ء اسٹ و آزاد ئنگا حیثیت اٹ دنیا جہان نا مونا پیش کننگے!
